„Секретаријатот за европски прашања ќе се фокусира на забрзување на текот на реформите и подобрување на улогата на СЕП во координирање на реформите, преку повторно враќање или воспоставување на работни групи кои ќе ги следат реформите“ кажа вицепремиерот за европски прашања, Бојан Маричиќ во емисијата „Топ тема“ на Телма. Тој додаде дека со оваа активност ќе се започне веднаш и на некоја од следните седници на Владата ќе предложи активирање на структурата за следење и координација на реформите, но и за подготовка за преговорите. „СЕП ќе има три крупни точки на кои ќе се фокусира: координирање на реформите, подготовка на преговарачките структури и подобрување на искористувањето на ИПА фондовите и координација на целокупната странска помош“ кажа Маричиќ. Тој кажа дека верува оти со остварувањето на овие приоритети државата ќе може со побрзо темпо да се движи кон и во преговорите со Европската Унија....

„Со прифаќањето на краткото име на државата Северна Македонија од страна на Бугарија и двете страни направивме заеднички чекор и затвориме едно отворено прашање што ни предизвикуваше проблеми во дел од меѓународните организации“ кажа вицепремиерот Бојан Маричиќ во емисијата „Топ тема“ на Телма. Тој додаде дека овој проблем бил решен со еден чекор, односно со испраќање на нота до Обединетите Нации во која објаснуваме дека Северна Македонија и Република Северна Македонија е исто. „Објаснивме дека Северна Македонија го означува географскиот простор на Република Северна Македонија и немаме никакви тероторијални претензии кон ниту една држава. Со тоа го затвориме ова прашање и Бугарија ја менува својата позиција и почнува да го користи краткото име“ кажа Маричиќ. Вицепремиерот додаде дека досега заради овој проблем државата не можела да го користи краткото име во повеќе меѓународни институции, вклучувајќи ја и Европската Унија....

„Секој има право да се декларира во која етничка заедница пропаѓа и тие права да ги остварува во рамките на државата каде што живее. Постојат голем број конвенции, принципи, повелби и декларации кои ги заштитуваат малцинските права. Никому не ускратувам право да се декларира како што мисли дека треба, а за сите отворени прашања, па и тие за малцинствата ќе разговараме со бугарската страна“ кажа вицепремиерот за европски прашања, Бојан Маричиќ во емисијата „Топ тема“ на Телма. Тој додаде дека во 36. Амандман од Уставот на Република Северна Македонија стои дека државата нема да се меша во внатрешните прашања на било која друга држава и во таа насока беше неговата изјава. „Доколку во Бугарија има луѓе кои се декларираат како Македонци, тоа е нивно право и никој не може тоа да им го ускрати. Нивниот статус, зависи од државното уредување на Бугарија и правата кои таа им ги дава“ кажа Маричиќ. Вицепремиерот додаде дека постојат механизми во Советот на Европа и Европскиот суд за човекови права кои ги штитат правата на малцинствата. MИА...

Екатерина Захариева, поранешната шефица на дипломатијата на Бугарија која го разгоре спорот со Македонија, е разочарана од изјавата на премиерот Кирил Петков – дека историјата ќе стане второстепено шпрашање во преговорите со нашата држава. „Ако треба во една реченица да ја сумирам прес-конференцијата на премиерите на Бугарија и на Република Северна Македонија, тоа би било дека историјата, промената на наставните програми, прекинот на јазикот на омразата, заштитата на правата на македонските Бугари репресирани поради нивната бугарска самосвест и отстранувањето на таблите со дефиниции за окупатори, бугарски фашисти, остануваат во втор план. Ова се најчувствителните и најтешките работи за преговарање и тие, всушност, се во срцето на Рамковната позиција и Декларацијата на Собранието. Договореното испраќање нота до ОН од страна на РСМ, всушност не е договорено денес , а на колегите во Скопје им требаше година и половина за тоа. Ќе видам за возврат какви отстапки ќе има од наша страна. Можеби попуштањето е ставот дека најважните работи за Бугарија ќе останат во втор план, како што соопштија денеска и двајцата премиери. Премиерот на РСМ рече: „Историјата ќе биде второстепена“. Иако пред неколку дена владата негираше дека ќе се одржи меѓувладина средба по изјавата за медиумите на шефот на дипломатијата Османи, денеска стана јасно дека таа ќе се одржи на 25 јануари. На оваа средба ќе се договорат петте работни групи кои исто така не се нови, туку се дел од Договорот од 2017 година.Авиокомпанијата Софија-Скопје ќе биде достапна за 60 дена. Ова го соопшти Кирил Петков. Не е јасно кој ќе биде превозникот и кој ќе ги сноси трошоците. Заклучок од посетата на премиерот е дека нема договорено ништо ново, а сите чувствителни работи за Бугарија остануваат во втор план. Новата бугарска влада падна во стапицата на Скопје да известува за псевдо-напредок преку бројни состаноци, седници, ветувања, без всушност ништо да направи, а понекогаш дури и да го негира веќе договореното, реагира Захариева. Извор: Независен.мк...

Mинистерството за здравство соопшти дека во последните 24 часа Направени се 7.038 тестови, а регистрирани се 2.269 нови случаи на КОВИД-19: • Скопје – 1.169• Битола – 183• Прилеп – 165• Куманово – 88• Кавадарци – 56• Гевгелија – 48• Охрид – 44• Тетово – 43• Струмица – 35• Кочани – 34• Гостивар, Велес и Кичево – по 33• Ресен – 32• Струга – 31• Неготино – 26• Крива Планка, Радовиш и Берово – по 24• Делчево – 19• Валандово – 15• Демир Хисар – 14• Свети Николе и Кратово – по 13• Штип и Крушево – по 11• Македонски Брод – 9• Виница и Македонска Каменица – по 8• Пехчево – 7• Пробиштип, Богданци и Дојран – по 5• Демир Капија – 1. Од вкупниот број на позитивни (2.269), регистрирани се 310 реинфекции. Во текот на изминатите 24 часа регистрирани се 13 починати лица: 5 починати лица од Скопје (64г, 66г, 68г, 79г и 82г), 3 од Струмица (58г, 61г и 66г), 2 од Кавадарци (52г и 87г) и по едно починато лице од Куманово (73г), Струга (77г) и Охрид (54г). Пријавените лица се починати во болнички услови. Согласно Регистарот на умрени лица со дијагноза КОВИД-19 од Мој Термин, пријавени се 11 починати лица од Гевгелија (4), Струмица (2), Струга (2), Кичево (2) и Богданци (1) починати во период од 03-16.01.2022. Починатите се на возраст од 47г до 87г. Од пријавените случаи 3 се починати во домашни услови и 8 се во болнички услови. Регистрирани сe 1.420 оздравени пациенти од: • Скопје – 790• Битола – 124• Прилеп – 86• Охрид – 76• Кавадарци – 40• Куманово – 27• Штип – 26• Струмица – 23• Гевгелија, Велес и Кичево – по 22• Ресен и Неготино – по 15• Валандово – 14• Тетово – 13• Кочани – 12• Делчево – 11• Струга – 10• Гостивар – 9• Радовиш – 8• Крива Паланка, Свети Николе, Крушево и Македонски Брод – по 7• Пробиштип – 5• Демир Хисар и Виница – по 4• Македонска Каменица и Пехчево – по 3• Берово, Богданци и Демир Капија – по 2• Дојран и Дебар – по 1. Досега во земјата се направени вкупно 1.717.482 тестирања на Ковид-19. Вкупната бројка на КОВИД-дијагностицирани лица во нашата земја од почетокот на епидемијата изнесува 247.663, бројот на оздравени пациенти е 222.306, на починати е 8.139, а бројот на активни случаи изнесува 17.218....

