Покана до грчките бизниси да инвестираат во Северна Македонија, која се надградува и енергетски и на ниво на транспортната инфраструктура, упатил заменик-претседателот на Владата и министер за транспорт Александар Николоски за време на неговото учество на вториот „Форум за поврзување во Југоисточна Европа“ (Southeast Europe Connectivity Forum) во Солун, соопштија организаторите, јави дописничката на МИА од Атина. Министерот истакнал дека новата Влада спроведува многу амбициозна програма за економски развој на земјата. - Веќе ја намаливме инфлацијата за два процентни поени. Ќе бидеме земја број еден во економскиот развој на Балканот во 2025 година. Добрите односи меѓу двете земји дополнително ќе се развиваат во следниот период, нагласил Николовски и додал дека е „природно да има интеракција меѓу економиите на Грција и Северна Македонија“, но и дека развојот на нашата земја е во интерес на јужниот сосед. За енергетиката, според организаторите, министерот посочил дека земјата е зависна од рускиот природен гас, но веќе „почна тендерскиот процес кој ќе биде завршен следниот месец за интерконекторот за природен гас со Грција“ и потсетил на Меморандумот за соработка со што неодамна беше потпишан со Србија за изградба на интерконектор. Во однос на железничката мрежа, објаснил дека Владата има намера да ја реконструира железничката врска со Грција, со цел за пет години да има брза врска која може да постигне брзини на возот од 120-130 километри на час, со што ќе се надгради и товарниот и патничкиот транспорт меѓу двете земји. Дополнително, како што соопштија од Форумот, Николовски истакнал дека намерата на Владата е да се намали данокот на корпоративна добивка на најниско ниво во Европа. Модератор на дискусијата беше претседателот на Грчката бизнис-асоцијација во Северна Македонија Арис Влахос, кој истакнал дека грчките бизниси во последните години инвестирале 700-800 милиони евра во Северна Македонија. „Форум за поврзување во Југоисточна Европа“ што денеска и утре се одржува во Солун е организиран од Tsomokos Communications, стратешкиот партнер е Солунското пристаниште, а оваа година се одржува по втор пат и има за цел да ги истакне клучните аспекти на иднината на транспортот и инфраструктурата во регионот....

Имаме амбициозна агенда за развој на патната и железничката инфраструктура и преку тие проекти планираме да ја зголемиме конкурентската позиција на Коридорот 10 и да го вратиме значењето на регионот каде што заслужува во европскиот транспорт на добра и патници, истакна заменик претседателот на Владата и министер за транспорт Александар Николоски на билатералната средба во Солун со Христос Стакурас, министер за инфраструктура и транспорт на Грција. Како што информираат од Министерство за транспорт, Николоски потенцираше дека Владата е силно посветена на проектот за изградба на нова брза пруга на коридор 10 со која ќе се забрза транспортот на добра и услуги од пристаништата од Грција кон Централна Европа и обратно. -Овој проект кој има регионално значење е од огромен интерес за сите земји и оттаму се јавува потребата заеднички да се пристапи кон негова реализација се со цел бенефитот од брза пруга да го имаат сите земји и економиите во нив, потенцираше министерот Николоски. Во таа насока го отвори и прашањето за железничкото поврзување кај Кременица (Битола), заради потребата од побрза регионална конекција во Пелагонискиот регион и алтернативна врска со пристаништата. Исто така на средбата се отворија и прашањата за подобрување на патната инфраструктура во двете земји како услов за побрз транспорт и побезбеден сообраќај. Во тој контекст министерот ги презентираше плановите на Владата за реализација на проекти во патната мрежа како и инсталација на интелигентни транспортни системи на Коридор 10. Министерот Николоски ја отвори и темата за наплатните станици и поминување на македонските и грчки граѓани на патарините со еден заеднички таг, по примерот со Србија. Двајцата министри разговараа и за олеснување на транспортот и трговијата на граничните премини како регионален проект преку кој бенефит би имале двете економии. Двајцата министри изразија огромно задоволство за оваа прва билатерална средба, со заклучок дека двете земји имаат широко поле на соработка и дека во периодот што следи ќе се интензивира таквата соработка со цел економски развој на регионот преку заеднички проекти...

Заменик претседателот на Владата и министер за транспорт Александар Николоски денеска претстојува во работна посета во Солун каде што оствари билатерална средба со Христос Стилинидис, министер за поморски работи и островска политка на Грција. На средбата, која е прва меѓу двајцата министри, како што соопшти Министерство за транспорт, се разговарало за економската соработка меѓу двете земји. Министерот Николоски ја истакнал силната заложба на Владата за економски развој на регионот преку учество во заеднички проекти, притоа потенцирајќи ја потребата од квалитено инфраструктурно поврзување. Во духот на добрососедските односи а имајќи предвид дека регионалната соработка зависи од двете Влади, министерот Николоски изразил уверување „дека Македонија е подготвена да учестува во реализација на проекти со кои ќе се зацврсти конкурентската позиција на европските коридори“. На средбата Николоски истакнал дека „голем дел од извозно ориентирани компании од Македонија соработуваат со солунското пристаништа со што се отвора потребата за поквалитетно поврзување и побрз транспорт на добрата и услугите“. Двајцата министри се согласиле дека ова е почетна точка во идната соработка меѓу двете Влади, со што изразиле уверување дека постои огромен простор за зголемување на економската соработка во различни дејности. Министерот Николоски во рамки на работната посета на Солун, учествува на Форумот посветен за развојот на инфраструктурата и поврзување со Југоисточна Европа...

До Нова година ќе има мониторинг врз спроведувањето на Законот за нефер трговски практики, а потоа ќе следуваат ригорозни казни за оние што нема да го почитуваат, најави денеска заменик министерот за економија и труд Марјан Ристески. Како што истакна Рисетски, сите економски мерки и овој закон се во интерес на граѓаните. -До Нова година ќе се мониторира спроведувањето на Законот за нефер трговски практики, а потоа ќе следуваат ригорозни казни за оние што нема да ги почитуваат мерките предвидени со ова законско решение. Сите мерки, вклучително и овој закон, се во интерес на граѓаните и во насока на подобрување на животниот стандард, истакна Ристески на прес-конференцијата на Конфедерацијата на слободни синдикати на Македонија. Законот за нефер трговски практики стапи во сила кон крајот на септември. Со него се опфатени околу 2 500 производи на кои профитната маржа им е ограничена до 10 отсто, поради што се очекува за 10 отсто да ги намали нивните цени. Со Законот, покрај ограничен рабат, трговците нема да смеат да наплаќаат дополнителни трошоци за маркетинг, репрезентација, како и за истакнување одреден производ на полица. Казната за најтежок прекршок и непочитување на овој Закон може да изнесува до 20 000 евра за голем трговец и од 350 до 500 евра за одговорното лице. Казните за полесни прекршоци зависат од тоа дали прекршокот го сторил правно или физичко лице. Највисокиот износ на казната за полесен прекршок што може да се изрече во постапка е 5.000 до 6.000 евра за голем трговец и 350 до 500 евра за одговорното лице во правното лице кој е голем трговец. Надлежен орган за контрола на примената на Законот е Комисијата за заштита на конкуренцијата, која поведува и прекршочна постапка доколку се прекрши која било мандаторна одредба од Законот....

„Започнавме структурни реформи во сите сектори. Имаме амбициозна програма со која започнавме да ја менуваме сликата за Македонија. Ја реализираме наголемата инвестициона активност во патната мрежа каде започнуваме постапки за изградба на неколку автопати. Завршуваме со изградба на неколку брзи патишта. Нашиот најамбициозен проект е изградба на брза пруга токму на коридор 10 со што ќе овозможиме брза врска до солунското пристаниште и до Централна Европа. Започнавме и со промена на перцепцијата за инвеститорите, да понудиме услови кој ќе бидат конкуретни за инвеститорите и да бидеме препознати како погодна земја за инвестирање“, истакнал заменик претседателот на Владата и министер за транспорт Александар Николоски на Форумот за поврзување со Југоисточна Европа што се одржува во Солун. Николоски, како што се наведува во соопштението од Министерството за траснпорт, нагласил дека „линкот до солунското пристаниште е Македонија и затоа треба да се размислува меѓу земјите партнери на Коридор 10 како да се олесни транспортот и трговијата и да се упростат постапките за компаниите“. - Имаме обврска како Влади да обезедиме брз и сигурен транспорт. Јас си поставив една цел а тоа е да изградам брза пруга и тоа токму во делот на Коридор 10, значи од границата со Србија па се до границата овде во Грција. Оваа пруга што сега ја имаме е бавна и не ја исполнува целта на брзиот транспорт. Коридор 10 е стратешки коридор за сите нас и затоа мора да ги искористиме неговите предности. Овој наш план е амбициозен, истовремено е приоритетен проект на кој многу посветено работиме. Паралелно со ова започнуваме со реконструкција и на постојаната пруга за да може и таа да ја биде во функција за да се користи за домашен и меѓународен транспорт. Дополнително работиме на изградба и на железница на Коридор 8 кон Бугарија. Во делот на патната мрежа силно сме фокусирани на изградба на неколку автопати и брзи патишта на Коридор 8 и 10 со што создаваме нова мрежа на патишта низ земјата, истакнал министерот Николоски. Пред бројните компании тој ги претставил инвестициските услови потенцирајќи дека следи период кога економските индекси значително ќе бидат подобрени. - За следната година очекуваме да имаме најголем раст на БДП-то во регионот. Започнавме да работиме на заедничко поврзување со Грција преку интерконекторот каде ќе се поврземе на гасот од Азербејџан. Очекуваме во следниот период овој гасовод да биде изграден и да ја намалиме зависноста од рускиот гас што значително ќе влијае врз производството. Во овој период имаме силен развој и во сегментот на снабдување со енергија од фотонапонски централи. Работиме на професионализација на администрацијата, на поедноставување на процедурите Нашите планови се сериозни и верувам дека ќе ги реализираме. Ме прашавте за домашните компании. Најголем дел од извозно ориентираните зависат од солунското пристаниште и затоа имаме обврска кон нив да обезбедиме модерни врски, евтини врски за да ја олесниме нивната работа. Тоа и го работиме, потенцира Николоски. Во текот на денот министерот Николоски ќе оствари билатерални средби со министерот за инфраструктура и транспорт на Грција, Христос Стакурас, како и со министерот за поморски работи и островска политка, Христос Стилинидис. Форумот за поврзување со Југоисточна Европа, претставува собир на највлијателните компании и организации за транспорт од Грција, стопански комори, логистички центри и различни финансиски институции, стои во соопштението од Министерството за транспорт...

Државната изборна комисија денеска на седница изгласа извештајот со кој констатира дека пратеник во Собранието за остатокот од мандатот согласно Изборниот законик станува Катерина Димитровска, на местото на Марија Митева од ВМРО-ДПМНЕ и Коалицијата „За твоја Македонија“. Претседателот на ДИК, Борис Кондарко, информираше дека 114-тата седница е свикана по добивање на известување од претседателот на Собранието, со кое ги информира дека Собранието денеска на седница констатирало престанок на мандат на пратеничката Митева, која е избрана од листата на кандидати за пратеници за Изборната единица 1 поднесена од Коалицијата „За твоја Македонија“, предводена од ВМРО-ДПМНЕ. - Согласно Изборниот законик, ДИК со свој допис го извести наредниот кандидат Катерина Димитровска, од листата на кандидати поднесена за пратеници во Собранието за ИЕ 1 од истиот овластен подносител - Коалицијата „За твоја Македонија“. ДИК доби писмено известување дека наредниот кандидат Катерина Димитровска го прифаќа мандатот за пратеник во Собранието за останатиот дел од мандатот согласно Изборниот законик, информираше Кондарко. Извештајот, ДИК го изгласа едногласно и донесе заклучок да се достави до Собранието, за да продолжи процедурата за верификација на мандатот на Катерина Димитровска. Марија Митева на седница на Влада на 8 октомври беше именувана за портпарол на Владата....

Заштеда од 750 до 2 000 денари по ученик од семејство овозможи т.н. училишна кошничка која заврши на 20-ти овој месец. Како што рече денеска заменик министерот за економија и труд Марјан Ристески, по завршувањето на есенската кошничка Владата ќе излезе со официјални податоци и за заштедата по оваа основа. -Со училишната кошничка намалувањето на цените на производите беше околу 20 - 50 отсто или во просек од 25 до 30 проценти. Заштедата по ученик е 750 - 2 000 денари. По завршување на есенската кошничка ќе излеземе со официјален податок колкава е заштедата на една просечна фамилија за основните прехранбени и земјоделски производи, потенцира Ристески на прес-конференцијата на Конфедерацијата на слободни синдикати на Македонија. Училишната кошничка беше воведена на 3 септември како економска мерка, а опфати школски чанти, прибори, тетратки, блокови, моливи и пенкала, гуми за бришење, фломастери и боици, острилки, линијари, шестари и хартија за фотокопирање, маркери, мрсни боици, акрилни, водени бои и четки, линеарни и дидактички материјали,... Целта беше продажба на овие производи по прифатливи цени за потрошувачите. Есенската кошничка беше објавена на 20 септември, а треба да трае до 31 октомври. Се однесува на ориз, брашно, тестенини, масло, млеко, јогург, млечни производи, зеленчук и овошје,...

Министерот за надворешни работи и надворешна трговија Тимчо Муцунски денеска одржал протоколарна средба со новите членови на Заедничката мултидисциплинарна експертска комисија за историски и образовни прашања помеѓу Република Северна Македонија и Република Бугарија. На средбата во МНРНТ, министерот Муцунски пред членовитете на Комисијата истакнал дека Министерството „со сите свои капацитети им стои на располагање во процесот на одговорно и непречено понатамошно извршување на нивните редовни активности“. -Тој посочи дека одлуките и дискусиите во рамки на комисијата треба да бидат водени врз основа на научни аргументи и со целосно почитување на академската слобода. Воедно, ја истакна и личната заложба за независност во одлучувањето на комисијата, без никакви политички влијанија и притисоци, се наведува во соопштението на Министерството. Новиот состав на македонскиот тим од заедничката комисија беше избран од Владата на 10 септември. За нејзин претседател е назначен Ванчо Ѓорѓиев, професор на Филозофскиот факултет во Скопје. Членови на комисијата се и д-р Александар Литовски, научен соработник при Институтот за национална историја во Скопје, д-р Митко Панов, научен советник при Институтот за национална историја во Скопје, Д-р Никола Минов, вонреден професор на Филозофскиот факултет во Скопје при УКИМ – Скопје, Доц. д-р Сашо Додевски, насловен доцент избран на Филозофскиот факултет во Скопје, Д-р Бесник Емини, виш научен соработник на Институтот за духовно и културно наследство на Албанците – Скопје и д-р Димитар Љоровски, научен советник при Институтот за национална историја во Скопје Заедничката македонско-бугарска комисија за историски и образовни прашања беше формирана како резултат на Договорот за добрососедство меѓу Северна Македонија и Бугарија потпишан на 1 август 2017 година...

Здружението „Хема-онко“ и годинава реализираше појадок со пациенти на Клиниката за онкологија во Скопје. На штандот, случајните минувачи можеа и да добијат повеќе информации за тоа што ги интересира. Од настанот, меѓу другото, беа побарани и современи терапии, а беше споделено и дека на скен на коски во моментов чекаат 100 пациентки со приоритетни упати препратени на испитување поради продолжеток на терапија. Според одговорот од институцијата, станувало збор за немање изотопи. - Денешниот настан е појадок со онколошките пациенти, што го организира Здружението „Хема-онко“ по вторпат, минатата година беше за првпат. Тука сме за да ги поддржиме оние пациенти кои лежат овде на Клиниката, да знаат дека не се сами, како и оние кои примаат терапија. Во меѓувреме, ќе продолжиме да работиме на проблемите што онколошките пациенти ги имаат во лавиринтот што е здравствениот систем во Република Македонија, нагласи Ана Марјановиќ. Како што појасни таа, имало напредок, но, тој бил толку мал, дури и незабележителен. Таа подвлече дека важна е соработката со Онкологија и со Министерството за здравство, како што тоа го прават светски земји, бидејќи само доколку комуницираат, не само со пациентите, пред се со онколошките здруженија, ќе знаат во кој правец да се движат промените и како до подобро здравство. - Последните информации се дека на скен на коски во овој момент чекаат 100 пациентки кои се од Онкологија со приоритетни упати препратени на тоа испитување поради продолжеток на терапијата. Што значи, додека испитувањето не се направи, тие се без терапија, а тоа како што знаеме, само понатаму го комплицира нивното лекување. Проблемот што е посочен од институцијата, е, дека немаат изотопи. Јас штотуку ја споделив таа информација и со министерот. Два месеца отприлика се чека, тоа е информацијата што јас ја имам, нагласи Марјановиќ. Таа појасни дека тоа значи оти пациентките се испратени од Онкологија, меѓутоа не можат да бидат снимени бидејќи нема изотопи. - Тоа е една од ретките клиники каде има ред. Апсолутно, додека имаат изотопи, оди регуларно, по протокол. Доколку имате потпис од онкологот и печат, дека сте приоритетен, само тогаш добивате предност, додаде Марјановиќ. Министерот за здравство Арбен Таравари изјави дека првпат слуша оти недостасуваат изотопи. Тој нагласи дека како Министерство за здравство, ќе видат во што е проблемот и како може да се реши. - Патофизиологија, што воопшто не е под Министерство за здравство, туку е под Медицински факултет и под Министерство за образование, но, секако повторно ние треба да интервенираме и да видиме што можеме да направиме. Добро е што ја добив оваа информација. Ќе видам во следните денови што можеме како Министерство да помогнеме, најави Таравари. Тој се заблагодари на сите оние кои допринеле за да се подигне свеста за ракот на дојка. Потсети дека октомври е месец за борба против рак на дојка. Министерот информираше дека минатата година испитувања за превенција од рак на дојка биле направени околу 5.000, а годинава, досега, до втора половина од октомври - над 9.000 испитувања. - Овде повеќе мислам најверојатно на ехо на града, можеби некои од овие пациенти и мамографија, појасни тој, нагласувајќи дека сепак, никогаш не е доволно. Целта, годинава било да се постигне бројка од околу 13 илјади. - Јас мислам дека Македонија е земја каде најмалку се чека за магнетна и за мамографија во однос на државите околу нас. Зборуваме секогаш за регионот, не зборуваме за светските држави, додаде Таравари. Милица Кузмановска од „Хема онко“ нагласи дека Здружението има намера и понатаму да работи и да ги промени работите во нашиот здравствен систем. - Што се однесува до терапијата, бараме нови терапии како што има во сите развиени европски, светски земји, бараме нови терапии за нашите пациенти, современи терапии, современ начин на скрининг и на дијагностика, истакна Кузмановска, меѓу другото, во изјава за медиуми пред Клиниката за онкологија....

Претседателот на СОНК, Јаким Неделков вели дека вчерашниот демант од Синдикалната организација на СОНК при Зоолошката градина - Скопје е креиран од вработените во Зоолошката кои, иако постапиле согласно сите протоколи, биле изложени на јавен линч. Како што изјави денеска Неделков, одговорајќи на новинарски прашања, овие вработени се сомневаат дека објавата на која реагирале е всушност на Град Скопје, како и дека многу работи воопшто не кореспондираат со вистината. -Демантот е креиран од вработените кои учествуваа во настанот квалификуван во јавноста како немил и хорор. Тие се почувствуваа како да се поставени на линч од јавноста. Вработените реагираат за незаконското снимање и објавување фотографии и видеа за кои дополнително, со коментари и текст, јавноста беше поттикната за таквиот однос кон нив, рече денеска претседателот на СОНК, Јаким Неделков во врска со вчерашната објава на Синдикалната организација на СОНК при Зоолошката градина - Скопје со која се демантира соопштението на Зоолошката споделено на нејзината официајлна фејсбук страница. Особено истакнуваат дека постапиле согласно закон, согласно напатствијата на АХВ и согласно сите домашни и европски протоколи. Ништо не направиле спротивно на правилата, прописите и протоколите. На сметка на тоа, се најдоа на јавен линч, рече Неделков по прес-конференцијата на ККС. Тој објасни дека човек што се претставил дека доаѓа од Град Скопје снимал и давал отпор пред полициските службеници кои се обиделе да го спречат да го прави тоа. -Тој од сила на власт на Град Скопје се спротивставил и кажал дека тоа може да го прави и има право да го прави. Тоа се тие некои внатрешни препукувања меѓу Зоолошката градина и Град Скопје кои траат веќе неколку години. Можеби на две раце се бројат директорите кои се назначени и експресно сменети, со еден куп трагични загинувања, угинувања на животни со што оваа, за нас многу значајна институција, се става на маргините на нејзиното функционирање, се на грбот и на сметка на вработените кои трпат огромна штета, истакна Неделков. На својата фејсбук страница Неделков вчера го сподели демантот од Синдикалната организација на СОНК при Зоолошката градина - Скопје во кој се наведува дека се неточни информациите изнесени претходно во соопштението на Зоолошката, објавено на 20 октомври 2024. Според демантот, направен е упад на фејсбук страницата на Зоолошката каде ова соопштение е објавено....

Унгарскиот премиер Виктор Орбан вечерва ќе го посети Париз, каде ќе има работна вечера со францускиот претседател Емануел Макрон, соопшти портпаролот на Орбан, Берталан Хаваси. На средбата ќе се разговара за подготовките за следниот самит на ЕУ што ќе се одржи во Будимпешта и за самитот на Европската политичка заедница, како и за билатералните односи во областа на енергетиката, одбраната и транспортот, пренесоа француските медиуми. Кабинетот на претседателот на Франција соопшти дека вечерата, која се одржува во рамки на унгарското претседателство со ЕУ, ќе почне во 20 часот и 30 минути....

Градоначалникот на општина Гази Баба Бобан Стефковски денеска бил во населеното место Црешево каде што е изградено ново детско катче со најсовремени реквизити за детска забава. -Местото на кое е изградено новото детско забавно катче многу често во минатото претставуваше простор на кој се создаваше дива депонија, а истото денеска е комплетно уредено со павер елементи, поставена е урбана опрема и изградено е ново детско забавно катче, рекол градоначалникот Стефковски. Како што велат од Општина Гази Баба, ова е 50 по ред, детско забавно катче кое општината го има изградено во изминатите три години од мандатот на градоначалникот Стефковски. Детски забавни катчиња во минатото биле изградени во Автокоманда, Железара, Керамидница, Триангла, Маџари, Ченто, Стајковци, Инџиково, Трубарево, Гоце Делчев, Колонија и други населени места....

Министерката за финансии Гордана Димитриеска-Кочоска од денеска до 26 октомври ќе престојува во Вашингтон, каде што ќе учествува на редовните Годишни средби на Меѓународниот монетарен фонд и Светска банка, а ќе реализира средби и со високи претставници на овие две меѓународни финансиски институции, со претставници на Трезорот на САД, како и билатерални средби со свои колеги, соопшти Министерството за финансии. Во рамки на Годишните состаноци, министерката Димитриеска-Кочоска ќе се сретне со директорот на ММФ за Европа Алфред Камер, извршниот директор на ММФ Пол Хилберс, алтернативниот извршен директор Лук Дресе, како и со Жероен Клик, кој треба да ја преземе фунцкцијата извршен директор и Марникс ван Рај, кој ќе биде алтернативен извршен директор во ММФ. На средбите ќе присустувва и Анет Кјоб, шеф на Мисијата на ММФ за РС Македонија. На состаноците ќе бидат истакнати преземените чекори во насока на стабилизирање на јавните финансии, како и плановите за фискална консолидација и обезбедување економски раст. Со високи претставници на Групацијата на Светска банка ќе стане збор за продолжување на конитуираната соработка и поддршката што ја добива земјата во изминатите години. Средби се планирани со потпретседателката на Светска банка Антонела Басани, извршниот директор на Светска банка Јуџин Ругенат, како и директорката на Светска банка за Западен Балкан Шиаочин Ју. За време на престојот предвидени се средби на министерката и со Алфонсо Гарсија Мора, регионален заменик-претседател во Меѓунардоната финансиска корпорација – ИФЦ, со претставници на Трезорот на САД, на која ќе биде потврдена поддршката што ја добива Министерството за финансии во реализација на своите програмски определби, како и со претставници на финансиски институции со кои земјава има соработка во процесот на издавање еврообврзници. Министерката Димитриеска-Кочоска за време на работниот престој во Вашингтон ќе има средба со македонската дијаспора во САД, на која ќе има можност да поразговара за начинот на кој тие живеат и делуваат во американското општество, како и политиките кои ги спроведува новата Влада коишто се во насока на зајакнување на врските со иселениците. На годинашните редовни средби, на кои министерката за финансии учествува заедно со гувернерката на Народната банка Анита Ангеловска-Бежоска, ќе се дискутира за светската економска перспектива, глобалната финансиска стабилност, стимулирање на економскиот раст, влијанието на климатските промени, како и со економските предизвици. Годишните средби на ММФ и Светска банка се одржуваат секоја година во октомври и отвораат можност за дијалог за актуелни теми во глобални рамки помеѓу министри за финансии, гувернери, претставници на бизнис-заедница, граѓански сектор, академици и слично, стои во соопштението од МФ....

Посетителка во скопската Зоолошка градина побарала да се тестира за птичји грип. Информацијата за МИА попладнево ја потврди директорката на Институтот за јавно здравје, Марија Андоновска. Жената прво отишла на Инфективната клиника, од каде ја препратиле во Институтот за јавно здравје. Таа била тестирана и се чекаат резултатите од тестот. Директорката Андоновска за МИА вели дека нема простор за паника кај граѓаните. Штом вработените кои секојдневно биле во контакт со животните во Зоолошката се негативни на тест за птичји грип, многу мали се шансите некој од посетителите да го има вирусот. Претходно, и директорот на Клиниката за инфективни болести и фебрилни состојби во Скопје, Фадил Цана во куса изјава за МИА, посочи дека нема простор за паника кај граѓаните, кога е во прашање птичјиот грип. Тој нагласи дека како што е состојбата моментално, нема простор за паника ниту кај сезонскиот грип, а камоли кај птичјиот....

Судскиот совет на 10 октомври донел дисциплинска мерка јавен укор за судијата Јованка Спировска-Панева, со што потврдил дека таа незаконски и забранила на јавноста да го следи соочувањето на рочиштето помеѓу бизнисменот Кочо Анѓушев и новинарката Сашка Цветковска за случајот „Фероинвест против медиумот ИРЛ". Ова денеска го соопшти Здружението на новинарите на Македонија кое на 19 октомври минатата година поднесе претставка до Судскиот совет, барајќи одговорност од судијата Спировска-Панева поради тоа што ги спречила новинарите да ги информираат граѓаните за судскиот процес и на тој начин ја исклучила јавноста од рочиштето од тој случај. Драган Секуловски, извршен директор на ЗНМ, на прес-конференција денеска нагласи дека се работи за значајна одлука на Судскиот совет која е „важен чекор за слободата на медиумите и безбедноста на новинарите во Македонија“. Тој ја соопшти одлуката на Судскиот совет во која се истакнува дека: „исклучувањето на јавноста за време на судските рочишта е груба повреда на транспарентноста и правото на информирање, што е од суштинска важност за слободата на медиумите. Оваа постапка на судијата Спировска Панева се смета за сериозна професионална грешка и директен напад врз медиумските слободи во спротивност на Законот за парнична постапка“. - Оваа одлука е пресвртница за медиумската заедница. Испратена е јасна порака дека слободата на информирање мора да биде заштитена. Истовремено, ова е чекор кон гарантирањето на транспарентноста на судските постапки и дека законите мора да се почитуваат од сите судии... Многу е ретко да се исклучи јавност, тоа е елементарна работа што судијата мора да ја овозможи, не заради новинарите туку самите граѓани да имаат пристап... Можеби за некого ова не е голема работа, но јас сметам дека е, зашто ретко се случува Судскиот совет да има ваков тип на дисциплинска мерка против судија, а речиси никогаш не се случило за постапка во која биле вклучени новинари. И затоа ние не го гледаме ова како една одлука туку го гледаме како принцип, рече Секуловски. Посочи дека ЗНМ активно учествувало на сите четири расправи пред Комисијата составена од тројца судии, презентирајќи, како што рече, релевантни докази што го потврдуваат неправилното постапување на судијата. -Одлуката на Судскиот совет покажува дека безбедноста и слободата на новинарите се од суштинско значење за демократските процеси, a транспарентноста на судските власти е неопходна. ЗНМ вложи многу напори во овој случај, и конечната одлука е потврда за значењето на јавниот интерес и правото на информирање од судски рочишта, што треба да биде порака кон сите судии. Освен ова, оваа одлука на Судскиот совет ќе служи како поттик за судските власти во иднина да ја препознаат и заштитат важноста на слободата на изразување и јавниот интерес, рече Секуловски. Случајот се однесува на сторијата „Заговор против воздухот", објавена на 24 октомври 2023 година од Истражувачката репортерска лабораторија (ИРЛ). -Реакциите по овој случај доведоа до протести од страна на новинарите и медиумските работници, кои јавно го изразија својот револт против неправдите. Исто така, пресудата против ИРЛ, со која судот си додели улога да одредува кој смее, а кој не смее да биде новинар, предизвика бурни реакции од страна на Европската федерација на новинари, додаде извршниот директор на ЗНМ....

На манифестацијата „Годишни награди за режисерите“, која се одржа во Нови Сад, на истакнатиот македонски режисер Столе Попов му беше врачена наградата „Живојин Жика Павловиќ“ за промоција на балканската кинематографија во светот. Како што соопштија од Друштвото на филмски работници на Македонија, наградата му ја врачи легендарниот актер Предраг Мики Манојловиќ, откако воведно обраќање имаше Ненад Павловиќ, и самиот режисер по професија и син на Жика Павловиќ. -Навистина е голема чест да се добие награда која го носи името на Живојин Павловиќ. Голем уметник, голем човек, фантастичен пријател и човек кој имаше големо разбирање за младите луѓе и кој беше една од најзначајните и најавтентичните личности не само на југословенскиот и балканскиот, туку и на европскиот филм. Неговите ставови и поимањето на естетиката на филмот беа блиски на моето убедување и токму тоа толку многу не зближи. Ова е навистина големо признание кое мене ми е подраго од сите награди што сум ги добил досега, рече Попов во своето емотивно обраќање. Предраг Мики Манојловиќ врачувајќи ја наградата посочи дека имал среќа да соработува и со Павловиќ и со Попов, се запознал со нивните семејства и смета дека врската меѓу нив двајца е природна, а филмскиот ракопис и израз им е сличен. Во рамките на манифестацијата „Годишни награди за режисерите“ се одржа конференција на Организацијата за заштита на авторските права и серии панели на Асоцијацијата на режисери од Балканот, на кои со останатите колеги од Балканот учествуваше Игор Иванов Изи, претседател на Друштвото на филмски работници на Македонија. Мисијата на оваа манифестација е на професијата режисер да и го врати интегритетот и независноста на авторските идеи и да се избори за професионални услови за работа и промоција на нивните дела....

Претседателката на Атлетската федерација на Македонија (АФМ), Александра Војнеска-Зикова како историски момент за овој спорт во нашата држава ја оцени организацијата Конвенцијата на Европската атлетска асоцијација. Скопје од 24 до 26 октомври ќе биде домаќин на Конвенцијата на која присуство најавија 49 претставници на европски федерации, како и на изборот на најдобар спортист на Европа во атлетскиот спорт – „Golden Tracks 2024“. - Сето она што ние како федерација го работиме во структурите на Европската федерација беше препознаено, најпрво преку организацијата на Европскиот куп трета лига 2019, потоа со нашето имплементирање во структурите во советот и телата на самата асоцијација допринесуваме и се трудиме активно да ја промовираме нашата држава, да го издигнеме нивото на атлетиката а со тоа и на спортот. За нас ова организација на Конвенцијата претставува историски момент. Верувам дека со поддршката што ја добивме од Министерството за спорт и Европската атлетска асоцијација целиот овој настан ќе помине во најдобар ред, истакна Војнеска-Зикова на денешната прес-конференција. - Да се добие ваква организација воопшто не е лесно. Ова е голем плус. Ние како Министерство за спорт секогаш ќе стоиме зад вакви проекти. За нас е важно да ја претставиме Македонија на едно високо ниво. Верувам дека Атлетската федерација ќе биде одличен домаќин на настанот. Спортската дипломатија игра клучна улога во зајакнувањето на меѓународните врски и соработка, не само во спортот, туку и пошироко, изјави Ристовски. Претседателот на Европската атлетска асоцијација Добромир Карамаринов рече дека Конвенцијата во Скопје се одржува во време кога атлетиката има високо ниво на популарност. Тој се надева дека настанот ќе помине во најдобар ред, а доказ дека атлетските федерациите во Европа не се делат на мали и големи е токму доделувањето на организацијата на АФМ. Специјален гостин на Конвенцијата во Скопје ќе биде Лорд Себастијан Коу, претседател на Светската Атлетска Асоцијација и поранешен член на британскиот парламент, носител на олимписки, светски и европски златни медали, член на бордот на Интернационалниот олимписки комитет (ИОК), а од пред една недела и официјално еден од кандидатите за нов претседател на ИОК на претстојните избори во март наредната година....

Додека пратеничката Тренчевска држеше прес конференција оквалификувајќи ги мерките на владата како мерки што не дале резултат, излезе соопштение во која што синдикалната кошничка на синдикатот ССМ укажа на тоа дека мерките на владата кој што се во моментот на сила дале резултати и цената на храната за еден месец е намалена за 935 денари. Она која што е важно да се нагласи е дека економијата е суштинско сериозна тема која што бара систематски пристап, а никако пристап на технички така наречени грешки во кој што се промашуваат процентите за покачување на минимална плата и веднаш по тоа се аплицира тоа кој што е кажано во собранието. Она која што е важно да се каже дека целокупната синдикална кошничка се има намалена за 57 денари, но доколку ги видите контрибуторите во синдикалната кошничка, ќе видите дека поскапувањето односно драстичното не намалување не доаѓа заради мерките кои што се од владата току заради поскапување на цената на облеката, додека оние мерки кои што се превземаа со проширувањето на позитивната листа на лекови имаат дадено резултат. Исто и мерката за ограничување на бруто маржа како и стапување на сила законот за нефер трговски практики и за симнување на капацитетите кои што тие закони ке треба да ги контролираат апелираме до пратеничката група на СДСМ да станат по-сериозни да не се случуваат повеќе технички грешки, бидејќи еднаш беше таков случај со амандманите за ребаланс на буџетот, сега е по нив и втората техничка грешка заради тоа што во Собранието е потребна сериозна опозиција, а не опозиција која што за дневно политички теми исфрла памфлет закони кој што нема да го подобрат животот на работниците. Тоа што е нашата порака до нив е исто дека во наредниот период ќе пристигне и текстот на новиот буџет за 2025 година, таму има многу позитивни изненадувања за сите работници во Р. Македонија, без разлика дали се од приватниот или од јавниот сектор и нека припремат амандмани на начин на кој што може сериозно да го подобрат тој текст, а не да се пишуваат вакви закони кои што повторно ќе кажам немаат врска со реалноста....