Масовниот убиец Андерс Беринг Брејвик упати нацистички поздрав кога влезе во судот на сослушување за условна казна, каде се одлучува дали тој ќе биде ослободен откако помина повеќе од една деценија во затвор. Брејвик, екстремно десничарски екстремист, уби 77 луѓе во најголемото мирновременско злосторство во Норвешка во јули 2011 година. Тој уби осум лица со автомобил во Осло, а потоа 69, главно тинејџери, во камп за млади од Лабуристичката партија на островот Утоја. . Со избричена глава и облечен во темен костум, Брејвик со прстите го направи знакот на белите супремисти пред да ја крене десната рака во нацистички поздрав за да ја сигнализира својата крајнодесничарска идеологија кога влезе во судницата. Гестот „ОК“ е всушност кампања присвоена од екстремно десничарските екстремисти од платформата 4chan и наводно ја претставува „белата моќ“. Го користеа многу десничарски групи за да ги „тролаат“ либералите, а симболот на крајот го искористија вистинските супремисти, пренесува Радио Слободна Европа. Брејвик, исто така, донесе натписи на англиски јазик во судницата, вклучително и еден на кој пишуваше „Запрете го геноцидот над нашите бели нации“ и „Нацистичка граѓанска војна“. Подоцна му било кажано да престане да ги покажува додека обвинителството ги изнесува своите тези. – Не сакам да видам ништо слично кога ќе зборува обвинителството, рече судијата Даг Бјорвик. Брејвик одмавна со главата додека обвинителството ги презентираше своите аргументи, вклучително и извадок од оригиналната пресуда од 2012 година во која се вели дека обвинетиот сепак ќе биде многу опасен човек дури и по отслужувањето на 21 година затвор. Неговиот адвокат Ојштајн Сторвик изјави дека Брејвик има намера на крајот да го обезбеди своето ослободување. Обраќајќи се пред судот, Брејвик за своите злосторства ја обвини онлајн радикализацијата од страна на мрежа на крајнодесничарски екстремисти без лидер, која, како што рече, ги мотивирала неговите напади. – Ми го испраа мозокот, рече Брејвик. – Наредбата беше… повторно да се воспостави Третиот рајх. А како да се направи тоа одлучува секој војник, рече тој. Брејвик, кој се опиша себеси како кандидат за пратеник, исто така рече дека ќе ја продолжи својата борба за белата надмоќ и нацистичката доминација, но по мирен пат.. Брејвик, кој сега има 42 години, отслужува максимална казна, која во Норвешка изнесува 21 година, но која може да биде продолжена на неодредено време доколку се смета за континуирана закана за општеството. Судот Телемарк во Скиен, југозападно од главниот град, каде што Брејвик ја отслужува својата казна, ќе го разгледува случајот откако државното обвинителство во Осло минатата година го одби барањето на Брејвик за предвремено ослободување. Постапката ќе се одвива најмногу четири дена во затворската спортска сала, која е претворена во импровизирана судница, а одлуката се очекува приближно седум дена подоцна, посочува РСЕ. Ако неговото барање за ослободување биде одбиено, Брејвик, кој го смени официјалното име во Фјотолф Хансен, би можел да поднесе барање за ново сослушување за условна казна за една година, соопшти главната обвинителка Хулда Карлсдотир. Брејвик го загуби случајот за човекови права во 2017 година кога апелациониот суд ја укина одлуката на понискиот суд дека неговата изолација во ќелија со три соби била нехумана. MИА...

Владата на Република Северна Македонија на денешната трета седница, којашто се одржа преку видео конференциска врска, донесе Одлука за утврдување на бројот на наставните денови во учебната 2021/2022 година во основните училишта во услови на вонредни околности. Со оваа одлука бројот на наставните денови во учебната 2021/2022 година во основните училишта во услови на вонредни околности се утврдува на 172 наставни денови, што значи дека зимскиот распуст на учениците ќе трае до 1 февруари 2022 година, а учебната година ќе заврши на 10 јуни 2022 година. Одлука со истата содржина е донесена и за средните училишта, што значи дека и во овие образовни институции бројот на наставните денови во учебната 2021/2022 година во средните училишта во услови на вонредни околности се утврдува на 172 наставни денови односно 158 наставни денови за завршната година на средното образование, зимскиот распуст на учениците ќе трае до 1 февруари 2022 година, а учебната година ќе заврши на 10 јуни. Одлуката за почетокот на второто полугодие во основните и средните училишта за први февруари годинава е донесена на претходната седница на Владата и по препораката на Главниот координативен кризен штаб согласно епидемиолошките информации дека земјата се наоѓа во пик на заразата. Со денешната одлука се овозможува соодветна адаптација на наставните програми со цел запазување на датумот 10 јуни како краен рок за завршување на учебната година....

Потребно е враќање на довербата меѓу двете влади, што ќе придонесе за засилување на добрососедските односи и политичкиот дијалог за почувствителните прашања. Надминувањето на меѓусебните недоразбирања е важно за напречено одвивање на македонските евроинтеграциски процеси, како и за неутрализирање на растечкиот евроскептицизам и негативните тенденции во регионот, рече претседателот Стево Пендаровски на денешната средба со бугарскиот премиер Кирил Петков кој престојува во официјална посета на земјава. Пендаровски истакна дека Република Северна Македонија во духот на добрососедството и почитувањето на принципот на еднаквост меѓу двете страни, има силна политичка волја да го продолжи дијалогот, со цел изнаоѓање компромисно решение за отворените прашања. -На средбата се разговараше за можностите за унапредување на билатералната соработка во повеќе сфери од заеднички интерес, со оглед дека Северна Македонија и Бугарија се блиски соседи и сојузници во НАТО. Во таа насока претседателот изрази поддршка за почнатиот дијалог меѓу двете влади, изнесените конкретни предлози, како и намерите за интензивирање на разговорите во наредниот период со цел постигнување мерливи резултати во интерес на граѓаните, информира Кабинетот на претседателот. Според Пендаровски, почнувањето на пристапните преговори на Република Северна Македонија со Европската Унија ќе претставува придобивка за просперитетот и стабилноста на целиот регион. Тоа дополнително ќе влијае на унапредување на соработката во економијата, трговската размена, инфраструктурното поврзување како и соработката во областите на образованието, здравството и културата. МИА...

К Европската агенција за лекови на редовната прес-конференција денеска порача дека четврта доза вакцина за сега не се препорачува за здравото население, јави дописничката на МИА од Брисел. Докторот Марко Кавалери од Европската агенција за лекови (ЕМА) објасни дека бројни бустер дози на вакцината против Ковид-19 на краток рок не се одржливи за населението на долг рок, не само поради заморот што ќе го почувствуваат луѓето, туку и поради последиците врз имунолошкиот систем. -Повторување на бустери на краток рок може да ги намали антителата бидејќи на имуниот систем му е потребно време да реагира, рече Кавалери и предупреди дека постојани бустери може да ја направат вакцината помалку ефикасна. Исклучок се лицата со компромитиран имунитет за кои сепак четврта доза би била од помош. Регулаторите сè уште ги разгледуваат клиничките докази и ќе ја информираат јавноста навремено за своите наоди. Како што стои ситуацијата моментално ЕМА смета дека би било добро да се оди кон сезонска вакцина како и да се разгледуваат други алтернативи од типот на мултивалентни вакцини отпорни на сите соеви, а не само вакцина отпорна на омикрон. Што се однесува до третата доза, ЕМА ја препорачува без задршка, бидејќи иако омикрон сојот успева да ја избегне вакцината, таа сепак останува ефикасна против тешки облици на Ковид-19 и хоспитализација. Кавалери денеска исто така информираше дека состојбата во ЕУ со Ковид-19 во овој момент не е добра: бројот на новозаразени расте поради омикрон сојот што доведува до силен притисок врз болниците. МИА...

АД ЕСМ во моментов ги покрива 100 отсто од потребите на универзалниот снабдувач со електрична енергија кој ги снабдува домаќинствата и малите потрошувачи на регулираниот пазар, а непречено тече и набавката на јаглен за потребите на термоцентралите, порача денеска министерот за економија Крешник Бектеши. -ЕСМ работи согласно побарувањата од универзалниот снабдувач со електрична енергија – ЕВН хоум и номинациите што секојдневно универзалниот снабдувач ги дава за наредниот ден и во моментов 100-процентно ги задоволува потребите на регулираниот пазар. Согласно податоците кои ги добиваме во Комисијата за справување со енергетската криза во континуитет се врши и испораката на јаглен за потребите на РЕК Битола и ТЕЦ Осломеј, рече Бектеши во одговор на прашање на денешната средба со новинарите. Прашан на кој начин го убедиле АД ТЕ-ТО да ѝ продава струја на државата по 170 евра за мегават час иако претходно излезе со соопштение дека не може да ја продава под 250 евра, Бектеши рече дека тоа го постигнеле преку разговори. -Преку разговори се убедувавме, а најверојатно тие, имајќи во предвид дека оваа држава има закони и одлуки, решиле да ги почитуваат законите и одлуките. Таквите одлуки се носени согласно прописите во државата и ми е мило што тие го испочитуваа тоа, потенцира Бектеши. МИА...

На потегот од населба Лагадин до село Пештани и наспроти автокампот „Градиште“ биле пронајдени девет рибарски мрежи со должина од околу 50 метри, информираат од Министерството за внатрешни работи. Мрежите биле пронајдени ноќта помеѓу 17 и 18 јануари од 19 до 2 часот по полноќ од страна на полициски службеници од Полициската станица за граничен надзор „Охридско езеро“, во содејство со инспектори од Државниот инспекторат за земјоделие и водостопанство. – На потегот од населба Лагадин до село Пештани, на околу 100 метри од брегот на езерото пронашле осум рибарски мрежи со должина од околу 50 метри, со улов од 82 парчиња риба. Исто така, наспроти автокампот „Градиште“, на околу 100 метри од брегот на езерото, била пронајдена една рибарска мрежа со должина од околу 50 метри, стои во соопштението од МВР. Од МВР велат дека риболовниот алат со уловот е подигнат и донесен во Полициската станица за Граничен надзор „Охридско езеро“ за понатамошна постапка и се преземаат мерки за расчистување на случајот. MИА...