Вработени во Јавното комунално претпријатие „Брегалница" Делчево во присуство на претседателот на СУТКОЗ Стојанче Кашикоски, денеска излегоа на мирен протест. Причина за протестот, како што истакна Дарко Гоцевски претседател на СО на СУТКОЗ при делчевското комунално претпријатие, е да го искажат својот револт, заради, според него, доведувањето во прашање на егзистенцијата на вработените, кои не можат да си ги остварат единствените законски права од работен однос, односно не добиваат плата. Како единствен репрезентативен синдикат во комуналните дејности СУТКОЗ, како што кажа Гоцевски, бил и ќе остане заштитник на работничките права и затоа од градскиот парк каде се одржа најавениот протест јавно побараа одговор од страна на градоначалникот на Делчево, Горан Трајковски на нивните барања. - Бараме редовна исплата на платите на вработените со цел да не се доведе во прашање нивната егзистенција и загрозување на здравјето на истите поради немање на здравствено осигурување. Да престане со деструктивната политика кон ЈКП Брегалница и да почне редовно да ги сервисира обврските кон претпријатието, Бараме уште на оваа седница на Совет да биде ставена точката на дневен ред која уредно во законски предвидениот рок, јас како претседател на СО на СУТКОЗ при ЈКП Брегалница Делчево, беше доставена до сите релевантни страни. Бараме итно разрешување на раководниот кадар на ЈКП Брегалница од причина што неговото недомаќинско работење го доведе претпријатието во вака тешка состојба, рече Гоцевски. Синдикалната организација на СУТКОЗ при Јавното комунално претпријатие „Брегалница", согледувајќи ја настанатата ситуација во јавното комунално претпријатие, а согласно законската регулатива, општиот колективен договор за комунални дејности, Општиот колективен договор за вработени во јавниот сектор и статутот на СУТКОЗ, побараа истотака од страна на градоначалникот Трајковски да донесе одлука за покривање на загубите од рабоетењето на ЈКП Брегалница- Делчево, како основачи на истото. - Бидејќи одлуките за избор на директор, за членови на Надзорен одбор и членови на Управен одбор при ЈКП Брегалница се во ваша надлежност, Вие како основач на претпријатието одговарате и сте должни, согласно закон, да ги надоместите загубите со цел непречено и навремено извршување на работите на претпријатието, а со оглед на обврските од својот делокруг на работа на претпријатието да го заштитите здравјето на жителите на Општина Делчево. Во спротивно доколку не постапите по ова Барање, свесно од ваша страна го ставате работењето на ЈКП Брегалница на милост и немилост, ќе ги оставите вработените без редовните примања кои се единствен извор за егзистенција на нивните фамилии, се додава во соопштението од протестот испратено до градоначалникот на Делчево. Претседателот на СУТКОЗ Стојанче Кашикоски додаде дека поради според него недомаќинското работење на комуналното претпријатие, како СУТКОЗ ќе ги преземат сите законски мерки кои им стојат на располагање и со нивниот правен тим ќе им помогнат да ги земат своите плати кои ги имаат заработено. Во писмениот одговорот од делчевскиот градоначалник Трајковски кон претставниците на СУТКОЗ и нивното доставено барање тој ги извести дека согласно законот Управниот одбор на јавното претпријатие е тој, кој одлучува за употребата на средства остварени со работењето на јавното претпријатие и покривањето на загубите. - Дополнитено членот 30 од Законот за јавните претпријатија на кој се повикувате во самото Барање за покривање на загуби, исклучиво се однесува на вишокот на средства остварени од работењето на јавното претпријатие врз основа на детални финансиски планови, во кој согласно став 5 јасно е пропишано дека основачот за вишокот на средствата кои се уплатени во буџетот на општината или градот Скопје, може да донесе одлука да се покријат загубите на друго јавно претпријатие или да се уплатат на посебна сметка со намена за финансиска поддршка и развој за вршење дејност од јавен интерес на правно лице основано од општината или град Скопје, истакна Трајковски. Оваа одредба на која се повикуваат од СУТКОЗ, според Трајковски, во конкретниот случај е неприменлива бидејќи на сметката на општината ниту има уплатени средства по овој основ, ниту општината има друго јавно претпријатие со вишок на средства остварени од работење, за истите со одлука на основачот да ги покрие загубите на ЈКП, „Брегалница" Делчево. - Законот за јавните претпријатија јасно пропишува дека средствата за работењето и развојот на јавното претпријатие се обезбедуваат од приходите кои тоа ги остварува со сопственото работење, од кредитните средства и од други извори во согласност со закон. До денес општина Делчево како основач на ЈКП, Брегалица" Делчево има отстапено на користење голем број движни и невижни ствари, има аплицирано и добивано проекти кои заедно со јавното претпријатие се реализираа се со цел непречено функционирање и вршење на дејностите што се од јавен интерес, меѓутоа општината работи со определен лимит на парични средства кои се неопходни за нормално функционирање на основните задачи и дејности и не е во можност да обезбеди парични средства по овој основ, додаде Трајковски во писмениот одговор. Како синдикална организација при ЈКП „Брегалица" Делчево, Трајковски напомена дека СУТКОЗ треба да ги штити правата на вработените согласно законите и колективните договори во рамките на претпријатието спогодбено, со цел да се намалат судските и извршните постапки кои дополнително ги зголемуваат трошоците на јавното претпријатие и го доведуваат претпријатието до блокирана сметка. Во однос на протестот, директорот на делчевското Јавно комунално претпријатие Стојче Стојчевски изрази негово видување дека на собирот биле изнесени многу невистини од говорниците, од според него, само ним познати мотиви. - Плаќањата во ЈКП Брегалница Делчево се вршени во предвидените рокови секој месец, со само еден исклучок. Во текот на овој месец, се повеќе вработени во ЈП поднеле налози за итна наплата, а по овие налози блокирани се стотина сметки на ЈП за наплата средства за вршење на работите, но по претставка од вработените, вакво решение се одлучува по жалба подолго време, истакна Стојковски Сметајќи дека исплатата на плати и надоместоци има приоритет пред присилната наплата на други побарувања, тој има поднесено изјава за исплата на плати на вработените до УНИ банка и во Делчево и лично до архивата во седиштето во Скопје, за што приложи и соодветен документ. - Тие не одговорија на нашето писмено барање и не го реализираа. Очекуваме во најкраток можен рок надлежните судови да донесат одлука за утврдување на минималните средства со кои веднаш ќе се исплати платата за месец септември 2024 година.Друга работа што треба да се забележи, додека директорот нема никакви барања во писмена форма. А за квалификациите и заканите кон мене не ги коментирам, сите се знаеме во Делчево, додаде Стојковски заклучувајќи дека ги разбира барањата на вработените за исплата на плата и дека се прават сите напори истата што побрзо да може да се исплати Претседателот на Советот Гоце Попов, на денешната Седница пред советниците рече дека ќе се разговара на таа тема и на самиот Совет, но по разгледувањето на состојбата од страна на Управниот одбор во претпријатието, кој е најповикан за согледување на состојбите во претпријатието, а потоа по уредното доставување, точката со сите потребни податоци може да се најде на дневен ред на следната седница. Доколку не се прифатат барањата во најкус можен рок, СУТКОЗ како што беше заклучено на денешниот протест, ќе ги превземе сите можни законски мерки за исполнување на правата од работен однос и ќе побара кривична одговорност од надлежните институции за раководната структура на претпријатието....

Просечната месечна исплатена нето-плата по вработен, во август 2024 година, изнесувала 41 097 денари, што е за 12.9 отсто повеќе во споредба со истиот месец лани, соопшти Државниот завод за статистика. Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Образование (18.9 %), Уметност, забава и рекреација (18.8 %) и Јавна управа и одбрана; задолжително социјално осигурување (17.0 %). Зголемување на просечната месечна исплатена нето-плата по вработен, во однос на претходниот месец, е забележано во секторите: Уметност, забава и рекреација (5.3 %), Земјоделство, шумарство и рибарство (4.2 %) и Објекти за сместување и сервисни дејности со храна (3.2 %). Просечната месечна исплатена бруто-плата, пак, во август годинава, изнесувала 61 806 денари....

Министерот за здравство Арбен Таравари најави дека започнале со децентрализација на Клиниката за онкологија и целта е да функционира како Институтот за трансфузиологија, прашан што се сменило во интерес на пациентите, по една година откако изби скандалот во врска со Онкологија. - Ние започнаваме со децентрализација на Онкологија. Се работи во болницата „8 Септември“. Одреден кадар веќе се обучува тука на Онкологија и целта ни е да направиме мрежа што ќе биде контролирана од Клиниката за онкологија. Значи „8 Септември“, веќе се надевам за месец ипол ќе почне и таму да се дават терапии, тоа ќе го промовираме. Во Тетово веќе се дава, во Битола се дава, во Штип се дава онколошка терапија. Полека - полека да започнеме со децентрализација, меѓутоа повторно да има некаква контрола од Клиниката за онкологија. Практично да функционра како Институтот за трансфузиологија. Центарот е во Скопје, меѓутоа има филијали секаде, појасни министерот. Тој рече дека сѐ уште не го добил последниот ревизарски извештај за Онкологија. Директорот Игор Стојковски кажа дека тие го добиле и заедно со тимот имале предвидено акционен план. Ќе се постапувало по препораките во ревизорскиот извештај. Прашан околу дозволата за вработување, затоа што имало ургентни вработувања, директорот рече дека административната процедура е почната. Ја опиша како доста комплексен процес и оти сѐ зависело од МЗ, МИОА и МФ. На новинарско прашање каков кадар ќе се вработува, тој нагласи дека ќе биде од сите профили. - Значи имаме медицински сестри, лекари, медицински технолози, административен кадар, околу 50 е бројката, одговори Стојковски...

Судењето за случајот „Организатори на 27 април“ е презакажано за 14 ноември годинава, откако изутрината обвинетите Спиро Ристовски, Трајко Вељаноски и Миле Јанакиевски, преку адвокатот Еленко Миланов поднесле барање до Основниот кривичен суд на денешното рочиште да одлучи по поднесокот за амнестија без да се изведуваат материјални и вербални докази. Претседателот на Судечкиот совет, судијата Илија Трпков, информираше дека во поднесокот обвинетите навеле дека потребно е Судот да донесе решение за примена на Законот за амнестија, бидејќи веќе има воспоставено таква пракса, односно Кривичниот совет во 2018 година има донесено решение за амнестија во тек на главна расправа, во фаза на доказна постапка, каде не се чекало завршување на доказната постапка. – Во прилог е доставено решение на Кривичен совет, Одделение за организиран криминал и корупција, од 20.12.2018 година со образложение дека решението било донесено во текот на главна расправа, во фаза на доказна постапка и не се чекало завршување на доказна постапка. На Јавното обвинителство ќе му доставам примерок од ова решение, како и примерок од поднесокот… Јас го разгледав поднесокот и вистина е дека донесено е решение за амнестија во текот на доказна постапка, не само за обвинетиот во наведениот случај, туку и за други обвинети, меѓутоа јавниот обвинител нека се произнесе и нека даде мислење, со оглед на тоа дека овој поднесок го примивме во текот на денешниот ден, посочи судијата Трпков. Обвинети во овој предмет се поранешниот претседател на Собранието, Трајко Вељаноски, екс министрите за транспорт и врски и за образование, Миле Јанакиевски и Спиро Ристовски, како и поранешниот директор на УБК, Владимир Атанасовски. Тие се товарат дека сториле кривично дело „терористичко загрозување на уставниот поредок и безбедноста“. Апелацискиот суд во април годинава ја укина првостепената пресуда од јули 2021 година, со која Вељаноски беше осуден на шест и пол години затвор, екс министрите Јанакиески и Ристовски добија казна од 6 години и три месеци затвор, додека поранешниот директор на УБК Атанасовски шест години затвор, и предметот го врати на повторно судење. Процесот го води судијата Илија Трпков, а застапник на обвинението е јавната обвинителка Искра Хаџи Василева....

Министерот за здравство Арбен Таравари, одговарајќи на новинарско прашање за случајот со починатото 14-месечно бебе во Скопје, изјави дека добро е што Клиниката за педијатрија презема одреден чекор и изрази надеж оти „ќе се разбуди совеста кај менаџментот на болницата во Козле“. - Ние ги резгледавме со екипата со правната екипа во Министерството, сите наши можности. Добро е што Клиниката за педијатрија презема одреден чекори и се надевам ќе се разбуди совеста кај менаџментот на болницата во Козле. Ќе дадеме официјално до Лекарска комора, таму има етичка комисија што треба да одлучува. Наши препораки ќе има, извештајот е тука. Доколку не веруваат на извештајот, нека си направат свој, меѓутоа, дека има одреденни пропусти, лекарски, има, одговори Таравари по изјавите за медиуми денеска пред Клиниката за онкологија. Тој смета дека добро би било сите заедно да дадат одреден сигнал до граѓаните да почнуваат да веруваат во системот. Претходно, министерот рече дека се надева оти двајцата директори ќе преземат некакви мерки. Министерот подвлече дека очекува од нив да има некаква одговорност. Директорот на Универзитетската клиника за детски болести во Скопје, Реџеп Мемеди околу случајот со смртта на 14-месечното бебе, донесе решение за времено отстранување на двајца здравствени работници - доктори специјалисти од здравствената установа, за кои се води дисциплинска постапка, согласно член 192 став 2 од Законот за здравствена заштита, до донесување на конечно решение во дисциплинската постапка...

Ќе имаме две компресорски станици, нова и сервисирана. Ова го соопшти денеска министерот за здравство Арбен Таравари, кој одговараше на новинарски прашања пред Клиниката за онкологија. - До крај на јануари треба да заврши компанијата. Се работи, компанијата што е задолжена. Така да, да се надевам дека ќе имаме не една, туку две компресорски станции. Една нова и една сервисирана, што ќе ни служи како „бекап“, евентуално ако не функционира едната, веднаш да се активира другата, подвлече Таравари. Во мај, операциони сали на Клинички центар беа затворени поради непријатна миризба. За итни интервенции, пациентите се упатуваа во Универзитетската клиника за хируршки болести „Свети Наум Охридски“ и во Градската општа болница „8 Септември”...

Сакам повторно да нагласам дека како директор на Универзитетската Клиника за респираторни заболувања кај децата Козле веднаш формирав стручна комисија на клиниката која го разгледа целиот случај и не најде никаков лекарски стручен пропуст во третманот, следењето и лекувањето на пацентот. Веднаш потоа се состана во два наврати и стручниот колегиум кој се согласи со извештајот на комисијата на клиниката (во прилог е доставен детален извештај од клиниката со бројна медицинска документација која сведочи за превземената лекарска грижа, истата е доставена уредно и до министерството за здравство и во лекарската комора). Уште еднаш би сакала да информирам дека пациентот во нашата клиника е веднаш прифатен, направени се бројни анализи, поставен на терапија според интерните протоколи на клиниката, постојано следен, мониториран и под кислородна подршка која е контролирана и мониторирана а поради невообичаеното рапидно и прогресивно влошување на состојбата на детето, истото беше препратено на КДБ по претходен договор и најава со дежурниот педијатар, со организиран транспорт на ИМП во придружба на лекар и медицинска сестра, во согласност со интерниот протокол за префрлување на болно дете во друга институција за продолжување на лекувањето. Стручната комисија како и едногласноста на колегиумот се мој императив дека во нашата клиника е превземено се во третманот на детето. Истовремено сакам да информирам дека како директор на оваа клиника во тек на само 2.5 месеци превземени се сериозни организациски чекори, план и првична програма за реорганизација на одделот за интензивна нега и терапија, според законските прописи дадени од АКЗУМ. Унапредување на одделот со детален план за доопремување со апаратура за неинвазивна и инвазивна респираторна подршка и веке е договорен тим на лекари специјалисти кои ќе бидат испратени на адекватна обука. Клиниката за респираторни заболувања кај децата, Козле поседува интерни клинички протоколи според Медицината базирана на докази кои се спроведуваат децении наназад кај сите наши пациенти. Доктор Каролина Симоновска - директор и стручен колегиум на ЈЗУ Универзитетска клиника за респираторни заболувања кај децата, Козле...

поред податоците на Државниот завод за статистика, во 2023 година, вкупното бруто-примарно производство на енергија во Република Северна Македонија изнесувало 936 031 toe или 34.7 % од вкупно потребната енергија. Вкупната потребна енергија за 2023 година изнесувала 2 698 648 toe. Најголеми финални потрошувачи на енергија во 2023 година се: сообраќајот со 44.1 %, домаќинствата со 25.8 % и индустријата со 17.9 % (од расположливата финална потрошувачка)...

Во местото Комарно, на словачко-унгарската граница, денеска почна трилатералната средба на српскиот претседател, Александар Вучиќ, и кодомаќините премиерите на Унгарија, Виктор Орбан, и на Словачка, Роберт Фицо, на која централна тема ќе биде регионалната соработка и новите, иновативни решенија за запирање на илегалната миграција кон балканската рута. На состанокот учествуваат и министрите за внатрешни работи на трите земји, бидејќи главни теми на состанокот се заштитата на надворешните граници на Европската унија и зајакнувањето на регионалните соработка во оваа област. „Соработката на Европската Унија со земјите од Западен Балкан, особено со Србија, е еден од клучните фактори за подобрување на миграциската ситуација во Европа. Сржта на оваа соработка се мерките за подобра заштита на границите на балканската рута и помошта за земјите од Западен Балкан во однос на процедурата за азил или реадмисија во трети земји, како и усогласување на визната политика со политиката на ЕУ“, соопшти прес-службата на словачката Влада пред средбата. Словачкиот премиер Роберт Фицо, сака да разговара со претседателот Вучиќ и премиерот Орбан, пред сè, за нови, иновативни решенија базирани на примерот на соработката меѓу Италија и Албанија, каде што надвор од Словачка и Унгарија, мигрантите во трети земји ќе чекаат на прагот на ЕУ за да видат дали ќе добијат азил. Фицо и Орбан се меѓу најгласните поборници за зајакнување на надворешните граници на ЕУ, вклучувајќи ја и границата со Србија, за мигрантите од Србија воопшто да не преминуваат на тлото на ЕУ....

Продолжува периодот на стабилно и претежно тивко време со студени утра и утрински температури кои наместа ќе се спуштаат под нулата, најавуваат од Управата за хидрометеоролошки работи. По одделни котлини ќе има услови за појава на утринска магла или ниска облачност. Дневната температура ќе биде без значителни промени....

Политичката партија „Левица“ денеска поднесе кривична пријава против претседателот на Собранието Африм Гаши поради тоа што не ја исполнил својата деловничка обврска во врска со законот за бранители. Пратеникот Сашко Јанчев на прес-конференција во Собранието рече дека кривичната пријава е поднесена поради тоа што Гаши несовесно постапил во однос на своите овластувања и направил кривично дело против службената должност. - Законот за бранители е заглавен во собраниска процедура откако претседателот на матичната Комисија реши да не свикува сеница односно реши да го блокира законот. Во ваква ситуација, кога претседател на Комисија решава да не свикува седница по одреден закон, должност и надлежност на претседателот на Собранието е да ја одблокира законската постапка односно согласно член 126 став 3 од Деловникот, претседателот на Собранието е тој кој треба да ја свика Комисијата и да значи член кој ќе ја води седницата на таа Комисија. Претседателот на Собранието уште пред 10 дена на 16 септември во изјава за медиумите рече дека нема намера да го одблокира законот за бранители, дека нема намера да свика седница за законот за бранители и до денес таква седница не е свикана, посочи Јанчев. Изјавата на претседателот на Собранието дека со тоа што претседателката на Комисијата свикала седница во рамки на роковите, му се одзема правото да интервенира и да назначува друг член да ја води седницата, според Јанчев екстензивно толкување со цел законот за бранители никогаш да не биде ставен на дневен ред. - Деловникот е јасен - откако ќе поминат 24 часа, ако претседателот на Комисјата не одржи седница по одреден закон, претседателот на Собранието назначува друг член кој ќе ја одржи таа седница. Ова е екстензивно толкување со цел законот никогаш да не дојде на дневен ред, рече Јанчев. Законот за бранители е предложен од пратеничката од СДСМ и поранешна министерка за одбрана Славјанка Петровска. Законот ја доби поддршката во Собранието да оди по скратена постапка. Откако претседателката на Комисијата за социјална политика, млади и демографија Илире Даути не го стави законот на дневен ред, претседателот на Собранието во неговото образложение посочи дека нема ингеренции да назначи друг член за да се одржи седницата затоа што Даути ја свикала седница согласно роковите. - Деловникот во член 126 не вели дека „ако претседателот на комисијата одбива да стави конкретен закон“, туку „ако претседателот на комисијата не свика седница“. Со тоа што Илире Даути свика седница во рамки на роковите, не можам да свикам, Деловникот ми го одзема правото да интервенирам и да назначам друг пратеник да ја води седницата. Во овие четири месеци увидовме неколку недоречености како овој со Законот за бранители, како двојната функција на Талат Џафери, и уште неколку други прашања кои наскоро планирам да ги решиме преку комисијата за деловнички прашања - тие да одлучуваат и да носат заклучоци за следната измена на собранискиот Деловник, изјави Гаши на 16 септември во телевизиско гостување на Канал 5...

Виктор Димовски беше член на ИО на СДС, долги години беше во голем број партиски комисии и совети. Тој на чело на АНБ дојде како чисто партиско решение. СДС наместо да ја професионализира службата, ја партизираше, дополнително на тоа шиканираа професионалци и избркаа од АНБ се што не е во нивната матрица. СДС спроведе хајка во службите, и наместо институции за почит, добивме институции на кои им се случија низа пропусти како издавање пасоши на над 20 нарко босови од регионот и светот, кое траело со години, без никој да го примети или спречи. Видовме кои се последиците од лошото владеење на СДС со државата и управувањето со службите. Заврши времето на партизација на службите. Следува ново време на промени и професионализација....

Дипломатската патна исправа на претседателот на ФФМ, Муамед Сејдини е повлечена од страна на Министерството за надворешни работи и надворешна трговија, потврдуваат за МИА од МНРиНТ. Од министерството, напоменуваат дека од стапување во функција на новата Влада, до денес повлечени се вкупно 230 дипломатски патни исправи. -Дел од наведените патни исправи биле дадени врз основа на дискреционо право на претходниот министер, а дел се однесуваат на поранешени функционери на кои им престанале мандатот и правото за поседување дипломатска патна исправа, се вели во одговорот на МНРиНТ....

СДСМ го поднесе Законот за зголемување на минималната плата во Собранието. Со оваа мерка предвидуваме минималната плата да се зголеми на 27.700 денари, односно 450 евра. Ова не е само бројка, ова е чекор кон подобра иднина за секој работник, за секој кој се бори да обезбеди подобри услови за своето семејство. Нашите сограѓани секојдневно се соочуваат со се поголеми економски предизвици. Цените на основните производи растат, куповната моќ опаѓа, а многу семејства едвај врзуваат крај со крај. Граѓаните не се само статистика, зборуваме за вистински животи, за родители, за млади, за возрасни сограѓани кои секојдневно се борат да обезбедат достоинствен живот за своите семејства. Токму затоа, зголемувањето на минималната плата е итно и неопходно. Жалиме што Владата на ВМРО-ДПМНЕ не ги слуша потребите на народот. Во време кога граѓаните се борат со високи цени и намалени приходи, Владата не презема ништо за да им помогне. Социјалната несигурност расте, платите опаѓаат, а потрошувачката кошничка веќе достигна огромни 61.306 денари. Ниту една од мерките на Владата за намалување на цените не даде резултати. Напротив, куповната моќ на граѓаните се намалува, и тие веќе не можат да си дозволат дури и основни прехранбени производи. Работниците, особено оние со најниски примања, се оставени на милост и немилост на пазарот. Почитувани пратеници, погледнете околу нас во Србија, Црна Гора, Хрватска. Во соседните земји, минималната плата расте. Во Србија ќе биде 457 евра, во Црна Гора 700 евра, во Хрватска веќе е 677 евра. Нашите работници заслужуваат подобро, тие не се помалку важни од оние во соседството. Нивниот труд и посветеност мора да бидат вреднувани, и тоа сега. Време е да се погрижиме и да им обезбедиме животен стандард кој ќе им овозможи да живеат достоинствено. Работниците не треба да бидат жртва на политичките игри. ВМРО-ДПМНЕ веќе бланко го одбива нашиот предлог, но ние велиме – ова не е време за партиски интереси. Пратениците од ВМРО-ДПМНЕ треба да го преиспитаат својот став и да помислат на луѓето кои секојдневно се борат за подобар живот. Ова е првиот чекор кон покачување на сите плати и подобрување на стандардот на сите граѓани. Ги повикуваме сите пратеници, без оглед на политичката припадност, да гласаат за подобар животен стандард. Сега е време да се издигнеме над партиските разлики и да направиме нешто вистински важно за граѓаните. Секој глас за овој закон е глас за подобар живот за илјадници работници и нивните семејства. Нема ништо поважно од тоа! Да се обединиме во оваа борба и заедно да донесеме поголема минимална плата. За подобар живот, за достоинствен труд, за иднината на нашите деца....

Вредноста на Синдикалната минимална кошница за месец октомври 2024 година изнесува 61.249,00 денари, информираат од Сојузот на синдикати на Македонија. Со изнајмен стан од 60 м2 за октомври кошницата изнесува 76.624,00 денари. Споредено со вредноста на синдикалната минимална кошница за септември 2024 година која изнесуваше 61.306,00 денари е намалена за 57,00 денари. -Значајно е да се нагласи дека мерката на Владата за ограничување на висината на маржите даде дел од посакуваниот резултат, но, поради алчноста за профит кај трговците што Државата мора да го заузда, тие, кога разбраа за намерата на Владата за оваа мерка ги зголемија цените на сите производи, а ова го потврдуваме и со растот на вредноста на делот за храна и пијалоци во Синдикалната минимална кошница за повеќе од 717 денари за минатиот месец септември, а во истата во делот ка храна и пијалоци во месец октомври 2024 година која изнесува 22.069,00 денари споредено со месец септември 2024 година ( 23.034,00 денари) е намелана за 965,00 денари, велат од ССМ. Според нив, ова потврдува дека цените треба уште да се намалуваат, а нивното зголемување нема никаква поврзаност со економската логика, ниту пак со здравиот разум, туку, како што велат, има поврзаност само со алчноста која е се поизразена во Македонија. Од ССМ сметаат дека при креирањето на мерките Владата треба да го вклучи синдикатот за тие да бидат подобри, имајќи предвид дека во последната мерка 47 категории на производи од 70, беа превземени од Синдикалната минимална кошница која ја подготвува ССМ, а за кои го имаат движењето на цените во секој месец од почетокот на годината. Од ССМ сметаат дека се потребни поголеми контроли и доколку е потребно и казни за несовесните трговци кои се богатат на грбот на работниците и граѓаните....

Националното студентско тело и студентскиот правобранител на Универзитетот „Св. Кирил и Методиј“ поднеле барање до Министерството за образование и наука за преразгледување на бројот на стипендии за студентите од општествените науки во Конкурсот за академската 2024/2025 година. Како што информираат, во барањето се истакнува намалувањето на бројот на стипендии за ова научно подрачје, кое се сведува на само четири стипендии, наспроти минатогодишните десет. -Оваа бројка е несразмерно помала во споредба со стипендиите за техничко-технолошките и природно-математичките науки, кои остануваат на високо ниво, иако минатата година биле пополнети само 24 од вкупно 40 предвидени стипендии за овие области. Со овој значителен пад на стипендиите за општествените науки, се ограничува можноста на студентите од оваа област да добијат неопходна финансиска поддршка за нивните студии. Дополнително, во годинашниот конкурс за стипендии се вклучени и студентите на интегрираните студии (3+2 години), што само го зголемува бројот на потенцијални кандидати од општествените науки, а истовремено намалувајќи ги шансите за добивање стипендија на сите што ќе аплицираат, наведува Студентскиот правобранител на УКИМ. Како решение студентските претставници предлагаат да се разгледа можноста за прераспределба на непополнетите стипендии од другите научни области, со што би им се овозможило на студентите од општествените науки да ги искористат овие средства. Ова, според нив, би овозможило фер и правична распределба на стипендиите. -Студентите очекуваат одговор од Министерството за образование и наука, надевајќи се на позитивен исход кој ќе биде во интерес на сите студенти од втор и трет циклус на студии, се наведува во соопштението....

Новите раководства на АД ЕСМ и на РЕК Битола работат исклучиво според позитивните законски прописи и нема да дозволат ниту најмал сомнеж за злоупотреби при спроведување на Законот за јавни набавки. Во контекст на јавната набавка за ангажирање на работна сила при потребата од машински интервенции во РЕК Битола, испочитувана е комплетната процедура. Согласно архивираноста на секој од документите кои се дел од предметната постапка, процедурата е спроведена во периодот пред да стапат на функција новите раководства на АД ЕСМ и на РЕК Битола. Јавниот повик бил објавен во мај годинава, и постапката за евалуација и избор на изведувачите е спроведена од претходното раководство на Комбинатот, вклучувајќи ја и Одлуката за избор потпишана на 22 август годинава од претходниот раководител на подружница РЕК Битола - Пеце Матески. Договорот е потпишан на 7 октомври од новиот раководител на подружницата, и тоа дури откако е направено испитување на пазарните цени во однос на оние од Одлуката за избор и констатацијата на стручните служби дека биле понудени односно избрани за најповолни - најниските цени достапни на пазарот во моментот. Имено, на актуелниот јавен повик од 2024 година, постигнати се единечни цени по работна рака кои се за околу 40 отсто пониски во однос на цените постигнати во 2022 и во 2023 година, согласно критериумот најниска цена. За изминатите две години, за истиот повик единствен понудувач била фирмата „Марковски Компани“, додека во 2024 година - биле пријавени пет фирми од кои четири учествувале на таканаречената „негативна аукција“ преку која била постигната најниска цена од страна на посочената фирма. Повторуваме дека станува збор за рамковен договор според кој се плаќа по ангажман, односно само доколку комбинатот - при одредени зафати има потреба од таков кадар. АД ЕСМ работи исклучиво според законите, и нема намера да врши политичка селекција на фирми кои учествуваат во сегментот јавни набавки. Секоја фирма и потенцијален оператор што се јавува на распишаните јавни повици е, и ќе биде предмет на детална проверка, согласно Законот за јавни набавки и според утврдените критериуми и правила за учество....

Шеесетгодишен жител од Струга е пријавен за исчезнат во реонот на селото Брчево, информира Планинската спасителна служба (ПСС) при Црвен крст Охрид. Според информацијата, нивна три члена екипа и водич на куче за пребарување од здружението „Куче спасител“ од Охрид, во координација со Струшката полиција, од утрово се на терен во обид да се лоцира исчезнатото лице. - Во текот на вчерашниот ден, доцна попладне во 18 часот и 38 минути оперативниот центар на Планинската спасителна служба беше алармиран од МВР секторот за потраги по исчезнати лица, дека во реонот на село Брчево, исчезнат е жител на Струга (60 годишна возраст), со потекло од селото, кој претходниот ден се упатил да собира шумски плодови и до 16 часот и 30 минути (според соседите од селото) не се вратил во својата викенд куќа, соопшти Планинската спасителна служба...

Навивачите на Вардар, Комити Запад, побараа смена на актуелното раководство на клубот. Тие се незадоволни од резултати на тимот во тековната сезона, како и од состојбата на клубот. Во продолжение во целост го пренесуваме соопштението на Комити Запад: Навивачите на фудбалскиот клуб Вардар, незадоволни од резултатите,организацијата и целосната катастрофална ситуација во која се наоѓа клубот, одлучија да се спротивстават, обединувајќи се во голем „НАРОДЕН ФРОНТ-ЗА ВАРДАР”. Како што е веќе познато, по финансискиот крах, клубот за време на изминатите две сезони беше целосно управуван од страна на здружението на навивачите, односно народот кој апсолутно даде поддршка на оваа приказни. Благодарение на нашата напорна работа, но и на помошта од страна на неколкуте Општини, Градот Скопје, како и на многуте компании кои ја видоа нашата искрена намера и се приклучија кон оваа борба, клубот успеа да опстои и по две сезони минати во Втората лига, да се врати во елитата. По завршувањето на минатата сезона, беше постигнат договор помеѓу Здружението ,,35 години Вардарци”, односно ВД раководството на клубот составено од искрени вардарци и навивачи на овој клуб и новата сопственичка структура, на чело со Атилла Бижен Жалили. Верувавме дека ваквиот расплет ќе донесе подобра иднина за клубот, финансиска стабилности дека ќе се воспостави вистински правец по кој ќе се движи клубот, секако незанемарувајќи ги основните постулати на борбата ,,за клубот на народот” за која деноноќно, волонтерски се бореа искрените Вардарови навивачи. Меѓутоа, неколку месеци подоцна, не само ние, туку и целата македонска јавност сведочи за катастрофалната ситуација, во која од ден на ден се повеќе тоне и клубот и приказната која со многу труд и љубов ја создаваа навивачите и народот. Причината за катастрофалниот тек на сезоната ја гледаме во лошата кадровска политика, односно во неформалното раководството на клубот, начело со Миленко Неделковски, кој заедно со својот тим, докажаа дека се во целост неспособни за да водат клуб каков што е големиот Вардар. Поучени од искуството и минатото во кое во неколку наврати сме биле обвинети за виновници, кои не дозволиле влез на нови сопственички структури, овојпат одлучивме да дадеме време и можност, како што од нас побара и самиот инвеститор, иако уште на самиот почеток го потенциравме нашиот сомнеж во капацитет на предложеното раководство. Но, за жал, веќе е и повеќе од јасно дека е потребна промена ВЕДНАШ. Оваа агонија мора да заврши час поскоро, а за тоа да се случи, потребна е масовна мобилизација на сите Вардарови навивачи, симпатизери, на целокупната јавност која ја повикуваме да се приклучи кон оваа борба и да застане повторно во одбрана на клубот. Во среда, на 23.10.2024, на Арената Тодор Проески во Скопје, ќе се одигра1/8 финалето од Купот на Македонија, помеѓу екипите на Вардар и ГФКТиквеш од Кавадарци. На овој натпревар, од западната трибина јасно и гласно ќе биде искажан ставот на навивачите. Затоа упатуваме апел до сите, да дојдат и да бидат дел од Западната трибина, да бидат дел од НАРОДНИОТ ФРОНТ! Народен фронт за Вардар! Бараме одговорност, бараме професионализам! Бараме инвеститорот да го разреши постоечкото раководство и да постави вистински професионалци кои Вардар ги заслужува. Натпреварот ќе биде одигран во 14:00 ч. а најважно од се е, сите заедно да бидеме обединети на западната трибина. Без разлика дали сте Комити, Вардарци, навивачи или симпатизери, сите заедно рамо до рамо. Западната трибина повторно застанува во одбрана на нашата светост. Тука се брани Вардар, тука се брани приказната за ,,клубот на народот”, тука се брани црвено-црното! – стои во соопштението на Комити Запад. По десет кола во Првата македонска фудбалска лига Вардар е на претпоследното 11. место со седум освоени бода....

Собрание на доверители донесе одлуки за продажба на подвижен имот од стечајна маса на поранешно ,,Фени", оваа информација денеска ја потврдија од Основен суд Кавадарци за МИА. - На седницата одржана вчера во рамките на отворената стечајна постапка над должникот Трговско друштво за ископ на руди, производство на метали, трговија и услуги Еуроникел индустри ДОО с. Возарци Кавадарци - во стечај, присуствуваа доверители со утврдени и признати побарувања во износ од 58.414 проценти, информираа од Судот. На дневен ред биле неколку точки, за продажба на имот од стечајната маса, меѓу кој и резервни делови, разна руда од Брег на Слонова коска, Албанија, Гватемала, цврсти горива како лигнит од Индонезија, Колубара, камен јаглен од Русија. За некои од пакетите за продажба, немало заинтересирани за понудите. Била спроведена електронска аукција. Се прифатила понуда за купување на инвентар и лабораторија со проценета вредност од 14.143.567,00 денари, а со понуда во износ од 8.305.200,00 денари или 58,72 отсто од проценетата вредност. Се прифатила и таа понуда за продажба на магацински простор со проценета вредност од 43.492.742,00 денари а со понуда во износ од 13.534.400,00 денари или 31,11 отсто од проценетата вредност. На седницата биле прифатени и понудите за продажба на магацински простор со резервни делови,со проценета вредност од 371.852.869,00 денари а со понуда во износ од 75.669.600,00 денари или 20,34 проценти од проценетата вредност, како и таа за разна руда со проценета вредност од 16.513.455,00 денари а со понуда во износ од 11.300.000,00 денари или 68,42 проценти од проценетата вредност и таа за цврсти горива со проценета вредност од 11.484.450,00 денари а со понуда во износ од 7.900.000,00 денари или 68,78 отсто од проценетата вредност. - Согласно одредбата од чл.49 од Законот за стечај, доверителите имаат право да предложат укинување на одлука донесена од Собрание на доверители и тоа во рок од осум дена, посочија од Судот. Од Судот потсетија дека седницата ја следеа и доверители што имаат свои утврдени побарувања, меѓу кои и транспортерите на руда. Вчера протестираа транспортери кои своевремено возеа руда за комбинатот, барајќи над два милиона евра за транспортот и изразувајќи незадоволство што, како што рекоа, имот проценет за над десет милиони евра, се огласил за продажба за околу 2.3 милиона евра...