Епидемиолошката состојба во земјите од Западен Балкан е влошена, а посебно е тешко во Словенија, Србија и Хрватска, каде денеска се евидентирани рекорден број на новозаразени. Србија денеска евидентираше рекорден број на новозаразени со коронавирус – 18.006 случаи од 39.740 тестирани примероци, соопшти Министерството за здравство, откако претходно денеска премиерката Ана Брнабиќ најави дека бројот ќе биде „катастрофална“. Од речиси 40.000 тестирани, 45,3 отсто биле позитивни, што значи дека речиси секој втор тестиран бил заразен со корона. Во изминатото дононоќие од последици на Ковид-19 починаа 26 лица. Во Србија на почетокот на годината дневно имаше нешто повеќе од 2.000 заразени, но бројот на заразени почна нагло да расте, што експертите го поврзуваат со масовните собири за прослава на Нова година. Во изминатото деноноќие во Хрватска, 6.001 лице биле позитивни на брзи антигени тестови, а биле тестирани 40.575. Кога ќе се додадат позитивните кои направиле ПЦР тестови, се доаѓа до бројката од 13.549 новозаразени, што е рекорд од почетокот на пандемијата во таа земја. Апсолутен дневен рекорд од 8.681 нови случаи на коронавирус беше потврден вчера во Словенија, јави денеска СТА. Агенцијата посочува дека стапката на позитивност достигна речиси 63 отсто. Неделниот пораст на нови случаи изнесува речиси 17 отсто. Во Босна и Херцеговина денеска се регистрирани 3.342 новозаразени лица од вкупно 7.529 тестирани за коронавирус. Во изминатите 24 часа починаа 39 лица, од кои 25 во Федерацијата БиХ, 13 во Република Српска и едно во округот Брчко. Во изминатите 24 часа во Федерацијата БиХ биле тестирани 5.831 лице, а кај 2.564 е потврден коронавирус. Во Република Српска тестирани се 1.161 лице, а кај 587 е потврден коронавирусот, а во округот Брчко денеска се регистрирани 191 нов случај од 537 тестирани. Во последните 24 часа во Црна Гора од коронавирус починале шест лица, а регистрирани се 1.814 нови случаи на зараза, соопшти Институтот за јавно здравје (ИЈЗ). Меѓу починатите најмладиот имал 63, а најстариот 89 години. Едно лице почина како последица на коронавирусот во Косово, а 720 се позитивни, соопшти Министерството за здравство врз основа на најновите податоци на Националниот институт за јавно здравје на Косово (НИЈЗК). Во истиот период биле тестирани 4.785 примероци, а 720 граѓани биле позитивни. Денеска оздравеле 159 граѓани, со што вкупниот број на оздравени е 158.909. Во Косово во моментов има 5.678 активни случаи. МИА...

Бугарскиот премиер Кирил Петков на претседателот на македонската Влада Димитар Ковачевски му ја предаде апликацијата „dDnevnik” која ќе им го олесни животот на болните од дијабетес во нашата земја. Како што соопшти владината прес-служба, софтверското решение „dDnevnik” е креирано од компанијата „Скеил фокус” која како најголема странска инвестиција од Бугарија во ИТ-секторот работи во земјава од 2019 година.-Станува збор за проект поддржан од Министерството за надворешни работи на Бугарија, преку оперативната Програма за развој, во кој компанијата „Скеил фокус” е партнер заедно со Фондацијата „Метаморфозис“ од Скопје, која има мисија да ги доближи дигиталните технологии до сите граѓани. Идејата за развој на ваков вид апликација е поддржана и прифатена и од Министерството за здравство на Република Северна Македонија. Тимот на „Скеил фокус“ за време на реализацијата на проектот ја развиваше апликацијата „dDnevnik“, консултирајќи се со лекари, ендокринолози и, секако, со здруженијата на пациентите со дијабетес, наведува прес-службата на Владата. Апликацијата ќе биде достапна од идниот месец и нејзините корисници ќе имаат можност бесплатно да ја користат на македонски и на албански јазик. За неколку месеци оваа апликација ќе стане активна и на бугарски јазик во Република Бугарија, за тамошните пациенти. Оваа мобилна апликација е достапна на двете платформи за IOS и за Android. Претседателот на Бордот на директори на „Скеил фокус“, Пламен Цеков, како што е наведено во соопштението, пред присутните порача дека преку апликацијата „dDnevnik“ дијабетичарите успешно ќе можат да се справат со предизвиците што ги носи дијабетесот и ќе им помогне во превенцијата и за поефикасно лекување. – „dDnevnik” овозможува пациентите да ги запишуваат измерените вредности за нивото на шеќер во крвта на нивните мобилни телефони, наместо на хартија. Добиените анализи за одреден временски период, апликацијата овозможува да бидат споделени со лекарите или други блиски членови од семејството, преку однапред дефинирани правила од страна на корисникот, истакна Цеков. Генералната менаџерка на „Скеил фокус“ за Македонија, Софче Јовановска, порача дека голема е професионалната сатисфакција на целиот тим на компанијата од креирањето на ваков тип апликација, која ќе им го олесни животот на болните од дијабетес, а на лекарите ќе им овозможи полесен пристап до аналитички податоци за здравјето на пациентите. – Ова е само еден од над 500 светски проекти кои „Скеил фокус“ ги има испорачано за повеќе од 300 клиенти низ светот, во Америка, Европа и Азија. Токму годинава „Скеил фокус“ слави 10-годишен јубилеј, 10 години забрзан раст и развој, препознаен и од реномираните „Форбс“ и „Фајненшл тајмс“ коишто изминативе години ја вброија компанијата и во најбрзорастечките компании во Европа. Во Скопје компанијата почна да работи со 10 вработени, а денеска бројката надминува 130 луѓе. Бизнис планот на „Скеил фокус“ е да ги мотивира и задржи младите ИТ-кадри да останат во земјата, наведува прес-службата на македонската Влада. MИА...

Фудбалерот на ПСЖ, Лионел Меси, нема да настапи за аргентинската репрезентација на претстојните два натпревари во квалификациите за Светското првенство 2022 во Катар за да може целосно да се рехабилитира по прележаниот коронавирус, јавија денеска француските медиуми. Аргентинскиот напаѓач беше позитивен на коронавирусот на 2 јануари и оттогаш отсуствува од составот на францускиот прволигаш. Аргентинската репрезентација веќе обезбеди пласман на Мундијалот во Катар, а следните два натпревари во рамки на јужноамериканските квалификации ќе ги игра против Чиле на гостински терен, на 28 јануари, и два дена подоцна на домашен терен против Колумбија. Меси за Аргентина досега одигра 158 натпревари на кои постигна 80 голови. MИА...

Министерот за земјоделство, шумарство и водостопанство Љупчо Николовски денеска се сретна со директорот на Агенцијата за храна и ветеринарство (АХВ) Николче Бабовски и со директорот на Платежната агенција Никица Бачовски. На средбата со Бабовски, Николовски се информирал за актуелната состојба со африканската чума кај свињите, како и за преземените и идните мерки што треба да се преземат за заштита на животните и справување со болеста. Со Бачовски, пак, разговарал за исплатата на субвенциите. -Со директорот Бабовски разговаравме и за нови мерки за дополнително субвенционирање на земјоделските стопанства кои применуваат повисока категорија на безбедно производство.Со АХВ постигнавме големи успеси во периодот 2017-2019: се изработија законите за нус-производи од животинско потекло, за идентификација и регистрација на животни, за заштита и благосостојба на животните, за донирање на вишокот на храна, се воведоа нови програми за високо ниво на безбедност на храната, за здравствена заштита и благосостојба на животните, а Европската комисија ја рангираше АХВ за најдобра институција во регионот во областа на безбедноста на храната и ветеринарството. Безбeдноста на храната и благосoстојбата на животните останува наш приоритет, напиша Николовски на својот фејсбук профил. Во однос на средбата со Бачовски, министерот потенцира дека продолжува навремената и неселективна исплата на субвенциите, тогаш кога им се најпотребни на земјоделците. -Во периодот 2017-2019 исплативме 305 милиони евра за заостанати и редовни субвенции, и финансиската поддршка продолжува. Воведовме нови мерки: за зелена нафта, нов модел за повисоки субвенции за тутун по класи, грантови од 20.000 евра за млади земјоделци, грантови од 3.000 евра за жени земјоделки, 20 отсто повисоки субвенции за развојните мерки, а почнаа и крупни капитални инвестиции во водостопанството. Северна Македонија стана лидер во искористеност на ИПАРД, земјата се врати кај вистинските земјоделци. Успесите што ги постигнавме продолжуваат, наведува Николовски. Тој вчера ја презема функцијата министер за земјоделство од неговиот заменик Трајан Димковски. МИА...