Македонскиот шаховски шампион Алкалоид забележа убедлива победа со 6:0 против шампионот на Словачка, Церо Инвест Нитра во 2. коло на Европскиот клупски куп. Победите за Алкалоид ги остварија Еригаиси Ајрун (прва табла), Веи Ји (втора табла), Ју Јангји (трета табла), Читамбарам (четврта табла), Нараунан (петта табла) и Александар Инѓиќ (шеста табла). Следен противник на шахистите на Алкалоид е екипата Бир Шева од Израел, која e долгогодишен редовен учесник на Европскиот клупски куп. По второто коло 18 екипи имаат максимални четири бода...

Здравствените работници имаат десетпати поголем ризик од заболување со грип во споредба со општата популација, поради природата на својата работа. Здравствениот работник може да заболи од грип од своите пациенти или колеги. Постојат студии кои покажуваат дека за време на епидемија, во здравствена установа повеќе од половината здравствени работници кои се грижат за пациентите со грип, и самите се инфицирани од вирусот, истакнуваат утрово од Институтот за јавно здравје (ИЈЗ). - Грипот е сериозна болест, може да предизвика пневмонија, бронхит или да ги влоши хроничните здравствени состојби. Вакцинацијата против грип, секоја година, е најдобар начин да се заштитиш себеси од ова заболување, подвлекуваат од ИЈЗ. Постојат студии што покажуваат дека здравствените работници можат да го пренесат грипот на своите пациенти, особено ако се осетливи да развијат компликации. - Грипот е опасен за мали деца, возрасни и лица со ослабен имунитет или други хронични заболувања. Како резултат на пренос на грип од здравствен работник, некои пациенти може да развијат компликации опасни по животот, како што се документираните случаи на смрт од грип во неонатални центри за интензивна нега и на онколошки педијатриски одделенија, се додава во соопштението...

СДС применува нов феномен на политичката сцена, а тоа мора да е интензивно пиење на апчињата за заборавање. Па така, Виктор Димовски кој беше член на Извршниот одбор на СДС и член на партиското дипломатско тело, тој беше и раководен кадар во АНБ. Да не се заборави ниту улогата на Еролд Муслиу кој зема активно учество во кампањата на СДС, која партијата катастрофално ја загуби и за време на која Муслиу како партиски портпарол, но во исто време и прв разузнавач, креираше лажни документи, кодошеше и манипулираше при доделувањето на безбедносните сертификати и редица други злоупотреби. Да не заборавиме ниту на улогата на семејството Ременски, која е пример за тоа како брачен пар ја злоупотребува политичката моќ за партиски цели. Воедно, да не се заборави ниту функцијата на доскорешниот Генерален директор на СДС, Миле Зечевиќ кој се само нарекуваше Вардарски, кој беше поранешен директор на УБК. Значи, Генералниот секретар на СДС контролирал и бил прв човек на разузнавачките служби. Ја молиме СДС помалку да пие од апчињата за заборавање. Ако тие забораваат, Македонија памети....

Рускиот претседател Владимир Путин е домаќин на самитот на организацијата БРИКС кој почнува денеска во градот Казан. Форумот, на кој ќе учествуваат 24 шефови на држави и влади, Путин го смета за дел од иницијативата за создавање нов светски поредок за ставање крај на доминацијата на САД. Средбата ќе продолжи до четврток. Меѓу поважните гости се издвојува кинескиот претседател Си Џинпинг. Ќе присуствуваат претставници од вкупно 32 земји. На оригиналните членки на БРИКС - Бразил, Русија, Индија, Кина и Јужна Африка - неодамна им се приклучија земји како што се Обединетите Арапски Емирати, Египет, Етиопија и Иран. Статусот на Саудиска Арабија се уште е нејасен. Русија, која е ротирачки претседавач со организацијата, најави дека Саудиска Арабија ќе биде примена за членка на почетокот на годината, но се уште нема потврда од Ријад, а самото кралство на состанокот ќе го претставува странски министер. Портпаролот на Кремљ, Дмитриј Песков најави дека на средбата ќе се разјасни прашањето за статусот на Саудиска Арабија. Во него како заинтересирана страна ќе учествува и Турција. Во пресрет на форумот, Путин најави дека една од главните цели на состанокот ќе биде унапредување на финансиската соработка и обезбедување алтернатива на системот СВИФТ (SWIFT), со кој се вршат меѓународни банкарски плаќања. Многу руски банки беа исклучени од него по инвазијата на Украина. На агендата на БРИКС е и основањето на заедничка банка....

Неправилности во спроведувањето на пописот на залихите и управувањето со истите, утврдил Државниот завод за ревизија по извршената ревизија на финансиските извештаи заедно со ревизија на усогласеност на Јавната здравствена установа Универзитетска клиника за радиотерапија и онкологија за 2023 година. -Недостасува вредносно усогласување на сметководствената евиденција за лекови и материјали со фактичката состојба, а евидентирањето на приемот и издавањето на лековите од аптека до организационите единици се врши со задоцнување. Исто така, не се внесуваат податоци за вредноста на лековите примени преку донации, што влијае на целосноста на податоците во Билансот на состојба, соопшти ДЗР. Во текот на 2023 година Клиниката, како што се додава во соопштението, примила лекови во вредност од 33 милиони денари по основ на донации, но овие податоци не биле внесени во финансиската евиденција. Во ревизорскиот извештај истакнато е дека состојби во врска со прием, складирање и издавање на залихи на лекови се утврдени и во Конечниот ревизорски извештај на овластениот државен ревизор за 2021 година, за што пред надлежен орган во тек е постапка. За вршење на дејноста Клиниката од Фондот добива договорен надоместок како и условен надоместок кој се доделува за набавка на т.н. биолошка терапија. Висината на надоместоците за период 2021 до 2023 година е прикажана на следниот графикон. Во извештајот се напоменува дека и покрај преземените активности од страна на одговорните лица по дадените препораки во Конечниот извештај на овластениот државен ревизор од извршена ревизија за 2021 година и понатаму постојат определени состојби кои се значајни да се истакнат и кои влијаат на работењето на Клиниката. Во текот на 2023 година, како што информираат од ДЗР, изготвени се и се применуваат повеќе протоколи/упатства за дијагностика, третман и следење на онколошки пациенти во кои како терапија е вклучена и биолошката, но се уште не се одобрени од страна на Министерството за здравство. -И покрај зголемувањето, одобрениот условен надоместок не е доволен за вклучување на сите пациенти кои според медицинските индикации би можеле да ја примаат терапијата, односно одобрените средства се доволни за приклучување на само 24 отсто од пациентите кои примаат терапија во дневна болница, се наведува во извештајот. Од ДЗР посочуваат дека воспоставениот начин на контрола од Фондот и плаќање на една дванаесетина од износот на условниот надоместок и понатаму остава простор фактурите кои се доспеани да не се платат навремено. Состојбата на вкупните обврски на Клиниката на 31.12.2023 година изнесува приближно 952 милиони денари од кои доспеани се 402 милиони денари, а нивната доспеаност е сведена од 2 години на 6 месеци. -Клиниката е единствениот функционален центар на територија на државата кој дава услуги на пациенти од областа на радиотерапијата. За таа цел до денот на вршење на ревизијата во соодветни простории инсталирани се и функционални три линеарни акцелератори со кои според информациите од Клиниката се даваат услуги во просек од 180 до 200 пациенти дневно, се наведува во извештајот. Од ДЗР посочуваат дека Клиниката располага со уште два линеарни акцелератори кои не се ставени во употреба. За акцелераторот набавен во 2014 година, чија вкуона вредност е 2.900 илјади денари, во тек се активности кои се предуслов за ставање во употреба, при што се очекува истиот да биде функционален до крајот на 2024 година. Другиот акцелератор, добиен по пат на донација во 2016 година, чија вкупна вредност е 1.715 илјади денари, се чува неотпакуван во царинско складиште за што годишно се плаќаат 189 илјади денари. Според информации добиени од одговорните лица на Клиниката, акцелераторот претходно бил користен во здравствена установа во Австралија и долго време не е во функција. Во 2024 година, производителот соопштил дека поради застареност на компонентите и технологијата, може да понуди само ограничена поддршка за негово одржување, без гаранции за компатибилност со новите онколошки софтвери. Ревизорите препорачуваат дека е потребно Клиниката во координација со Министерството да ја преиспитаат состојбата и изнајдат оптимално решение за начин на постапување со овој апарат во наредниот период како и да се разгледаат можностите за понатамошно одложување на апаратот на начин кој нема да предизвикува дополнителни трошоци на Клиниката. - Во рамките на Клиниката постои Единица за централна подготовка на цитостатска терапија, опремена со КАТО софтверска лиценца, но системот не е во функција од времето на неговата набавка во 2013 година, чија набавна вредност изнесува околу 10 милиони денари, се наведува во извештајот. Во 2023 година, одговорните лица ги разгледале можностите за активирање на системот и го информирале Министерството за здравство за неколку клучни проблеми. Според нив, системот е делумно опремен, недостасуваат клучни компоненти, а просторот не е адаптиран за стерилно работење. Дополнително, подготовката на терапијата со овој систем трае подолго време, што ќе го зголеми времето на чекање за апликација на терапија, Клиниката нема доволен број фармацевти за работа со системот, а потребни се и дополнителни средства од околу 8 милиони денари годишно за потрошен материјал. Во текот на 2024 година Министерството спровело постапка за јавна набавка со која било предвидено да се набават сите неопходни делови за да се стави системот во употреба, но истата е поништена бидејќи не била поднесена ниту една прифатлива понуда. Во оваа насока ревизорите препорачуваат Клиниката во координација со Министерството и Фондот да направат комплетна анализа на капацитетите и можностите, медицинските и економските ефекти, со цел изнаоѓање најоптимално решение за иднината на системот и подобрување на услугите за пациентите. -Покрај наведените состојби од страна на ревизорите е идентификувано и клучно ревизорско прашање кое влијае на вршењето на дејноста на Клиниката а кое се однесува на централизираното давање на здравствени услуги во областа на радиотерапијата и онкологијата. Имено, бројот на пациенти кои се лекуваат на клиниката е во континуиран пораст, се посочува во извештајот. Од ДЗР посочуваат дека континуираниот пораст на бројот на пациенти, меѓу другото се должи и на тоа што, речиси сите пациенти на кои им се потребни здравствени услуги од областа на радиотерапијата и онкологијата бараат услуги на Клиниката. За оваа состојба Клиниката го информирала Министерството за здравство во кое наведува дека на ниво на држава има уште 4 јавни здравстени установи во кои онколошките одделенија не се функционални во целост, а дел располагаат и со акцелератори кои не се користат. -Во 2023 година, Клиниката располага со 35 доктори и 96 лица останат медицински персонал , кои во текот на 2023 година извршиле вкупно 104.196 здравствени услуги. Просечниот број на извршени услуги за одредени дијагностики надминува по 5 илјади прегледи годишно по специјалист, што во услови на континуиран пораст на бројот на пациенти, доведува до преоптовареност на вработените, а нивниот број е недоволен за овој обем на работа, се наведува во извештајот. Ревизорите укажуваат дека е потребно Министерството да преземе активности за ангажирање на капацитетите во оние јавни здравстени установи кои имаат услови за тоа, со што би се овозможило прифиќање на дел од зголемениот број на онколошки пациенти, особено на оние надвор од Скопје, а со тоа и дисперзирање на здравствените услуги во оваа област, намалување на големиот наплив од пациенти со кој се соочува Клиниката и подобрување на квалитетот на здравствените услуги....

Поранешниот албански претседател и лидер на Партијата на слободата, Илир Мета, во првата реакција по апсењето, од затворски притвор, порача дека е" посилен од кога и да било". „Најискрено им благодарам на сите членови на Партијата на слободата за извонредната поддршка што ми ја дадоа досега. Исто така, од денес нашата борба започнува нова страница во соочувањето со брутално инсталираната нарко-држава без никаков компромис“, напиша на социјалните мрежи. Убеден сум додаде тој, во победата на нашите национални и демократски каузи! На непријателите на нашата нација и демократијата ќе им замрзне насмевката на усните. „Моето денешно киднапирање на најнасилнички начин ја покажува паниката на диктаторскиот режим од соочување со вистините. Ве уверувам дека откако дознав за одлуката за моето апсење, се чувствувам посилно од било кога и уште повеќе верувам во мојата целосна невиност. Се чувствувам горд што бев насилно киднапиран од антиалбанци и оние кои говорат албански само поради мојот патриотизам и заштита на националните интереси“, напиша Мета. Медиумите пренесоа дека во затворот во Тирана Мета го посетил неговиот син Бесар Мета и адвокатот Генц Ѓокутај, кој е адвокат и на Сали Бериша....

Негативни се резултатите за птичји грип на двајцата вработени во скопската Зоолошка градина, кои пројавиле симптоми, информираа од Институтот за јавно здравје (ИЈЗ) и препорачуваат да се избегнува контакт со болни или мртви животни, и со какви било површини што се чини дека се контаминирани со животински измет, колење или јадење болни животни. Од Ветеринарна комора, повикуваат на смиреност и општествена одговорност на сите чинители во општеството, без создавање на клима на недоверба и попречување на активностите на институциите задолжени да го чуваат јавното здравје и здравјето на животните, порачувајќи дека “нужно е да се преземат драстични мерки за елиминирање на изворот и ширење на заразата“ Од Ветеринарната комора, вчера информираа дека „во целост ги поддржува сите активности и мерки преземени од надлежните органи во врска со последните настани“ и нагласуваат дека „процедурите и мерките во случаи на појава на заразни болести зооантропонози - болести што од животни преминуваат на луѓе се утврдени од меѓународни институции и треба доследно да се спроведуваат“. - Во целост разбирајќи ја сензитивноста на поединци и групи во врска со третманот и благосостојбата на животните за кои искрено и принципиелно се залагаме и се дел од нашата професионална етика и пракса, укажуваме до јавноста дека ветеринарно-здравствениот систем има примарна цел да ги заштити здравјето на луѓето, животните и економијата во државата. Следствено, во услови на појава на особено опасни заразни болести со голем потенцијал да го загрозат јавното здравје, како што е во случајот авијарната инфлуенца, нужно е да се преземаат драстични мерки за елиминирање на изворот и ширење на заразата, се наведува во соопштение од Ветеринарната комора. Од Ветеринарната комора, исто така, потенцираат дека некои соеви на вирусот на авијарна инфлуенца се нотирани од светската наука, како причинители на заразни болести со најголем потенцијал за нова светска пандемија. Периодот на инкубација за птичјиот грип се проценува дека е до седум дена, иако обично е два до пет дена по последната изложеност со болна или мртва живина. Првичните симптоми примарно се респираторни, со покачена температура, треска и кашлица, но може да се јават и нереспираторни симптоми. Симптомите на горниот респираторен тракт - течење на нос и болки во грлото можеби не се вообичаени кај сите пациенти, но, болеста може да напредува до респираторна инсуфициенција, акутен респираторен дистрес синдром (ARDS) и повеќеорганска инсуфициенција. По појавата на птичјиот грип во Скопската Зоолошка градина, Институтот за јавно здравје излезе со препораки до граѓаните – за заштита се препорачува да се избегнува контакт со болни или мртви животни, контакт со животни во фарми и пазари за животни, влегување во области каде може да се колат животните, контакт со какви било површини што се чини дека се контаминирани со животински измет, колење или јадење болни животни. - Следете ги добрите практики за безбедност на храната како што се избегнување на потрошувачката на сурово млеко, јајца и месо. Одржувајте колективна и лична хигиена, вклучително и редовно миење раце со сапун и вода. Лицата со професионална експозиција треба да ги следат протоколите за работа, како и мерките за превенција поврзани со работното место, нагласуваат од ИЈЗ. Оттаму наведуваат дека речиси сите случаи на инфекција со вирусот се поврзани со близок контакт со заразени живи или мртви птици. - Инфлуенца A(H5N1) е еден од неколкуте вируси на грип што предизвикува високо заразна респираторна болест кај птиците наречена авијарна инфлуенца - или „птичји грип“. Документирани се и инфекции кај цицачи, вклучително и кај луѓето. Периодот на инкубација за инфекција со A(H5N1) се проценува дека е до седум дена, иако обично е два до пет дена по последната позната изложеност на болна или мртва живина. Сепак, периодот на инкубација може да трае и до 14 дена. Инфекцијата со вирусот на грип A(H5N1) може да предизвика низа болести кај луѓето, од благи до тешки, а во некои случаи може да биде дури и смртоносна. Смртноста е до 50 проценти, појаснуваат од ИЈЗ. Доколку некој смета дека можеби има птичји грип, од ИЈЗ велат дека веднаш треба да се побара медицинска помош ако се има симптоми слични на грип како треска, кашлица и тешкотии при дишење, или конјунктивитис или други необјаснети симптоми. Да се информира лекарот на лицето за каква било изложеност на болни или мртви животни. - Дополнително, преземете заштитни мерки: носете маска и ограничете контакт со други луѓе, покривање на устата и носот при кашлање или кивање, правилно фрлање на марамчињата, редовно проветрување на просторот каде се наоѓате, избегнувајте да ги допирате очите, носот или устата и редовно мијте ги рацете со сапун и вода, додаваат од ИЈЗ. Од Институтот појаснуваат дека направени биле епидемиолошки анкети на 16 лица, според список на Зоолошката градина. Две лица, кои пројавиле симптоми, се негативни за птичји грип. - На ден 21 октомври, согласно протоколите, направено е тестирање за птичји грип во Одделението за вирусологија во ИЈЗ референтна лабараторија, што е меѓународно акредитирана за дијагностика на инфлуенца грип од хумано и анимално потекло, на лице кое во епидемиолошката анкета има наведено дека еден ден имало симптоми на покачена телесна температура. Воедно е тестирано на ист начин и второ лице вработено во ЗОО, кое не е на доставениот список од 16 луѓе вработени во ЗОО, но, на ден 21 октомври се пријавило во ИЈЗ со тековни симптоми, се наведува во соопштението. Директорот на Клиниката за инфективни болести и фебрилни состојби во Скопје, Фадил Цана во куса изјава за МИА, посочи дека нема простор за паника кај граѓаните, кога е во прашање птичјиот грип. Тој нагласи дека како што е состојбата моментално, нема простор за паника ниту кај сезонскиот грип, а камоли кај птичјиот. По угинување на гуска во езерцето во скопската Зоолошка градина потврден е случај на присуство на високопатоген сој на вирусот на птичји грип H5N1....

Влатко Стефановски, виртуозот на гитарата, годината во која одбележува 50 години од својата импресивна кариера ќе ја памети и по својата лондонска авантура. Распродадениот клуб Dingwalls 2 во лондонскиот кварт Камден и снимањето во легендарното студио Abbey Road го сумираат неговиот петдневен престој со тимот на Кроација рекордс. Како што соопштија од Кроација рекордс Македонија, новиот проект кој беше успешно реализиран опфати снимање во Abbey Road Studio Three во кое Влатко Стефановски со Јан Стефановски на тапани и Тихомор Хојсак на контрабас снимија дури дваесет и две песни меѓу кои и Where My Guitar Gently Weeps, на Битлси, една од најголемите групи на сите времиња. Песната е избрана токму како посвета на просторот и дел од историјата што го одбележа четворката од Ливерпул. -Нашето лондонско искуство полека се заокружува. Имавме пет магични денови. Во култното студио Abbey Road, ги посетивме сите ходници, ги видовме сите инструменти и, да кажам, светите места каде што работеа Битлси. Во Abbey Road Studio Three пеев на микрофонот на кој еднаш пееше Ејми Вајнхаус, тоа е голема мотивација да снимиме на вакво место, па го прославивме трудот и енергијата што ги оставивме во студиото во кантина каде што седеа Битлси и многу други музичари, рече Влатко Стефановски, сè уште под импресии од минати настани. Според него, тоа е огромна мотивација да се снима на вакво место, а исто така е и ретко искуство. -Успеавме да снимиме дваесет и две песни за два дена, Јан на тапани, Хојсак на контрабас и јас на гитара. Тон мајстор беше Горан Мартинац. На крајот сè заврши еуфорично, па го прославивме трудот и енергијата што ги оставивме во студиото во кантина каде што седеа Битлси и многу други музичари, дополни Влатко Стефановски. Распродадениот клуб Dingwalls 2 беше дополнителен мотив за ова трио да го даде својот максимум на концертот, а публиката на најдобар можен начин им возврати. Задоволството од музиката беше обострано. - Концертот беше незаборавен. Публиката пееше во еден глас со нас. Беше извонредно и магично. Дома се враќаме уморни, но крајно задоволни и благодарни на тимот на Кроација рекордс што ни го овозможи ова музичко патување, додаде Стефановски. Ексклузивноста на еден ваков специјален проект да биде комплетен се погрижи видео тимот на Кроација рекордс кој го документираше снимањето на албумот и концертната атмосфера. Влатко Стефановски е светски познат гитарист кој засекогаш ја одбележа музиката на овие простори, најпрвин како водач на феноменалната група Леб и сол, а потоа преку неговите соло проекти и соработките со многу други големи музичари. Вистински македонски музички амбасадор. Легенда! Последниве години најчесто настапува со синот Јан на тапани и со Иван Кукиќ на бас, под името Влатко Стефановски Трио. Со преку 15-ина самостојни албуми и бројни филмски и театарски проекти, Влатко ја покажа својата неверојатна способност да обединува различни музички жанрови и уметнички изрази. Автор е на музика за три современи балети и 17 играни филмови. Од особена важност е неговата соработка со Лондонскиот симфониски оркестар, а оваа најнова лондонска авантура секако ќе има посебно место во неговите мемоари, стои во соопштението....

Тренерот на Пари Сен-Жермен, Луис Енрике ги сподели своите очекувања за натпреварот од фудбалската Лига на шампионите против ПСВ. - Очекуваме тежок натпревар. Тоа е толку отворен натпревар што се може да се случи. Поддршката од навивачите ќе биде многу важна. Не е лесно да се процени нивото на противникот. Треба да се види и дали играш дома или на гости, тоа менува се. Без сомнение, ПСВ е противник на многу високо ниво. Тие се силни во своето првенство и имаат неверојатна статистика. Играат високо, притискаат многу, тие се тим кој е храбар. Исто така знаат добро да се бранат, изјави Енрике на официјалната веб-страница на ПСЖ. Натпреварот помеѓу ПСЖ и ПСВ ќе се игра вечер во Париз со почеток во 21 часот. По првите две кола во Лигата на шампионите, ПСЖ има три бода, додека ПСВ е со само еден бод....

Ал-Хилал вчеравечер го победи Ал-Аин (Обединети Арапски Емирати) на гостински терен во натпреварот од 3. коло на азиската Лига на шампиони со 5:4. Клубот од Саудиска Арабија играше со фудбалер помалку од 82. минута. Хет-трик за гостите на оваа средба постигна Салем Ал-Досари, а по еден гол постигнаа и Ренан Лоди и Сергеј Милинковиќ-Савиќ. Домаќините постигнаа голови преку Матео Санабрија и Суфјан Рахими кој постигна два гола од игра и еден од пенал. Напаѓачот на Ал Хилал, Нејмар, за прв пат по една година влезе на теренот. Во 77. минута 32-годишниот Бразилец влезе на местото на Ал-Досари. Фудбалерот не учествуваше на натпреварите по повредата на коленото, која ја доби во октомври 2023 година на натпреварот за бразилската репрезентација против Уругвај (0:2) на квалификацискиот турнир за Светското првенство 2026 година. Ал-Хилал има 9 бода и е лидер во поредокот на Западна дивизија, Ал Аин со еден бод е претпоследен (11. место)...

По објавувањето на резултатите од пописот на населението, просрпските партии го обновија своето барање српскиот јазик да биде официјален во Црна Гора. Резултатите од пописот во Црна Гора покажаа дека српскиот е мајчин јазик за 43 отсто од населението, а црногорскиот за нешто повеќе од 34 отсто. Истиот ден кога беа објавени резултатите на 15 октомври, просрпските партии го повторија барањето за измена на Уставот за официјализирање на српскиот јазик. Во Уставот на Црна Гора, црногорскиот јазик е дефиниран како „официјален“, а српскиот јазик е „во службена употреба“ заедно со босанскиот, хрватскиот и албанскиот јазик. Промена на статусот на српскиот јазик побараа некои од владејачките партии, вклучително и прорускиот Демократски фронт (ДФ), просрпската Социјалистичка народна партија (СНП) и други помали партии. Тие како основен аргумент го наведоа фактот дека пописот покажал дека мнозинството од населението зборува српски. Во декември минатата година во Црна Гора беше одржан попис на населението, чии резултати за националното, верското изјаснување и јазикот беа објавени дури на 15 октомври. Повеќе од една деценија, просрпските партии бараат изедначување на уставниот статус на српскиот и црногорскиот јазик. Актуелниот претседател на Собранието Андрија Мандиќ, кој е и лидер на проруската ДФ, во неколку наврати најави иницијатива за промена на статусот на српскиот јазик доколку пописот покаже дека мнозинството од населението го зборува тој јазик. На 15 октомври, во парламентот тоа го повтори неговиот сопартиец Дејан Ѓуровиќ, велејќи дека српскиот јазик треба да се стандардизира како службен јазик во Уставот: „Мораме да признаеме дека српскиот јазик треба да биде службен, бидејќи тој е мнозински јазик во Црна Гора. Истото го очекувам и од опозицијата. Истото барање го упати и Драгослав Шќекиќ, функционер на просрпската СНП и министер за спорт во Владата на Милојко Спајиќ, кој рече дека очекува властите да постапат во согласност со „реалната структура на населението“. „И почитувајте го фактот дека Србите сочинуваат значаен сегмент од ова општество. Најмалку што очекуваат луѓето што зборуваат српски е правото да зборуваат и да се образуваат на нивниот јазик насекаде“, рече Шќекиќ. Останатите владејачки партии не се огласија за темата. Претседателот на Српскиот национален совет Момчило Вуксановиќ изјави дека Србите во Црна Гора се соочени со „жестока борба за зачувување на својот идентитет преку воведување на српскиот јазик како службен јазик во сите државни институции и афирмација на кирилицата“. На овие најави прва реагираше најголемата опозициска Демократска партија на социјалистите (ДПС). Пратеникот на ДПС Андрија Николиќ ја потсети владејачката партија на нивните претходни изјави: „Рековте дека српскиот јазик треба да надмине 50 проценти за потоа да се смени Уставот. Имавте различни очекувања. А резултатите се исти како и на пописот во 2011 година. Црногорскиот јазик е дефиниран со Уставот како службен за време на владеењето на ДПС. Црногорскиот и српскиот јазик низ последните три пописи на населението Бројот на граѓани чиј мајчин јазик е српскиот е зголемен за 0,3 отсто меѓу двата пописи – 2011 и 2023 година, додека бројот на оние што зборуваат црногорски е намален за 2,4 отсто. На пописот одржан во 2003 година, во времето кога Црна Гора беше во државна заедница со Србија, 63,4 отсто од населението својот јазик го нарекувале српски, а 21,9 отсто црногорски. Уставот на Црна Гора, во кој црногорскиот е пропишан како службен јазик, беше усвоен во 2007 година, една година по референдумот за независност. Црна Гора, како и другите земји кои произлегоа од поранешна Југославија каде официјален јазик беше српско-хрватскиот, по прогласувањето на државната независност својот официјален јазик го именуваше по името на државата. Промените на Уставот во 2011 година беа причина тогашната просрпска опозиција, предводена од Андрија Мандиќ, да побара промени во областа на идентитетските прашања и државните симболи. Беше побарано да се стандардизира српскиот јазик како службен, да се воведе таканареченото тробојно национално знаме и да се скрати државната химна. Владата предводена од ДПС на Мило Ѓукановиќ ги одби овие барања. Просрпските партии ја обвинија владата на Мило Ѓукановиќ за „протерување на српскиот јазик и кирилицата од Црна Гора“, иако во Уставот српскиот е дефиниран како јазик во службена употртеба, а латиницата и кирилицата се рамноправни азбуки. Промената на власта се случи во 2020 година на изборите, на кои претходната просрпска опозиција стана дел од парламентарното мнозинство, а во 2024 година добија и дел од ресорите во владата на Милојко Спајиќ. По смената на власта се забележува зголемување на употребата на кирилицата во институциите. Постапка за измена на Уставот на Црна Гора Заедно со партиите на поранешната ДФ и СНП, во парламентарното мнозинство се и Движењето Европа сега на Спајиќ, Демократите, албанските национални партии и Бошњачката партија. Тие имаат вкупно 54 од вкупно 81 пратеник, што е двотретинско мнозинство во Парламентот на Црна Гора. Според Уставот, за промена на кој било член од Уставот, потребно е двотретинско мнозинство во парламентот, а за промена на државните симболи и службениот јазик, потребно е и организирање референдум. На референдумот тие измени треба да ги поддржат три петини од запишаните во избирачкиот список, што е околу 325.000 граѓани. На последниот попис, нешто помалку од 270.000 изјавиле дека зборуваат српски јазик. Лидерите на просрпската ДФ претходно најавија дека ќе го воведат српскиот јазик како службен јазик „со минимален ангажман во парламентот“, но не објаснија како. Коментирајќи ги најавите на просрпските партии, Дигиталниот форензички центар од Подгорица оцени дека „кампањата што веднаш ја почнаа полномошниците на српското влијание е насочена кон поларизација и дестабилизација на црногорското општество“. „Отворањето на овие теми директно го загрозува европскиот пат на Црна Гора“, заклучува ДФЦ. На пописот му претходеше кампања на просрпските и проруските сили и медиумите, кои ги повикаа граѓаните да се изјаснат како Срби. Во кампањата се вклучи и патријархот на СПЦ (СПЦ) Порфирије, кој ги повика граѓаните да се идентификуваат како припадници на српскиот народ и верници на СПЦ кои зборуваат на српски јазик. Претседателот на Србија, Александар Вучиќ, постојано ја истакнува важноста на пописот за да се утврди бројот на Србите во Црна Гора. Два дена по објавувањето, Вучиќ изнесе констатација дека резултатите од пописот се добра порака „за оние кои мислеа дека со брутални обиди можат да го оспорат правото на српскиот народ на идентитет и јазик“. Резултатите покажаа и дека 6,9 отсто од жителите го сметаат босанскиот јазик за свој мајчин јазик, албанскиот 5,2 отсто, рускиот 2,3 отсто, српско-хрватскиот два отсто и хрватскиот 0,3 отсто. Радио Слободна Европа...

СВР Охрид поднесе кривична пријава против А.Р.(40) од Охрид поради постоење основи на сомнение за сторено кривично дело „лажно претставување“. Пријавениот, иако адвокатската функција му била ставена во мирување поради тоа што бил правобранител, сепак во три наврати застапувал странки во постапки пред надлежен суд. -Од 10.11.2020, пријавениот бил именуван за правобранител за подрачјето на Охрид и од тој ден ја ставил во мирување својата адвокатска дејност. Но, и покрај тоа, подоцна тој пред надлежниот Основен суд Охрид во три наврати, и тоа во предмет, лажно се претставил како адвокат и застапувал странки во постапки пред надлежниот суд, прикривајќи го фактот дека адвокатската дејност му е во мирување, а со цел да прибави за себе противправна имотна корист и на тој начин го сторил кривичното дело, појаснуваат од МВР....

Во Специјалниот суд во Белград денеска продолжи судењето на Урош Блажиќ, кој лани во мај уби девет млади и рани уште 12 во селата Мало Орашје и Дубона кај Младеновац, како и на и неговиот татко, јави дописникот на МИА од Белград. На рочиштето присуствуваа бројни членови на семејствата и пријателите на загинатите и повредените во селата кај Младеновац, како и нивни претставници кои носеа црни маици на кои беше испишан датумот 4.5.2023 година со порака „Живеете“. На претходните рочишта сведочеа повредените, и родителите на загинатите во масовното убиство и ранетите на 4 мај 2023 година, а денесka судењето продолжи со распит на сведоците, меѓу кои и Андријана Митровиќ, која беше ранета на 4 мај во Дубона. Митровиќ изјави дека тогаш Урош Блажиќ го запрел автомобилот во близина на дворот и дека едeн од нејзините пријатели му рекол „Чекај, што правиш“, но Блажиќ, според неа, рекол „Рацете горе“ и потоа пукал рафално во нив. Таа рече дека почувствувала дека е погодена и дека паднала и се преправала дека е мртва, после што не се сеќава на ништо. На прашањето на обвинителката дали се сеќава дека Блажиќ се вратил повторно да ги застрела пријателите, Митровиќ рече дека мисли да тој се вратил и поединечно пукал во нејзината другарка која врескала, и дека и неа уште еднаш ја застрелал во грб. Сведочењето и на останатите сведоци, роднини, пријатели на убиените млади од Дубона и Орашје исто така беа потресни, тешки, во еден момент и на раб на инцидент кога сведокот Ј.М. на кого му се убиени двајцата браќа тргна накај обвинетите Урош и татко му со зборовите „Си воспитал монструм“, но беше спречен од обезбедувањето. Денешното судење заврши и ќе продолжи во понеделник, 28 октомври. Вишото јавно обвинителство во Смедерево го товари Урош Блажиќ за тешко убиство, а неговиот татко Радиша за недозволено држење и носење оружје и експлозивни материи. Обвинителството предложи казни од 20 години затвор за двајцата. Законот предвидува Урош Блажиќ да не може да биде осуден на доживотен затвор, бидејќи во времето кога го извршил делото имал неполни 21 година. Затоа максималната казна на која може да биде осуден е 20 години. Судењето започна во август 2024 година, а од безбедносни причини само физички беше преместено од Смедерево во судницата на Специјалниот суд во Белград, поради инцидентот што се случи во мај на самиот почеток на прелиминарното рочиште во Вишиот суд во Смедерево. Урош Блажиќ на првото рочиште во август ја призна вината и изјави дека е подготвен да одговара за стореното. Радиша Блажиќ пред судот ја негираше вината и рече дека не знае од каде е пронајденото оружје во неговата куќа по масовното убиство на 4 мај....