Чешката пејачка Хана Хорка, противник на вакцинацијата против коронавирус, почина на 57-годишна возраст откако намерно се зарази со вирусот за да добие ковид потврда, соопшти нејзиното семејство. Нејзиниот син Јан Рек изјави за јавното радио iRozhlas.cz дека неговата мајка одбила да се вакцинира и намерно се изложила на вирусот со кој тој и неговиот татко, двајцата вакцинирани, се заразиле пред Божиќ. – Таа одлучи дека ќе живее нормално со нас и повеќе би сакала да го добие вирусот отколку да се вакцинира, рече Рек. Два дена пред смртта, пејачката на чешката фолк група Асонанс на социјалните мрежи напиша: „Преживеав. Беше живописно. Сега ќе има концерти, театри, сауни, патувања до морето“. Во Чешка, потребен е доказ за вакцинација или доказ за неодамна прележан Ковид-19 за присуство на социјални настани. Нејзиниот син ги обвини локалните анти-ваксери за смртта на неговата мајка и рече дека „ја имаат нејзината крв на своите раце“. – Точно знам кој го оформил нејзиното мислење. Тажен сум што повеќе им веруваше на непознати луѓе отколку на семејството и на нејзините тези за стекнување природен имунитет преку изложеност на болеста, рече Јан Рек. Во земјата во ек е нов бран на пандемијата, при што вчера беа евидентирани околу 20.000 новозаразени со коронавирус. MИА...

Воведувањето на нова авиолинија од Софија до Скопје ќе придонесе во зближување на двата народи, како и развој на економските односи и туризмот. Во следниот период до одржување на заедничката седница на Владите на Република Северна Македонија и Република Бугарија кон крајот на овој месец, ќе се договорат деталите околу воведување на авиолинијата. Ова го договорија министрите за транспорт и врски на Северна Македонија и на Бугарија, Благој Бочварски и Николај Сабев при денешната официјална посета на бугарската владина делагација, предводена од премиерот Кирил Петков. На средбата Бочварски му подари уникатен подарок на бугарскиот министер за транспорт и врски – парче шина како симбол за изградбата на Коридор 8....

Премиерот Димитар Ковачевски, заедно со бугарскиот колега, Кирил Петков положија цвеќе на спомениците на „Св. Кирил и Методиј” и на „Св. Климент и Св. Наум Охридски” во центарот на Скопје. Двајцата премиери заеднички оддадоа почит на делата на сесловенските просветители Светите браќа Кирил и Методиј и на Св. Климент и Св. Наум како уште една потврда за важноста од соработката на двете држави, за зајакнување на меѓусебната доверба која се гради со заедничка работа во име на напредокот на народите во двете земји. Премиерите Ковачевски и Петков потоа се упатија преку Камениот мост и плоштадот „Македонија“ и ја посетија и канцеларијата на Бугарската новинска агенција БТА во Скопје и со тоа го означија почетокот на работата на оваа канцеларија во Северна Македонија, додека пак за време на одржувањето на меѓувладината седница, која на 25 јануари ќе се одржи во Софија, ќе биде отворена и канцеларијата на МИА во Република Бугарија, која ќе биде лоцирана во Македонскиот културно-информативен центар во Софија. Ковачевски и Петков денеска по заедничката прес-конференција што ја одржаа во Владата, го посетија Националниот прес-клуб на бугарската новинска агенција БТА во Скопје, со што го означија почеток на работата на прес-центарот на БТА во Северна Македонија....

Косовски автобус со патници удрил во камион со дрва во близина на Ќустендил во Бугарија, а при незгодата повредени се 29 лица, меѓу кои има и шест деца,, јави приштинска Газета експрес. Според бугарските медиуми, автобусот се судрил со камион што превезувал дрва кај Ќустендил, по што излетал од патот. Според приштинските медиуми, несреќата се случила околу 4.30 часот, кога автобусот удрил во камион што стоел на патот. Возачот на камионот наводно се обидувал да им укаже на другите во сообраќајот дека паднало дрво на коловозот. Во незгодата повреден е и возачот на автобусот. Увидот на лице место извршила бугарската полиција....

Извори блиски до кралското семејство велат дека принцот Чарлс направил неколку пријатни видео повици со својот син Хари, неговата сопруга Меган и нивните деца во последните неколку месеци. Принцот од Велс изразил силна желба да помине некое време со своите внуци, бидејќи не го видел Арчи долго време, а не ја запознал ни ќерката на својот син Хари, Лилибет Дијана, која се роди во јуни. Планот на Чарлс можеби нема да се оствари бидејќи Хари рекол дека враќањето би било преголем ризик и не е безбедно. Имено, Хари тврди дека не може да се врати дома откако излезе од кралското семејство затоа што со решение му е одземено правото на лична заштита....

Владата на Република Северна Македонија најостро го демантира и го отфрла како дезинформација објавеното на повеќе медиуми и портали за наводно намерно изоставање на одредени делови односно стихови од химната на Северна Македонија за време на официјалниот пречек на претседателот на Владата на Република Бугарија, Кирил Петков. Воениот оркестар на Армијата на Република Северна Македонија согласно воениот и државен протокол се ангажира при пречек на странските државници на највисоко ниво при што секогаш и без исклучок се интонираат инструментални кратки верзии на државните химни, а никогаш не се изведуваат верзии на химните во целост и со стихови и вокали. Оттука, дезинформација е дека химната односно стихови од химната биле скратени од било кои причини специфично за оваа посета. Дезинформација е дека било кој стих од химната бил скратен бидејќи стихови воопшто не се изведуваат при вакви церемонии. Ова е востановена пракса во протоколите за пречек, како во Северна Македонија така и во светски рамки. Дека химните во вакви прилики се изведуваат без вокали и само во инструментална кратка верзија може лесно да се утврди при прегледување на снимките на сите претходни пречеци на државници на највисоко ниво кои ја посетувале Република Северна Македонија достапни на Јутуб каналот на Владата. Владата бара медиумите и порталите кои ги објавија неточните информации во целост да го објават овој демант и да ја повлечат изнесената дезинформација. Во продолжение доставуваме примери од други државни настани каде химната е изведена на идентичен начин како денес....

Премиерот на Република Северна Македонија Димитар Ковачевски, заедно со премиерот на Република Бугарија, Кирил Петков положија цвеќе на спомениците на Св. Кирил и Методиј и на Св. Климент и Св. Наум Охридски во центарот на Скопје. Двајцата премиери заеднички оддадоа почит на делата на сесловенските просветители Светите браќа Кирил и Методиј и на Св. Климент и Св. Наум како уште една потврда за важноста од соработката на двете држави, за зајакнување на меѓусебната доверба која се гради со заедничка работа во име на напредокот на народите во двете земји. Премиерите Ковачевски и Петков потоа се упатија преку Камениот мост и плоштадот „Македонија“ и ја посетија и канцеларијата на Бугарската новинска агенција БТА во Скопје и со тоа го означија почетокот на работата на оваа канцеларија во Северна Македонија, додека пак за време на одржувањето на меѓувладината седница, која на 25 јануари ќе се одржи во Софија, ќе биде отворена и канцеларијата на МИА во Република Бугарија, која ќе биде лоцирана во Македонскиот културно-информативен центар во Софија....

Во канал за наводнување во близина на магистралниот пат А3 кај Виница е пронајдено безживотно тело на средовечна жена. Констатирано е дека се работи за 56-годишната Јасмина Л. од кочанската населба Оризари, која пред неколку дена во Полициската станица во Кочани била пријавена за исчезната. Смртта без траги на насилство ја констатирал лекар од Итната медицинска помош. Увид извршила увидна екипа на ОВР – Виница, а по насоки од Основното јавно обвинителство – Кочани телото на починатата е предадено на семејството. MИА...

Премиерите на Северна Македонија и на Бугарија, Димитар Ковачевски и Кирил Петков денеска по заедничката прес-конференција што ја одржаа во Владата, го посетија Националниот прес-клуб на бугарската новинска агенција БТА во Скопје, со што го означија почеток на работата на прес-центарот на БТА во Северна Македонија. На средбата присустуваа и директорите на државните новински агенции на двете земји, МИА и БТА, Драган Антоновски и Кирил Влчев. Ковачевски и Петков денеска договорија и одржување на меѓувладина седница на 25 јануари во Софија, за кога е планирано да биде отворен и прес-центарот на МИА во Софија. МИА...

Поради градежен зафат направен е насип со којшто е попречено дел од речното корито на Вардар, доаѓа до подигање на нивото на водата која поради производство на електрична енергија се испушта од системот на мавровските електрани, но и од Козјак, Матка 2 и Матка 1, предупреди директорот на Центарот за управување со кризи, Стојанче Ангелов на денешната прес-конференција на мостот во изградба кај хотел „Русија“. Ангелов изрази загриженост за можно излевање на водата од реката Вардар, на пешачката патека кај самиот мост, меѓутоа потенцира дека не постои сериозна опасност за граѓаните, освен за потенцијалните шетачи коишто не би ја забележале водата. Воедно, тој додаде дека за состојбата се известени надлежните субјекти, компанијата „Гранит“, која има надлежност за изградбата на мостот, како и Општината Аеродром, МВР и Дирекцијата за заштита и спасување. – За граѓаните да имаат појасна претстава, некаде од 8 часот наутро, па некаде до 24 часот се произведува електрична енергија поради што имаме зголемен доток на вода во Вардар од овие две локации – дел од водите на Мавровското Езеро и дел од водите на браната Козјак, која што преку Матка 2 и Матка 1 се влева во Треска, а потоа доаѓа во Вардар. Но, водата која што притоа се испушта е еквивалентна на водата која што влегува во овие езера, бидејќи знаете дека езерата се блиску до биолошкиот минимум поради што не се испушта повеќе вода отколку што влегува, изјави Ангелов. Тој појасни дека потенцијален проблем може да настане доколку се појават силни врнежи или нагло топење на паднатиот снег од повисоките места. – Во случај, доколку дојде до засилено врнење на дожд или нагло топење на снег ние како ЦУК ќе побараме од Електрани на Северна Македонија да ја сопрат водата која што истекува од Мавровското Езеро и од останатите езера кон реката Вардар, но граѓаните треба да знаат дека водата во просек патува околу тир часа, тоа значи дека и по собирањето на водата на неа и требаат три часа да дојде до ова место каде што ние стоиме. Приближно тир часа. Второто сценарио, доколку имаме силни врнежи од дожд или нагло топење на поголеми количества на снег, е компанијата целосно да го отстрани овој насип којшто го попречува речното корито, но за тоа ќе и биде потребно повеќе од еден ден, истакна тој. Според Ангелов, не постои опасност од излевање на реката Вардар до околните згради во Општина Аеродром, туку само опасност од „заезерување“ на овој дел од речното корито, кое како што вели, може да поплави само мал дел од десетици евентуално стотина метри од кејот на Вардар и да предизвика евентуално оштетувања на велосипедската и на патеката за пешачење и трчање на кејот на реката Вардар, но не и друга посериозна штета. МИА...

Претседателот на Владата на Република Северна Македонија, Димитар Ковачевски и премиерот на Република Бугарија, Кирил Петков одржаа заедничка прес-конференција на која информираа за разговорите од нивната тет-а-тет средба како и од пленарниот состанок на двете делегации. Премиерот Ковачевски уште еднаш му посака добредојде на неговиот колега од Бугарија и на членовите на неговата делегација и истакна дека неговите први работни денови ги почнува со едно од најважните прашања за Северна Македонија – а тоа е создавањето услови за брз напредок во нашите европски интеграции. „Во двете земји има две нови влади. Со колегата Петков си дадовме збор дека ќе ја искористиме новата енергија и преку нов пристап базиран на взаемна почит да ги унапредиме односите меѓу двете земји. И јас и тој имаме иста заедничка цел – да создадеме услови за подобра иднина за граѓаните на Република Северна Македонија и Република Бугарија“, истакна премиерот Ковачевски на прес-конференцијата пред многубројните новинари од нашата земја, од Бугарија и од регионот. Премиерот Ковачевски потсети дека денешната посета на неговиот колега Петков, коинцидира со 30 годишнината од признавањето на Република Бугарија на независноста на нашата земја под тогашното уставно име и дека Северна Македонија и Бугарија се две блиски соседни држави, а Македонците и Бугарите се два блиски и пријателски народи. „Затоа денес, како двајца премиери на две многу блиски држави, се согласивме дека влегуваме во интензивна динамика на решавање на отворените прашања со цел побрзо обезбедување на нова иднина“, нагласи премиерот Ковачевски и соопшти дека веќе е направен првиот голем исчекор со постигната согласност Бугарија да го користи краткото име Северна Македонија подеднакво како и долгото име Република Северна Македонија и дека за тоа веќе ги извести Обединетите Нации. Од наша страна, рече премиерот Ковачевски, Северна Македонија, преку Министерството за надворешни работи исто така испрати вербална нота до Обединетите Нации во врска со употребата на нашето долго и кратко име, во која се потврдува дека и двете имиња се еднакво валидни и во која се потврдува отсуството на било какви импликации врз територијалниот интегритет на Бугарија. „Отстранувањето на ова прашање од масата на разговори преку ваков усогласен и пријателски однос од двете страни за мене преставува прв голем чекор од ова наше ново поглавје. Ваквите чекори влеваат оптимизам за иднината. Ваквите чекори водат кон посилно поврзување и кон поголема соработка меѓу двете држави и двата народи“, образложи претседателот на Владата на Република Северна Македонија, Ковачевски. Премиерот Ковачевски дополни дека следува финализирањето на Договорот за прекугранична соработка за периодот 2022 – 2029 со што ќе се отвори граничниот премин Клепало, а по само една недела, на 25 јануари, ќе се одржи заедничка седница на двете Влади, на која ќе бидат договорени и други конкретни чекори за унапредување на соработката во различни области и сектори. На прес-конференцијата беше истакнато дека е во тек формирањето на работните групи во областите економија, трговија, иновации, инфраструктура, транспорт и поврзување, зелени политики, европска интеграција, култура, образование, наука и млади, од кои ќе произлезат заеднички проекти и активности, кои ќе бидат преточени во Акциски план, согласно кој ќе се очекуваат конкретни резултати. Претседателот на Владата на Република Бугарија, Кирил Петков од своја страна истакна дека неговата прва официјална посета на Северна Македонија се оствари во исклучително убава атмосфера и дека донесе добар и пријателски разговор. Петков изрази уверување дека од денеска напредокот во односите меѓу двете земји ќе се препознава низ конкретни резултати и чекори и ја најави авионската линија Софија-Скопје за која се очекува во наредните 60 дена да има конкретно остварување. Премиерот Петков го нагласи оптимизмот кој тој го темели на интензивните средби на работните групи кои ќе се интензивираат уште од идната недела со одржувањето на меѓувладината седница во Софија....

„На денешната средба со директорот на Агенцијата за храна и ветеринарство, Николче Бабовски, се информирав за актуелната состојба со болеста африканска чума кај свињите, за преземените мерки, за идните мерки што треба заеднички да ги преземеме за заштита на животните и справување со болеста.Разговаравме и за нови мерки за дополнително субвенционирање на земјоделските стопанства кои применуваат повисока категорија на безбедно производство.Со АХВ постигнавме големи успеси во периодот 2017-2019:-Се изработија законите за нус-производи од животинско потекло, за идентификација и регистрација на животни, за заштита и благосостојба на животните, за донирање на вишокот на храна-Се воведоа нови програми за високо ниво на безбедност на храната, здравствена заштита и благосостојба на животните-Европската комисија ја рангираше АХВ за најдобра институција во регионот во областа на безбедност на храна и ветеринрствоБезбeдноста на храната и благосoстојбата на животните останува наш приоритет“, напиша на својот фејсбук-профил министерот за земјоделство, шумарство и водостопанство, Љупчо Николовски....

Претседателот на Собранието, Талат Џафери, денеска оствари средба со високиот комесар за национални малцинства на ОБСЕ, Каират Абдракхманов, со кој се согласија дека нашата земја е позитивен пример и референца за целиот регион и пошироко и оти е пример за функционална мултиетничка демократија. Џафери, како што соопшти собраниската Прес-служба, изрази благодарност до сите претходни високи комесари за национални малцинства на ОБСЕ, за целата поддршка што нашата земја ја добива во изминатите години во големите напори за подобрување на меѓуетничките односи и промовирање на поголема свесност за интегрирање на малцинствата во општеството. – Претседателот на Парламентот го информираше гостинот дека Република Северна Македонија, како следен претседавач со ОБСЕ во 2023 година, има визија да промовира приоритети од заеднички интерес на сите земји членки на ОБСЕ и да ги вгради главните принципи и заложби на ОБСЕ, вклучително и принципите за унапредување на човековите и малцинските права, се вели во соопштението. Високиот комесар за национални малцинства, Абдракхманов, пак, истакна дека високо се цени соработката на државните институции, академската заедница и невладиниот сектор во земјата со сите тела на ОБСЕ. Тој нагласи дека стои на располагање за логистичка и административна поддршка и помош во текот на нашето претседавање со ОБСЕ и укажа дека се залага за зајакнување на социјалната кохезија и мултиетничкиот соживот во Република Северна Македонија. Абдракхманов покажа особен интерес за примена на Бадинтеровиот принцип на гласање во Собранието, како и за концептот „едно општество за сите“, за што Џафери опширно образложи на средбата. Двајцата соговорници се согласија дека земјава се издвојува како позитивен пример и референца за целиот регион и пошироко и оти е пример за функционална мултиетничка демократија, во согласност со вредностите и заложбите на ОБСЕ, која се стреми да биде активен придонесувач во надворешната политика на Организацијата и во други мултилатерални форуми. МИА...