По првичните загуби на азиските берзи, повеќето главни регионални индекси се во зелено на почетокот на неделата, бидејќи инвеститорите проценуваат какво влијание ќе има најновиот потег на кинеските власти врз забавената економија, а фокусот е и на општите избори во Јапонија , што ќе се одржат кон крајот на неделата, пренесе Хина. Индексот MSCI на азиските берзи околу 6 часа беше во благ пораст за 0,11 отсто, како одраз на претпазливоста на инвеститорите откако индексите на американските берзи пораснаа шеста недела по ред. Истовремено, јапонскиот Никеи порасна за 0,26 отсто, додека австралиските и шангајските берзански индекси зајакнаа за приближно 0,8 отсто, а берзанскиот индекс на Хонг Конг ослабе за половина отсто. Кинеската централна банка ги намали клучните каматни стапки за 25 базични поени, па сега е 3,1 отсто за заеми до една година и 3,6 отсто за пет години. Учесниците на пазарот очекуваа ваква одлука, па затоа пазарот остана претпазлив, додека се чекаат натамошни потези и најави од кинеските претставници поврзани со економски стимулации, што може да потрае. „Можеби ќе треба да почекаме до крајот на октомври или почетокот на ноември за конкретни планови од состанокот на Постојаниот комитет на Националниот народен конгрес“, рече Чаопинг Жу, стратег за глобален пазар во Ј.П. Morgan Asset Management во Шангај. Две недели пред претседателските избори во САД, кај некои финансиски инструменти растат облозите за победа на Доналд Трамп. Царинската, даночна и имиграциска политика на републиканскиот кандидат се сметаат за инфлаторни, па затоа се негативни за обврзниците, а позитивни за доларот. Се верува дека Трамп има попозитивен став кон криптовалутите. „Се чини дека Трамп е во предност во клучните држави во бојното поле, што сугерира дека е прилично добро позициониран да се врати во Белата куќа, и мислам дека пазарите почнаа да го земаат тоа предвид минатата недела со посилните цени на акциите, повисоките приноси, американскиот долар што добро котира и со биткоинот, што е на добар пат за зголемување од 10 проценти во споредба со претходната недела“, изјави Тони Сајкамор, пазарен аналитичар во IG. Биткоинот моментално е во пораст за 0,5 отсто, на 69.100 долари, а во текот на денешното тргување го достигна највисокото ниво од јули, 69.487 долари. Најголемата криптовалута во светот минатата недела се зголеми за 9,6 отсто и е во пораст од осум отсто од почетокот на месецот. Индексот на доларот, што ги мери перформансите на САД во однос на кошницата од шесте најважни светски валути, стагнира на 103,46 поени, недалеку од највисокото ниво во повеќе од два месеци. Ова е само одраз на малите флуктуации на курсот на доларот во однос на еврото и јенот. Еврото утринава се тргува по 1.086 долари, а курсот на доларот е 149,27 евра речиси непроменет во однос на петокот....

Од септември 2023 година, покрај руските ракети и гранати, врз главите на Украинците почнаа да паѓаат и севернокорејски балистички ракети KN 23/Hwasong 11Ga. И покрај фактот што ракетата често со потсмев се нарекува Кимскандер или Искандер на Ким, таа е вистинска балистичка ракета која убива исто колку и рускиот Искандер. Според податоците на Министерството за одбрана на Јужна Кореја, на почетокот на септември 2024 година, режимот на Ким Џонг-ун и испратил на Русија околу пет милиони гранати. Според шефот на украинската воена разузнавачка служба ГУР Кирил Буданов, Северна Кореја веќе станала најголемиот проблем меѓу сите сојузници на Руската Федерација поради количината на воена опрема што ја испорачува на Москва. Пред се, станува збор за „огромни количества артилериски залихи“. Како што признава Буданов, „не можеме ништо против тоа“ и покрај фактот што современите технологии овозможуваат да се добијат информации за движењето на товарот во текот на целата рута до фронтот. Првично, Москва повеќе се потпираше на Иран. Но, на Русија и беа потребни милиони муниција, која ја најде токму во Северна Кореја. Во декември 2022 година, ПВК Вагнер купи оружје од Северна Кореја за војната против Украина. Соработката брзо беше подигната на ново ниво, а Северна Кореја и Русија во моментов се во процес на ратификација на договорот за стратешко партнерство. Северна Кореја се приклучува на војната Во овој момент, Северна Кореја станува директен учесник во борбените операции против Украина. Првите сведоштва за присуство на војници од Северна Кореја се појавија на почетокот на октомври 2024 година. На 4 октомври беше објавено дека шест воени инженери кои работеле на одржување на корејската ракетна технологија биле убиени во украински ракетен напад. Веднаш потоа, и украинските власти и украинското разузнавање објавија дека Северна Кореја се подготвува да испрати целосен воен контингент. На почетокот, можеби во рамките на т.н „политики за деескалација“ на САД и другите западни сојузници ја сфатија таа информација како обид на Украина да го принуди Западот поактивно да реагира на зајакнувањето на руските позиции во војната благодарение на муницијата од Северна Кореја. Меѓутоа, деновиве разузнавачката служба на Јужна Кореја ја потврди информацијата на украинската разузнавачка служба и извести дека воени единици од Северна Кореја почнале да пристигнуваат во Русија и се подготвуваат за директно учество во борбени операции. Бидејќи во ерата на интернетот е тешко да се скрие нешто, веднаш почнаа да се појавуваат видео докази, како и рутите по кои се префрлаат севернокорејските војници и нивниот приближен број. Што е познато до денес? Обемот на планираниот трансфер на севернокорејски војници во Русија значително ги надминува претходно објавените бројки. Наместо најавените 12 илјади војници, до крајот на 2024 година на територијата на Руската Федерација би можеле да бидат префрлени до 100 илјади припадници на вооружените сили на Северна Кореја. Преминувањето ќе се одвива во неколку фази. Првиот контингент од 1.500 специјалци веќе пристигна во Владивосток и е на обука во руските воени бази на Далечниот Исток. Според се, се работи пред се за војници на севернокорејските сили за специјални операции. До 1 ноември се планира да се заврши трансферот на уште 10.000 војници кои ќе бидат испратени во областа Курск. Во декември се очекува да пристигне главниот дел од контингентот - до 90.000 војници од различни воени гранки. И покрај потенцијалните тешкотии во преводот, овие единици можат да се користат како инженерски дивизии, што ќе ослободи дополнителни воени единици на руската армија. Исто така, ова е одлична можност за Северна Кореја да стекне искуство во модерното војување. Очекувана реакција на Западот Реакцијата на западните земји беше очекувана. Американскиот секретар за одбрана Лојд Остин изјави дека не може да потврди дека Северна Кореја испратила луѓе во Русија за можно учество во војната во Украина, но додаде дека таквиот потег ќе предизвика „загриженост“. САД изразија голема „загриженост“ поради извештаите дека севернокорејските војници учествуваат на страната на Русија, изјави Шон Савет, портпарол на Советот за национална безбедност. -Не можеме да потврдиме дали овој извештај е точен, но ако е точен, тоа би претставувало опасен развој во руската војна против Украина. Според него, доколку Северна Кореја се приклучи на Русија, САД ќе се консултираат со своите сојузници и партнери за последиците од „таков драматичен потег“. „Сериозна ескалација“ Францускиот министер за надворешни работи Жан-Ноел Баро изјави дека учеството на редовните севернокорејски војници во руската инвазија против Украина ќе биде сериозна ескалација на војната. Претседателот на Комитетот за разузнавање на Претставничкиот дом на САД, Мајк Тарнер бара Белата куќа итно да свика таен состанок за испраќање војници од Пјонгјанг на руско-украинскиот фронт. Тарнер, исто така, повика на итен таен брифинг на Комитетот за разузнавање на Претставничкиот дом за ова прашање. Западните претставници едногласно укажуваат на „тешкотиите“ со кои се соочува Москва доколку биде принудена да ангажира севернокорејски трупи. Тоа е вистина - ваквото масовно вклучување на странски војници укажува на сериозни проблеми со мобилизацијата во самата Русија. Путин категорично не сака да врши мобилизација меѓу руските граѓани, па севернокорејските војници се покажаа како последна опција за надополнување на неговата војска. Сепак, зад овој разговор за „тешкотии“ со руската мобилизација се крие стравот од „неопходните ефекти“, кој очигледно сè уште постои меѓу западните сојузници на Украина. Испраќањето војници од Северна Кореја, земја која за сите цивилизирани народи е олицетворение на „оската на злото“, дополнително ги поткопува аргументите за „деескалација“ и „неподготвеност за проширување на конфликтот“. Ангажирањето војници од трета земја е токму проширување на војната. Што ако Кина отворено почне да им помага на Русите? Украинските воени експерти веќе отворено му кажуваат на Западот: „Добро, што точно е планот за најлошото сценарио? Што ако Северна Кореја утре испрати над 100.000 војници? Што ако Кина започне отворено да испраќа возови со оружје и технологија? Што ако се повеќе и повеќе ресурсите почнуваат да доаѓаат од земјите на „оската на злото“?" Амбасадорот на Украина во Велика Британија, поранешниот врховен командант на вооружените сили на Украина, Валериј Залужни, најточно го кажа тоа во својот говор во Кралскиот институт за меѓународни односи (Четам хаус) обраќајќи му се на Западот: -Ова сега влијае на секој од вас. Кажете ми, ве молам, дали денес е тајна дека Кина, Северна Кореја и Иран се обединија околу Русија? Дали некој мисли дека се обединија против Украина? Ако е така, дозволете ми да бидам првиот што ќе изразам сомнеж. Повеќето луѓе во тие земји дури и не знаат каде е Украина“. Во меѓувреме на бојното поле се појавија различни информации за севернокорејски војници кои се обидуваат да ги заплашат Украинците. Украинските војници, пак, организираат натпревари - која воена единица прва ќе пријави мртви или заробени севернокорејски војници Хина...

Во Основниот суд во Струга денеска нема да се одржат двете закажани рочишта против струшкиот градоначалник Рамис Мерко за незаконско поставување директори во основни училишта поради немање уредна достава до сведоците. Од судот за МИА информираат дека имале проблеми со достава до сведоците. - Двајцата сведоци кои требаше денеска да бидат сослушани, по двата предмети, не се во можност да присуствуваат на рочиштето, изјави адвокатот на Мерко Игор Петкоски. Во својство на сведоци денеска требаше да се појават поранешниот министер з аобразование Јетон Шаќири и раководителот на секторот за финансии при Општина Струга Абедин Нуроски....

Капитенот на Ливерпул, Вирџил ван Дијк, потврди денеска дека неговиот менаџерски тим е во преговори со клубот од „Енфилд Роуд“ за продолжување на соработката. „Се водат дискусии, но во моментов не знам многу за тоа. Ќе видиме што ќе се случи“, рече Ван Дајк. Триесетитригодишниот Ван Дијк пристигна во Ливерпул во 2018 година од Саутемптон и освои сè што е можно со „црвените“ – Премиер лигата, Лигата на шампиони, Лига купот двапати, ФА Купот и Светското клупско првенство. „Целосно сум фокусиран на натпреварите со Ливерпул и сакам да победувам. Ништо друго не ме интересира во моментов. Се чувствувам многу добро физички и психички, а исто така се забавувам на теренот. Целосно сум посветен на Ливерпул и само сакам да помогнам оваа сезона да биде успешна“, додаде холандскиот дефанзивец....

Суспензии и парични казни на Работнички и МЗТ Скопје Аеродром им изрече денеска македонската кошаркарска Федерација (КФСМ) инцидентот што се случи за време на саботното градско прволигашко дерби во СРЦ „Кале“. Поради слаба организација, прекин на натпреварот и влез на навивачи со пиротехнички средства и нивно користење за време на натпреварот, Работнички е казнет со вкупна глоба од 68.000 денари. Дополнително, Работнички е суспендиран два натпревари без публика на домашен терен. На актуелниот шампион МЗТ Скопје Аеродром му е изречена парична казна од 64.000 денари поради фрлање предмети на теренот, користење пиротехнички средства и прекин а натпреварот. Суспендиран е и теренот на МЗТ Скопје Аеродром со еден натпревар без публика на трибините....

Во Црна Гора стапи во сила забраната за употреба на пластични кеси и пластика за еднократна употреба, согласно Законот за управување со отпад, а за непочитување на оваа законска одредба се предвидени казни од 1.000 до 40.000 евра. Законот за управување со отпад стапи во сила на 20 април, а примената на неговите одредби беше предвидена шест месеци од влегувањето во сила, пренесуваат црногорските медиуми. Освен пластичните кеси, се забрануваат и пластичните сламки, како и приборот за јадење и одредени кутиите за пакување храна. Продавачите кои нема да го почитуваат законот можат да бидат казнети со 1.000 до 40.000 евра, додека казните за физички лица се од 500 до 2.000 евра....

Министерот за здравство Арбен Таравари е оптимист дека наскоро ќе се најде решение за колективен договор, кој ќе го опфати целиот медицински персонал. Тој вечерва, во телевизиско гостување, најави 1 500 вработувања наскоро и 300 идната година. Оваа недела, рече Таравари, со премиерот и министерката за финансии ќе го разгледаат колективниот договор со кој би се решило прашањето на медицинските работници барем за наредните десет години. Тој очекува најмалку 1 800 вработувања во првата година од владеењето на коалицијата ВМРО-ДПМНЕ, „Вреди“ и ЗНАМ. Како што потенцира министерот, идејата за нов клинички центар не е откажана, но прво треба да се изградат болниците во Штип и Кичево. -Ние сме во преговори со сите здравствени синдикати и се надевам дека набргу ќе седнеме, мораме да седнеме со премиерот и да се договориме за колективниот договор којшто би бил решение за сите здравствени работници. И тоа е решение за следните десет години, да немаме главоболки со медицинските работници. Јас се надевам дека неделава ќе седнеме и со министерката за финансии и со премиерот и со здравствените синдикати за евентуално да се договориме. Секако дека ќе има покачување на платите, посебно кај средномедицинскиот персонал, напомена Таравари во интервјју за „360 степени“. Според него, има добро расположение кај премиерот да се изнајде решение за „договорците“ кои се ангажирани со години. -Има луѓе кои се по пет до десет години „договорци“. Работат во здравство со плати под минималната и мислам дека е греота за тие луѓе. Мораме да изнајдеме решение и се обидуваме. Се надевам дека набрзо и тоа ќе го кажеме дефинитивно дали ќе биде. Оптимист сум дека ќе ја завршиме оваа работа. За 600 доктори специјализанти, тие што протестираа десет години, веќе има решение и оваа година ќе се вработат 300 и идната година уште 300. Тоа се вкупно 600 доктори, тоа е огромен „буст“ за јавното здравство. И ако успееме 1 200 средномедицински кадар, генерално ќе бидат болничари, хигиеничари, сестри, лаборанти, тоа се 1 800 вработувања, нагласи министерот за здравство. Тој е дециден дека апсолутно е неопходен нов клинички центар. -Искрен да бидам до крај, повеќе министри кажале дека ќе направиме нов клинички центар и никогаш не се изградил за 30 години. Мене ми изгледа несирозно сега да кажам дека ние ќе изградиме. Јас како министер за здравство сум го споделил ставот со премиерот дека на Македонија во Скопје и треба нов достоинствен клинички центар. Ако почнеме денеска со клинички центар, минимум ќе ни требаат 5 до 7 години за да биде тоа функционално и сите пациенти, доктори, медицински персонал да одат во новиот клинички центар, подвлече Таравари. Работна група, информира, веќе интензивно работи на интегрирање на Клиничкиот центар, на здравствените домови и болници, но за целиот тој процес ќе треба време, а 1 јануари 2026 е најоптимистичниот датум за клиниките интегрирано да профункционираат....

По завршувањето на Централното претседателство на Демократската унија за интеграција ДУИ, портпаролот Арбр Адеми информираше за заклучоците. Тој рече дека се анализирала актуелната политичка состојба, а како заклучок е донесен дека таа влијае врз меѓуетничките односи. -ДУИ ги следи со сериозност и загриженост сите политички случувања во земјата и во регионот, почнувајќи од оддалечувањето на нашата земја од европската Унија и разделување на Албанија од пакетот со Македонија, визави европска Унија и затоа оценуваме дека тоа лошо влијае врз меѓу етничките односи во земјава. Потоа Централното претседателство изразува загриженост и за меѓуетничките односи, кои нели се напаѓаат од политиките на оваа моноетничка влада, без легитимитетот на сите етнички заедници. Исто така апелираме и до меѓународниот фактор, кои се потписници на Охридскиот мировен на договор особено до Соединетите американски држави и Европската унија за ангажирање, продолжување на нивниот ангажман за почитување на Охридскиот мировен на договор, истакна Адеми. За втората точка рече дека е одлучено да почнат предложeните отворени седници на ограноците на ДУИ со граѓаните. За протести не било дискутирано, иако како што рече Адеми тоа е дел од агендата, но се уште не е на дневен ред. -Почнуваат оваа недела. Во среда ќе биде таква средба која се организира од огранокот на демократската унија за интеграција во општина Липково во 19 часот, па продолжува со Сарај во рамки на огранок. Така што и за другите средби од ваков тип отворени состаноци на ДУИ со народот со граѓаните ќе се организираат и во сите ограноци. На овие средби ќе учествува и највисокото раководство на ДУИ. Ќе им објасниме на граѓаните за сите политички случувања во земјата и во регионот, за сите овие неуспеси со кои ние се оддалечуваме од Европската Унија. На крај секако, тоа што ќе биде, нивна волја ќе биде преточено во наши конкретни политички активности и генерално во конкретна нашата политика, ќе се крои во сите таму во сите овие отворени средби што ќе ги имаме со ограноците, потенцираше Адеми. На новинарско прашање дали најавената поддршка за уставни измени значи и прифаќање на идејата да се смени Уставот, но со одложено дејство, Адеми рече дека тоа претставува оддалечување од стратешките цели. -Ние ја истакнуваме важноста за блиска координација на нашата земја со Европската унија, а мислиме дека сето она што е постигнато досега е како објект на договор меѓу нашата земја и Европската Унија. Секој обид за оддалечување, реформулирање на тие обврски што произлегуваат од Преговарачката рамка е обид за да не се реализира нашата стратешка цел. Така што ние велиме, времето, било пред, година и пол, две години за уставните измени, но и сега велиме ајде, повелете, да ги процесуираме уставните измени и ќе имате поддршка од ДУИ, рече Адеми. Портпаролот рече дека повторно на состанокот на ДУИ било дискутирано за законот за ветинг, за кој како партија бараат да се донесе заради зголемување на довербата на граѓаните пред се во правосудството. -Се истакна и одлуката на нашата политичка партија која е донесена одамна за истрага за сите политички партии во земјата, без исклучок, почнувајќи од ДУИ до последната политичка организација. Исто така истрага за потеклото на богатството на секој политичар кој е е или бил носител на јавна функција или носител уште е на партиска функција, без исклучок. Истражување за процесот на приватизација на земјата од денот на осамостојувањето на нашата земја па до денеска, истакна Адеми....

Јас сум меѓу ретките оптимисти во државата и продолжувам да мислам дека многу скоро ќе ги почнеме преговорите со ЕУ, рече вечерва министерот за здравство и еден од лидерите на коалицијата „Вреди“, Арбен Таравари. Како што истакна Таравари во емисијата „360 степени“ на МРТ 1, неопходно е прифатливо решение, а земјава мора да добие гаранција дека нема да биде повторно условувана. Според него, не е лоша идејата на премиерот Мицкоски, уставните измени да се изгласаат, но да стапат во сила кога Бугарскиот парламент ќе го ратификува пристапниот договор на Македонија во ЕУ. За „Вреди“, напомена Таравари, воопшто не е добро да оди на локални избори со блокирани евроинтеграции. -Не е добро што се одделивме со Албанија, но добро е што тие го почнаа процесот. Не мора Албанија да остане со нас, иако јас мислам дека пречката за Албанија беше вештачка. Премиерот Рама беше многу коректен, дека Македонија заслужува да ги почне преговорите. Мислам дека не е купување време, се бара моментум, се бара и некаква гаранција за државата и да ги почнеме преговорите. Се надевам дека со Албанија паралелно ќе течат преговорите, многу сум оптимист во ова и се уште мислам дека сите држави на Западен Балкан истовремено ќе се зачленат во ЕУ, истакна Таравари. Тој верува дека ќе се изнајде решение кое ќе биде прифатливо за земјава, но неспорно е, како што рече, дека ќе мора да ги направиме уставните измени за да ги почнеме преговорите. -Сепак, истовремено, ќе ни треба гаранција дека нема повторно да се бара нешто од нас, дека повторно ќе бидеме условувани. Свесни сме дека рамката со Бугарија не се менува и дека на Македонија ќе и требаат уставни измени, но ни треба и некаква гаранција, барем од центрите со влијание во светот, дека нема повторно да се бара нешто од нас. Ако продолжиме вака, различни држави може да поставуваат различни условувања, дециден е Таравари според кој, се се комплицира зашто во Бугарија нема стабилна влада. На прашањето дали премиерот Мицкоски му кажал на што го темели оптимизмот за пристапниот процес на земјава во ЕУ откако се врати од самитот во рамки на Берлинскиот процес, Тараври одговори дека не разговарале дикректно. -Она што ме радува е дека тој е европски ориентиран и сака Македонија да ги почне преговорите што поскоро, меѓутоа, секако, како премиер бара некакви гаранции да немаме и други пречки. Ни се случува како држава од 2018 година да ни се ветува дека ги почнуваме преговорите, да направиме одредени попуштања и пак да не ги почнеме, истакна Таравари. За законот за правична застапеност, тој нагласи дека е неопходна синхронизација во владината коалиција. Обелодени и дека во Работната група за подготовка на законот, освен вицепремиерот Арбен Фетаи кој доаѓа од Алијансата за Албанците, ќе членуваат и високи претставници на ВМРО-ДПМНЕ и ЗНАМ, кои ќе ги „пеглаат“ разликите во законското решение. Таравари не сакаше да открие врз основа на каков механизам ќе се води сметка за правичната застапеност. -Сите партии во владината коалиција треба да се синхронизираат и да произведат конечен закон за правична застапеност. Мора да најдеме прифатливо решение кое може да се имплементира. Правичната застапеност е уставна категорија и за тоа треба закон. Ние имавме закон подготвен од наши експерти во партијата. Се консултиравме и со Советот на Европа и со меѓународни и експерти од државата. Но, за законот да биде конечен, треба да се синхронизираат сите партии во владината коалиција, истакна Таравари. Тој се осврна и на Уставниот суд кој, како што подвлече, ги отвори двете прашања, и законот за јазици и законот за балансерот. -Тие два предмета стојат од 2018/2019 година и сега им требаа 100 дена Влада за да ги актуелизираат веднаш. Ме прашуваат за пратениците на ДУИ, Европскиот фронт има и од турска партија, меѓутоа има и еден човек што не е од ниту една партија. Тоа е Мурат Сали. Тој е бивш претседател на Уставниот суд. Во една дебата некој ми рече дека тој е од Турската демократска партија. Не е вистина. Тој не е член на Турската демократска партија. Нема своја партија. Нема ниту невладина организација. Не е предложен од некого. Тој е земен од Ахмети како личност и денес е пратеник на ДУИ. Дали имал цел, дали е намерно или ненамерно – тоа те асоцира, во слободни асоцијации на Фројд, дека баш зема пратеник кој е Турчин, кој не е претставник на некоја партија или на некоја невладина организација, а е бивш претседател на Уставниот суд и моментално се актуализираат поради првите сто дена на Владата, две теми за кои не е моментот во првите три месеци да се разговара, рече Таравари. Тој е уверен дека ДУИ има влијание, не само во Уставниот суд, туку во сите судски органи и генерално, во правниот систем во државата. -Дефинитивно мислам дека ДУИ го „тригерира“ ова за да излезе на површина, оцени Таравари. На прашањето дали требаше да се бараат механизми за да се ограничи злоупотребата на „балансерот“, а не да се укинува, Таравари рече дека неговото укинување било во програмата на ВМРО-ДПМНЕ, а имало и стратегија за администрација донесена од Владата, потпишана и од Бујар Османи, Крешник Бектеши, Кренар Лога и уште некој од поранешните министри на ДУИ, која предвидела укинување на „балансерот“. -Ние се договоривме со ВМРО-ДПМНЕ да причекаме да подготвиме закон, па после да го тргнеме ’балансерот’. И ова ни се случи неочекувано – Уставниот суд веднаш да ги исфрли на површина. Треба да бидеш малоумен и да веруваш дека Уставниот суд случајно и двата предмети – и за употреба на албанскиот јазик и за ’балансерот’ – ќе ги стави во првите три месеци од мандатот на новата влада, нагласи Таравари. Негов став во однос на Агенцијата за национална безбедност (АНБ) е дека на нејзино чело не смее да биде партиски човек. За Бојан Христовски немам доволно информации. Читав нешто по медиуми и по портали, но не мора да значи дека сите тие информации се веродостојни. Ни требаат информации да собереме од сите страни и да се разговара. Ако е добро како решение, треба да продолжи. Ако не е добро, повторно премиерот треба да одлучи. Таму не смее да биде партиски човек. Генерално, гледам дека премиерот наоѓа решенија кои се релативно прифатливи, генерално зборувам, не велам стопроцентно, така што ќе видиме, ќе разговараме повторно, да ги добиеме сите информации, напомена Таравари....

По острите реакции на опозициските парии и дел од јавноста дека е прекршено секакво право при апсењето на поранешниот претседател и актуелен лидер на Партијата на слободата, Илир Мета, доцна попладнево полицијата излезе со соопштение во однос на начинот на апсењето. -Со обврска кон јавното мислење во однос на начинот на апсењето на граѓанинот И.М., појаснуваме дека државната полиција го изврши решението на Специјалниот суд против организиран криминал и корупција (ЃККО). Тоа по барање на Специјалното обвинителство за приведување на И.М. (55), со преземање оперативни мерки, согласно предвидените законски процедури, стои во соопштението. Околу 13:15 часот, Државната полиција добила информација, а потоа утврдила дека на местото викано „Кривината кај Камза“, во населбата Лапрака, со возило во правец кон Тирана се движел И.М. Во овој момент возилото било сопрено, а водачот на оперативната група му ја соопштил на И.М судската одлука за безбедносна мерка „затворски притвор“ и од него било побарано да излезе од возилото. -Граѓанинот И.М. одбиваше да го стори тоа и упати навредливи зборови кон претставниците на полицијата и правдата. Врз основа на процедурата предвидена со Уредбата, тој бил изваден од возилото и присилно приведен. Нагласуваме дека употребата на сила при апсењето била наметната со неговото насилно противење на спроведувањето на судската одлука, што му била соопштена од вработени во полицијата, се наведува во полициското соопштение. Според дел од медиумите, од маскирани припадници на специјалната полициска единица и агенти од Националното биро за истраги, возилото во кое бил Мета, било следено од граничниот премин Морина, на албанско - косовската граница, веднаш по влезот на албанска територија од Косово, каде што од вчера престојувал тој. Возилата биле со граѓански регистарски таблички и се движеле долж целата должина едното пред а другото зад возилото на Мета а го сопреле во близина на трговскиот центар „Каса Италија“ во Тирана при што насилно бил внесен во полициското возило...

Според неофицијални информации кои вечерва ги објавија белградските медиуми, српскиот тенисер Новак Ѓоковиќ (37) нема да настапи на претстојниот Мастерс турнир во Париз. Ѓоковиќ нема да ја брани титулата во салата Берси, а тоа речиси сигурно значи дека нема да игра во финалето на АТП во Торино, дури и да се пласира меѓу осумте најдобри играчи во светот, објави Спортклуб. Мастерсот во Париз е закажан од 28 октомври до 3 ноември. Ѓоковиќ има седум титули на турнирот во Париз, од кои последната ја освои лани....

Огранокот на Партијата на слободата за општина Пустец, остро реагираше во однос на апсењето на партискиот лидер Илир Мета и „нечовечкиот однос при овој чин“. -Ова не е ништо друго туку политички прогон од страна на премиерот Еди Рама врз претседателот Илир Мета, што во Албанија е сериозен показател за влошувањето на демократијата и злоупотребата на власта. Ова ќе ја дестабилизира политичката сцена, зашто е директен напад врз независноста на институциите и личните слободи, објави Панди Јани, претседател на огранокот и познат активист за правата на Макдонците. Додава дека „претседателот Мета, познат по своите критики кон владините политики, е цел на обвиненија и политички притисоци, што предизвикува загриженост кај домашната и меѓународната јавност“. -Особено ние, Македонците во Република Албанија, сме длабоко загрижени од нечовечкиот однос и приведувањето на претседателот Илир Мета, единствениот политичар, кој јавно и искрено ги поддржа нашите права и интереси, кој секогаш знае да каже за нас прекрасната македонска заедница. Овој чин е удар врз демократијата и малцинските права, што може да има далекусежни последици врз стабилноста и мултиетничката хармонија во Албанија, се наведува во соопштението. Се посочува дека ова е „добро смислен удар врз целата опозиција“, пред парламентарните избори што треба да се одржат во април идната година....

Резултатите од изборите во Молдавија покажуваат дека демократијата во земјата останува силна и покрај обидот на Русија да ја поткопа, изјави портпаролот на Советот за национална безбедност на Белата куќа, Џон Кирби. Истовремено, Кирби ги поздрави резултатите од референдумот на кој Молдавците гласаа за влез во ЕУ, нагласувајќи дека тоа е чекор напред во европската интеграција на Молдавија. „Резултатите покажуваат дека молдавската демократија е силна“, рече портпаролот на Советот за национална безбедност во Белата куќа...

Рускиот претседател Владимир Путин и неговиот турски колега Реџеп Таип Ердоган на средба во Казан ќе разговараат за можноста за создавање центар за гас на турска територија, соопшти прес-службата на шефот на руската држава. Путин ќе биде домаќин на самитот на БРИКС од утре до 24 октомври во Казан, главниот град на Република Татарстан во рамките на Руската Федерација. „Воспоставена е ефикасна соработка со турските партнери во гасниот сектор. Стабилно функционираат гасоводите „Син поток“ и „Турски поток“ по дното на Црното Море. Во рамките на средбата во Казан, шефовите на држави ќе го разгледаат и прашањето за проект за создавање меѓународен гасен центар на турска територија“, се наведува во соопштението. Во октомври 2022 година, Путин предложи идеја за создавање центар за гас на турска територија за испорака на гас во Европа. Ердоган ја поддржа идејата...

Албанскиот премиер, Еди Рама, говорејќи на настанот „Пратеник каков сакаме“, меѓу другото се осврна и на последните апсења по налог на Специјалното обвинителство против организиран криминал и корупција, СПАК, иако не спомена имиња. Рама за време на својот говор рече дека денес „албанската политика е во деликатен момент, каде што еден дел е деградиран, па затоа оние со валкани раце се кријат, за да се отвори патот за обновување“. -Чистите раце прават едно, валканите раце друго, отворените едно, скриените друго. Значи, потребна е многу сила, многу внатрешна моќ да не се откажеме, бидејќи политиката во Албанија денес е во момент на деградација, како што е истовремено и момент на преобликување. Тоа е како тело кое поминало низ одредена фаза и сега почнува да се преобликува бидејќи има многу деградиран дел од себе и има внатрешен нагон да се обнови. Социјалистичката партија, има должност да го одложи ова обновување. СП е најстарата и најмладата партија во Албанија, ова е причината зошто СП победи и ќе победи повторно, рекол Рама. Додал дека да бидеш сила со историја не е слабост, туку многу важен капацитет што можеш да го ставиш на располагање на државата. -Но, кога доминира сила со мината историја, а иднината се гледа низ очите на минатото, тогаш таа сила е застарена. Но, кога една сила со историјата е иднината што доминира во погледот, а минатото се гледа низ очите на иднината, тогаш ова е сила колку стара толку и нова. Напорот ова да се претвори во начин на живеење и начин на соработка со Албанија е неопходен. Имам добри вести, транзицијата во Албанија заврши. Албанија денеска е на маса каде преговара за интеграција во ЕУ, посочил Рама. За мене, нагласил, минатата недела беше нај историскиот момент откако дојдов на функцијата премиер „историски момент да покажеме што требаше да тргнеме од грб како товар од минатите моменти, да покажеме дека сме сила која може да ја гарантира иднината“....

Администрацијата во Вашингтон прогласи за национален морски резерват уште еден дел од пацифичкиот брег на САД, Националниот морски резерват Чумаши, кој ќе стане трет по големина национален морски резерват во Америка, јави денеска Гласот на Америка. Станува збор за резерват чија територија и крајбрежје се наследството на народот Чумаши – едно од називите на домородните племиња чии претставници живеат во јужните и централните делови на Калифорнија. Морскиот резерват на наследството на Чумашите ќе зафаќа територија од околу 1,2 милиони хектари. Неговото крајбрежје ќе се протега од нуклеарната централа Диабло кањон на север до плажите Гавиота во близина на Санта Барбара на југ. Со ова во САД сега ќе има 17 морски резервати. Националниот морски резерват Чумаши на југоисток ќе граничи со друга заштитена зона – морскиот резерват Чанел ајлендс и истоимениот национален парк. Националната управа за океански и атмосферски истражувања на САД (НОАА) соопши кои се целите за пргласување на резерватот. Прво, тоа е заштита на биодиверзитетот, при што ова е првиот резерват создаден за оваа цел во изминатите три децении (три други, создадени во овој период, се насочени главно на зачувување на морската историја и крајбрежната култура). Новиот резерват, исто така, претставува удобен „транспортен хаб“ за локалната фауна: НОАА ја истакнува важноста за зачувувањето на слободата на движењето и миграциите на животинските видови. Посебено што споменува НОАА е морската историја на регионот, потсетувајќи дека долж овие брегови поминувале важни трговски патишта. Во извештајот на агенцијата се наведува дека во овој регион се документирани повеќе од 200 бродоломи, вклучувајќи крајбрежни шхуни, мали едрилици и пароходи – како познатиот брод Yankee Blade, пароход што сообраќал меѓу Сан Франциско и Панама до неговиот бродолом во 1854 година....

Италијанската премиерка Џорџа Мелони и катарскиот емир Тамим бин Хамад Ал Тани во заедничко соопштение потпишано денеска за време на нивната средба во Рим наведуваат дека двете земји ќе го продлабочат воспоставувањето италијанскиот воен центар во Катар. „Ја нагласуваме нашата посветеност за продлабочување на нашето стратешко партнерство по прашањата за одбраната, како на воено така и на индустриско ниво“, се вели во соопштението, пренесе италијанската новинска агенција АНСА. Мелони и Ал-Тани во заедничкото соопштение наведуваат дека особено, користејќи чести размени на посети и заеднички програми и активности за обука, изразуваат подготвеност да истражуваат нови начини на соработка, продолжувајќи ја дискусијата за воспоставување италијански воен логистички центар во Катар и промовирајќи ја координацијата на извозот во регионот....

Под наслов „Симболиката на СПАК! Случајност или? Ора њуз, објавува дека токму на денешен ден, пред една година, законски мерки биле преземени и кон лидерот на Демократската партија, Сали Бериша. - Лидерот на Партијата на слободата, Илир Мета, денеска, 21.10.2024 година, беше флагрантно уапсен во неговиот автомобил додека одел кон седиштето на партијата. За потсетување, на истиот датум, пред точно една година, мерката обврска за јавување и забрана за излез од земјата, со одземање на патната исправа, беше изречена и за лидерот на Демократската партија, Сали Бериша и двајцата поранешни шефови на абанската држава и екс-премиери, наведува телевизијата. Додава дека бидејќи Бериша не ги почитуваше двете мерки на 30 декември 2023 година му беше одреден домашен притвор а деновиве Специјалниот суд против организиран криминал и корупција за 24 октомври го закажа прелиминарното рочиште за досието „Партизан“ во кој се обвинети Бериша, неговиот зет за ќерка и уште неколку бизнисмени од областа на градежништвото. -Денеска, по наредба на СПАК, Мета беше уапсен во врска со досието за скандалот со лобирање во САД и ЧЕЗ-ДИА, обединети во едно. Мета се товари за перење пари, корупција во 3 случаи и непријавување приходи. Специјалниот суд и одреди мерката задолжително јавување и на неговата сопруга Моника Круемади, која е пратеничка. Домашен притвор е изречен и на две други лица Ема Чок и Пиро Џиџо, татко на потпретседателката на Партијата на слободата, Ериса Џиџо, посочува Ора њуз....

Со два натпревари во кои бранителот на титулата Бостон е домаќин на Њујорк, додека ЛА Лејкерс ја пречекува, утре официјално стартува 79. сезона во кошаркарската НБА лига. Регуларниот дел од сезоната ќе се игра до 13 април идната година, а плејофот ќе стартува шест денови подоцна. Почетокот на финалната серија е закажан за 5 јуни. Домаќин на Ол стар викендот оваа сезона ќе биде Сан Франциско од 14 до 16 февруари...