Претседателството на Сојузот на синдикатите на Македонија на вонредна седница расправаше за информацијата за поднесената иницијатива пред Уставниот суд од страна на Стопанската комора на Северна Македонија со која се оспоруваат измените на Законот за работни односи со кои се уредува работата во недела. – Недела ден на неделен одмор е реалност колку и тоа на „газдите“ да не им се допаѓа, а не им се допаѓа поради тоа што ги полнеа џебовите на грбот на работниците кои им работеа без да ги плаќаат. ССМ нагласува дека согласно член 11 од Уставот „Се забранува присилна работа.“, согласно член 32 од Уставот „Секој вработен има право на платен дневен, неделен и годишен одмор“, а „Од овие права вработените не можат да се откажат“ и истиот член утврдува дека „Остварувањето на правата на вработените и нивната положба се уредуваат со закон и со колективни договори” соопштија од ССМ по седницата на претседателството. Оттаму велат дека правото, ден на неделен одмор да биде недела е уредено во Закон за изменување и дополнување на Законот за работните односи Сл.Весник бр.288 од 21 декември 2021 година и Законот за изменување и дополнување на Законот за трговијата Сл.Весник бр.295 од 27 декември 2021 година што е во целост согласно горенаведеното и член 32 од Уставот на Република Северна Македонија оти секој вработен има право на платен неделен одмор и дека од тоа право работниците не смеаат да се откажат, а работодавачите не смеат да го ограничат. – Милиони денари на работниците ( кои работеле во недела без никакви ограничувања, а не биле плаќани за тоа) завршувале во џебовите на „газдите“ се причината за иницијативата поднесена од нивна страна до Уставниот суд. Пример само за 8 отсто од работниците кои согласно Законот за работните односи и Законот за теговија би работеле во денот недела согласно податоците на ДЗС –АРС за Третиот квартал 2021 година, бројот на вработени изнесува 796 671 лица , 63 734 лица се вработени. Доколку сите 63.734 работници, односно 8 отсто, работат во ден недела, дневницата за работа во недела на минималната плата од 15 194,00денари ќе им изнесува 1.140,00 ден. (760,00 + 50 отсто),ќе треба да им исплатат вкупно 72 656 760,00 ден на работниците, односно ако ги работат сите четири недели во месецот, работодавачите треба да им исплатат 290.627.040,00 денари на работниците. Доколку работниците примаат просечна плата од 29.145,00 ден. дневницата изнесува 2.186,00 ден. (1457,00 +50%) треба да им се исплати 139.322.524,00 денари, односно ако ги работат сите четири недели во месецот треба да им се исплати 557.290.096,00 ден. Во пресметките не се вклучени придонесите кои треба да се уплатат на државата. Прашуваме, како ако досега овие средства останувале во џебот на овие исти „газди“ кои поведуваат иницијатива поради тоа што работниците им работеа во недела без додаток на плата, тие се на работ на егзистенцијата, а не е работникот, истакнуваат од ССМ. Потенцираат дека излезот од оваа ситуација ќе биде излегување на работниците со синдикатите на улица и блокирање преку штрајкови и протести, а доколку работодавачите, како што велат, не ја сфатат пораката и останат на ваквите неразумни ставови ќе мораат да се обратат на друга адреса за работници бидејќи куферите на работниците им се спакувани. -Ваквиот однос на работодавачите кои сметаат дека имаат робови, а не работници претставува карта во еден правец надвор од Државата, па тогаш овие „големи газди“ сами со своите семејства ќе си работат во нивните бизниси поради тоа што без работници нема трговија, нема здравство, нема индустрија, без работници ништо нема да работи, наведуваат од ССМ. Уставниот суд вчера објави дека Стопанската комора на Северна Македонија ги оспорила пред судот законските одредби за прогласување на недела за неработен ден, бидејќи сметаат дека е спротивен на слободата и пазарот на претприемништво. Законските измени за недела неработен ден стапија во сила на 1 јануари годинава, откако претходно пратениците во Собранието ги изгласаа законските измени на 20 декември 2021. На седницата на претседателството на ССМ е расправано и за средбата што задутре треба да се одржи во Владата за зголемување на минималната плата на 18.000 денари односно таа да не биде под 60 отсто од просечната плата со задолжително скалесто усогласување – зголемување на останатите плати согласно Законот за минимална плата и утврдување на право на регрес за годишен одмор за јавен сектор. МИА...

Во Договорот за добрососедство имаме многу јасна дефиниција за јазикот и тезата за јазикот, како и во дел од другите документи кои се потпишани. Бугарија прва ја призна независноста на Северна Македонија и истовремено, со тоа, ние апсолутно го почитуваме самоопределувањето на сите граѓани во Северна Македонија како и користењето на сите ваши јазици, како што се дефинирани со Уставот. Имаме полно почитување на тоа и ќе продолжиме во најконструктивен дух да ги третираме овие прашња, изјави денеска во Скопје бугарскиот премиер Кирил Петков, одговарајќи на новинарско прашања да ги именува јазикот и народот во државата во која се наоѓа. Одговарајќи на новинарски прашања на заедничката прес-конференција со премиерот Димитар Ковачевски по средбата во Скопје, Петков, рече дека фокусот бил на заедничката работа и точниот календар за следните неколку месеци, посочувајќи дека е голем оптимист и дека во многу брзо време ќе имаме резултати. Тоа што го постигнавме на нашата прва средба, посочи Петков, јасно покажува дека сите од двете страни решивме добрососедството да има поинаква дефиниција од тоа што било досега. – Од тука, па натаму, тоа ќе биде новиот конструктивен дијалог. Ставаме акцент на сите работи кои се заеднички и кои имаат можности за збогатување на нашите односи и заедно со нив самите работни групи ќе стават акцент на специфичните прашања кои ќе треба да ги решиме, изјави Петков. Во однос на работните групи и тоа што е досега постигнато, Петков рече дека за разлика од досегашниот пристап, сега на неделни средби ќе се разговара за реалните можности на сите комисии, вклучително и на историската Комисија. – Врз база на тоа што и Димитар го кажа, дека ќе се фокусираме на работите кои не зближуваат, а прашањата кои не се разјаснети ќе им дадеме и подолг рок тоа да се случи. Но, важно е да се работи, да се среќаваме и да бидеме во постојана комуникација, изјави Петков. Тој исто така изрази надеж дека сега, откако историската комисија е една од петте комисии, тие ќе бидат во една многу поинаква средина – во средина на добар дијалог и конструктивна активност. Прашан дали пред македонската страна биле поставени и други услови од бугарската рамковна позиција, меѓу кои рехабилитација на жртвите на комунизмот, кои биле гонети поради бугарската самосмест и оштетувањето на табли и натписи, Петков рече дека било разговарано за сите прашања, но дека тоа што е важно, е дека и двајцата разбираат дека овие специфични прашања треба да бидат решени. – Да, ќе работиме на нив како дел од заедничката работа, но ќе бидат во сосема различна димензија кога се ставени и во контекст на сите други работни групи. Одогворот е да, но фокусот од тука натаму треба да биде зошто е толку важно нашите две држави да го имаат тоа добрососедство, а не само да се фокусираме на проблемите што треба да бидат решени, но тоа е сосема друг пристап, истакна Петков. МИА...

Американски официјални лица од здравството повикуваат на внимателност, наспроти информациите дека Омикрон, новата варијанта на коронавирусот, може да ја запре пандемијата, јави дописникот на МИА од Вашингтон. – Големо прашање е дали намерно инфицирање со вирусот е слично на вакцинација за што сите се надеваат, изјави Ентони Фаучи, главен советник за здравство во Белата куќа, за време на виртуелен панел организиран од Агенда Давос. Тој изрази надеж дека тоа не е случај. – Но, тоа ќе биде случај ако не се појави друга варијанта која го надминува имунолошкиот одговор на претходната. Но, и тогаш Ковид-19 најверојатно ќе стане дел од светот како ендемска болест, рече Фаучи. Според други експерти, Омикронот е доминатна варијанта во североисточниот дел на САД и се уште не е распространет низ целата земја. – Не треба да очекуваме да се достигне национален максимум (на инфекции) во следните денови. Следните неколку недели ќе бидат тешки, изјави за Си-Ен-Ен Вивек Мурти, главен хирург на САД. МИА...

Српската премиерка Ана Брнабиќ оцени дека денеска, во апсолутни бројки, бројот на новозаразени со Ковид-19 „ќе биде катастрофален“. Во изјава за ТВ Прва, Брнабиќ истакна дека според податоците од осум часот утринава, ќе биде постигнат „нов негативен и неславен рекорд“ на бројот на новозаразени. – Бројките, од осум часот наутро, се катастрофални, но добро е што клиничките слики се многу поблаги, нагласи премиерката. Таа потсети дека во сила се повеќе антиепидемиски мерки. – Имаме мерки кои доколку се почитуваат би имале стабилна состојба, истакна Брнабиќ, додавајќи дека Србија ги обезбедила сите вакцини и лекови. Таа рече и дека денеска ќе се одржи состанок на Министерството за образование со медицинскиот дел од Кризниот штаб и оти очекува нивен предлог за одржување на наставата. МИА...

Премиерите на Северна Македонија и на Бугарија, Димитар Ковачевски и Кирил Петков денеска договорија да се формираат работни групи кои ќе бидат од повеќе области – инфраструктура, економија, трговија, деловната соработка меѓу бизнис заедниците, образование, култура, а тука ќе биде вклучена и Комисија за историски и образовни прашања. – Со премиерот Петков денеска доминантно разговаравме за воспоставување на работни групи, во областа на инфраструктурата, економијата, трговијата, иновациите, евроинтеграциите и во областа на образованието и културата. Сметаме дека тоа се области кои значат многу повеќе за граѓаните, за нивната иднина за граѓаните од сите возрасти посебно за младите. Тие се направени како меѓуресорски работни групи во кои нема да учествуваат само политичари, туку ќе учествуваат и претставници на секторите за кои се однесуваат, посочи Ковачевски одговарајќи на новинарско прашање на денешната заедничка прес-конференција со бугарскиот премиер Петков. Ова, како што информира Ковачевски, се области во коишто планираат да имаат динамика која ќе биде дури на седумдневно ниво, каде работните групи ќе работат помеѓу себе и ќе можат самите да ја информираат јавноста за тоа што е постигнато и што може да очекуваат во иднина. Во однос на историската Комисија, како што информира Ковачевски, таа веќе има свој план за работа и врз основа на тоа што го имаат сработено и историчарите кои се членови на таа комисија, како што рече, ќе треба самите да информираат во однос на тоа што и на кој начин договориле врз основа на методологијата и фактите на кои работат. – Што се однесува до Историската комисија гледате дека овде нема претставници на Историската комисија. Значи, историчарите работат во еден подолг процес, бидејќи се работи сега и за период во минатото којшто тоа го прават врз основа на методологија и врз основа на дефинирање на одредени факти што ги имаат регулирано согласно со методологијата и јас лично се надевам дека прво, членовите на историската Комисија ќе информираат заеднички за тоа што е договорено и дека тоа што заеднички е договорено ќе биде мост кон иднината, а не враќање кон минатото, вели Ковачевски. Во однос на употребата на јазиците, Ковачевски нагласи дека ние сме држава која е признаена од страна на Бугарија и која во своето уставно уредување го има македонскиот јазик. – Ние имаме веќе потпишано билатерални договори со Бугарија во кои се регулира начинот на кој се потпишани тие договори, согласно официјалните јазици на државите. Нашиот македонски јазик е дел од повелбата на ОН и од другите мултилатерални институции и организации во кои ние членуваме и дека согласно со напредокот во работата на комисиите дека во делот на прашањата кои значат подобар живот за сите граѓани и зближување на сите граѓани од двете држави дека сите овие прашања кои се однесуваат на историските делови дека ќе бидат во втор план, а во прв план ќе дојде градењето на добри односи меѓу граѓаните, во зближувањето на граѓаните како и во зајакнување на соработката меѓу нив што ќе ни даде доволен стимул и доволно аргументи да го направиме финалниот исчекор во постигнување на договор со Бугарија и конечно отпочнување на преговорите на Северна Македонија со ЕУ, нагласи Ковачевски. МИА...

За околу два месеци треба да биде воспоставена авиолинија од Софија до Скопје, најави бугарскиот премиер Кирил Петков, кој нагласува дека од сега натаму добрососедството меѓу Бугарија и Северна Македонија ќе се мери со конкретни реализирани чекори и цели, а не само преку политички изјави. – Денеска јасно изјавуваме дека линијата Софија – Скопје ќе биде реалност. За она за што се ангажираме е дека за 30 дена ќе имаме точни специфики, а за 60 денови таа линија ќе биде воведена во функција. Така што, кога ќе почнеме да работиме со точни резултати ќе дадеме можност на народите од двете земји да можат слободно да патуваат, слободно да прават бизнис, рече Петков на прес-конференција по средбата со неговиот колега Димитар Ковачевски. Многу сум среќен, додаде Петков, што можам да кажам дека оттука натаму добрососедството ќе се мери со реални постигнати цели и резултати. – На ваков начин ќе им покажеме на двата народа од двете земји дека добрососедството се мери практично, не само на ниво на политички изјави, туку на ниво на реални резултати на бизнис и работа и на ниво на патување од Софија до Скопје за 20 минути, истакна бугарскиот премиер Петков. МИА...

Македонскиот премиер Димитар Ковачевски доби на подарок црвено јаболко од една од бугарските новинарки кои известуваат од посетата на Кирил Петков во земјава. -Господине Ковачевски, дозволете ми да ви подарам црвено здраво јаболко во знак на внимание за успех во вашата работа, со што ќе го запазите единството меѓу Македонија и Бугарија, изјави новинарката пред присутните, подарувајќи го јаболкото. Извор: Локално...

Бугарија прифати да го користи скратеното име Северна Македонија, подеднакво како и долгото име Република Северна Македонија и нема да ја кочи употребата на тоа име во меѓународни процеси, за што ги известила и Обединетите нации. Северна Македонија пак со вербална нота до ОН потврди дека користењето на краткото име нема никаква импликација врз територијалниот интегритет на Бугарија. Ова го соопштија на денешната заедничка прес-конференција во Скопје, премиерите на Северна Македонија и на Бугарија, Димитар Ковачевски и Кирил Петков. – Отстранувањето на прашањето за краткото име Северна Македонија од масата на разговори преку ваков усогласен и пријателски однос со двете страни за мене претставува прв голем чекор во ова наше ново поглавје. Ваквите чекори влеваат оптимизам за иднината. Ваквите чекори водат кон посилно поврзување и кон поголема соработка помеѓу двете држави и помеѓу двата народи, изјави премиерот Ковачевски. Тој додаде дека со Петков си дале збор да ја искористат новата енергија и преку нов пристап базиран на заемна почит да ги унапредуваат односите помеѓу двете земји. – И јас и тој имаме иста заедничка цел да создадеме услови за подобра иднина на граѓаните на Република Северна Македонија и Бугарија. Оваа денешна посета на колегата Петков коинцидира со 30-годишнината од признавањето на Република Бугарија на нашата земја под уставното име. Бугарија е прва која не призна и направи пријателски чин во исклучително сложени политички услови. Триесет години подоцна отвораме еден нов прозорец на соработка кој веруваме дека ќе резултира со нов пријателски и добрососедски чин, поддршка за нашата евроинтеграција, рече Ковачевски. Тој потенцира дека Северна Македонија и Бугарија се две блиски соседни држави, а Македонците и Бугарите се два блиски и пријателски народи, додавајќи дека затоа денеска како двајца премиери на две многу блиски држави се согласиле на интензивна динамика на решавање на отворените прашања со цел побрзо обезбедување на нова иднина. Ковачевски најави дека следно што треба да се направи е да се финализира договорот за прекугранична соработка за периодот 2022 – 2029 година и оти најзначаен проект од оваа област е отворањето на граничниот премин Клепало со што ќе се олеснат движењата, транспортот и трговијата. Тој најави и дека за една недела на 25 јануари ќе биде одржана седница на двете влади на која ќе бидат договорени и други конкретни чекори за унапредување на соработката во различни области и сектори. – Ќе се формираат работни групи коишто ќе работат на конкретни проекти на зајакнување на соработката и на воспоставување на поголема доверба и на градење на односи коишто ќе значат попросперитетна иднина. Овие групи ќе работат заедно и ќе предложат заеднички проекти и активности, рече Ковачевски. Бугарскиот премиер од своја страна, изјави дека денеска со Ковачевски имале добар и пријателски разговор и оти се согласни добрососедството на двете земји да се качи на уште повисоко ниво. – Многу сум среќен што можам да кажам дека оттука натаму добрососедството ќе се мери со реални постигнати цели и резултати. Јас многу се радувам за напредокот што беше постигнат денеска и што можам мирно да кажам Северна Македонија, рече Петков. Тој најави дека за два месеци реалност ќе биде и авиолинијата Скопје-Софија, како уште еден чекор напред во унапредување на соработката. – Денеска јасно изјавуваме дека линијата Софија – Скопје ќе биде реалност. За она за што се ангажираме е дека за 30 дена ќе имаме точни специфики, а за 60 дена таа линија ќе биде воведена во функција. Така што, кога ќе почнеме да работиме со точни резултати и кога ќе даваме можност на народите од двете земји да можат слободно да патуваат, слободно да прават бизнис, рече Петков. Тој нагласи дека со неговиот колега Ковачевски се согласни и натаму да продолжи брзината со која се движат работите со цел постојано унапредување на односите и добрососедството. Дека тоа така ќе продолжи, потенцира Петков, говори и фактот што наскоро, веќе на 25 јануари ќе се одржи и седница на двете влади, а најави дека потоа секоја седмица една од групите ќе се состанува со јасни цели и јасни резултати. На тој начин, вели Петков, ќе им покажеме на двата народа од двете земји дека добрососедството се мери практично, а не само на ниво на политички изјави. МИА...

Лидерот на опозициската ВМРО-ДПМНЕ, Христијан Мицкоски пред посетата на бугарскиот премиер, Кирил Петков во медиуми се претставува како силен патриот и се фали како ќе настапувал, додека при неговата средба со претходниот бугарски премиер, Бојко Борисов, исплашено одговори дека прифаќа се. При средбата на Мицкоски и Борисов, лидерот на ВМРО-ДПМНЕ кажа дека го поддржува Договорот за добрососедство меѓу Северна Македонија и Бугарија и исплашено се потчини на бугарскиот премиер. Од друга страна и тогаш и сега во земјава, Мицкоски пред медиумите и граѓаните се претставува како силен патриот. Изминативе неколку денови во изјавите за медиуми, Мицкоски повторно продолжува со истата реторика дека тој е силен патриот и најавува како ќе се однесува со бугарскиот премиер Петков. Тој дава предлози што новинарите да го прашувале Петков на прес-конференцијата, а доколку новинарите не го направеле тоа, тогаш тој ќе го брашал бугарскиот премиер при нивната средба на кој народ припаѓа Гоце Делчев и кој го кренал Илинденското востание.Ќе има ли Мицкоски храброст тој лично да го праша Петков на средбата или е силен само за пред камери, а кога е лице в лице коленичи? Извор: Центар...

До доцна синоќа биле пријавени 8.278 позитивни резултати од направените селф тестови, односно тестови за домашна употреба задолжителни за учениците и просветните работници во Грција, јави дописничката на МИА од Атина. Селф тестовите се задолжителни двапати седмично, а негативен резултат е предуслов за посетување настава за учениците од основните и средните училишта во Грција, а истото важи и за нивните наставници и професори. Според информациите од Министерството за образование на Грција од тестирањето на 1,6 милиони ученици и просветни работници, до синоќа имало 8.278 позитивни резултати. Минатата седмица, со почетокот на второто полугодие, задолжителни беа три тестирања и откриени 31.000 позитивни случаи кај ученици и просветни работници. Тестовите се подигнуваат бесплатно од аптеките со матичниот број на учениците и професорите и наставниците, задолжително е тестирање 24 часа пред почетокот на наставата секој вторник и петок, а резултатите се внесуваат на специјална платформа од каде што се добива потврдата со негативен резултат, задолжителна за сите ученици од четири до 18 години. МИА...

Во првите два и пол месеци од мандатот, Данела Арсовска нема ниту еден проект во интерес на граѓаните на Град Скопје. Нејзината најава дека ќе реконструира булевари и улици во градот, всушност е продолжување на проект на претходната градска администрација. Речиси за сите улици и булевари кои ќе се реконструираат веќе се изготвени проектни документации од претходното раководство, а за улицата „Радишанска“ избран е и изведувач на градежните работи. Добро е што Арсовска ги продолжува проектите на претходниот градоначалник и ја охрабруваме исто вака да постапи и со проектот Бас рапид Транзит кој го прекина иако за него средствата веќе беа обезбедени. Данела Арсовска нема реализирано ниту еден свој проект а веќе наближуваат 82 дена од мандатот, период во кој таа ветуваше дека ќе реализира 15 проекти. Се што видоа граѓаните на Скопје од Арсовска во овој период е неработење, прекинување проекти, партизација на администрацијата и бегање од одговорност. Тоа е нечесен и неодговорен однос кон граѓаните кои и дадоа доверба на Арсовска. Арсовска треба да решава проблеми и да реализира проекти, а не да бара оправдувања за неработењето и да се иззема од одговорност....

Германската министерка за Европа, Ана Лурман која по вчерашната посета на Скопје, денеска престојува во Тирана, на прес-конференција рече дека Германија е посветена на започнување преговори на Албанија и Северна Македонија со Европската Унија. На прашањето дали треба одделување на Албанија од Северна Македонија на овој пат, не даде директен одговор, туку рече дека добиле позитивни сигнали од Бугарија, која стави вето на Северна Македонија и го кочи овој процес. -За нас е од суштинско значење да се оди по овој пат на почетокот на преговорите за членство на Албанија и Северна Македонија. Од преземањето на функцијата во моите разговори во Брисел, разговарав за ова прашање за да продолжиме напред во отпочнување на разговорите со Северна Македонија и Албанија. Следниот месец ќе разговараме за тоа на форумите во Брисел. Добивме позитивни сигнали од Бугарија и ќе се обидеме што поскоро да го најдеме најсоодветното решение, рече германската министерка, пренесува агенцијата Балкан веб. На прес-конференцијата со албанскиот вицепремиер Арбен Ахметај, таа додаде дека перспективата на Албанија и Западен Балкан е во ЕУ, нагласувајќи дека тоа е од стратешко значење. МИА...

Во рамки на официјалната посета на делегацијата од Република Бугарија, во Владата на Република Северна Македонија се одржа пленарен состанок на премиерите на Северна Македонија, Димитар Ковачевски и на Бугарија, Кирил Петков, заедно со членовите на двете Влади. На пленарниот состанок на владините делегации од двете држави се дискутираше за важноста од реализација на проектите во насока на подобрување на состојбата во конкретни области меѓу двете земји за што министрите на двете Влади ги презентираа нивните заклучоци од билатералните средби. По пленарната седница предвидена е заедничка прес-конференција на премиерите Димитар Ковачевски и Кирил Петков....

Во време на економска и енергетска криза, кога општините се соочуваат со проблеми заради поскапатаелектрична енергија и природен гас, Општина Ѓорче Петров склучила два договори за набавка на прехранбени производи, сокови и топли напитоци во износ од безмалку 6.000 евра. Станува збор за две набавки едната во вредност од 118.000 денари а втората од 236.000 денари или вкупно градоначалникот на Ѓорче петров, Александар Стојкоски потрошил 354.000 денари или речиси 6.000 евра за оваа набавка. Претходно, Стојкоски се жалеше дека општината била во тешка финансиска состојба и заедно со градоначалничката на Скопје, Арсовска, го одби предлогот општините и Град Скопје да издвојат пари за да се субвенционира поскапувањето на цената на парното за скопјани. Извор: Центар...

Во тетовската црква „Пресвета Богородица“ се одбележа празникот Водокрст, ден пред Богојавление Водици. По светата литургија, во црковниот базен во дворот од црквата се изврши Водосвет и спуштање на Светиот крст. По крстот скокнаа тројца верници, Нинослав Дамјановски, Дејан Савевски и Горан Анѓеловски. Најуспешен и најсреќен беше најмладиот од нив, 24 – годишниот Нинослав Дамјановски. -Ова е четврти пат да скокам по осветениот крст. По втор пат ми се посреќи да го фатам. Првиот пат го фатив пред шест години кога има 18 години. Очекувам да ми донесе здравје, среќа и бериќет, изјави Нинослав Дамјановски. Празнувањето на Водокрст годинава продолжи со традиционалното спуштање на осветен крст во црковниот базен, која лани поради пандемијата не се одржи. Во Тетово овој единствен чин на спуштање на крстот започнал да се извршува во 1986 година, по иницијатива на црковниот одбор. Утре на Водици централното одбележување е во тетовска соборната црква „Свети Кирил и Методиј“, каде осветениот крст ќе се спушти во црковниот базен по 9.30 часот. Водици ќе се одбележува и во другите цркви во тетовските села. МИА...

Албанскиот претседател Илир Мета вчера не се сретна со турскиот претседател Реџеп Таип Ердоган, за време на неговата посета на Албанија, бидејќи имал набиена агенда, а турскиот колега бил поканет од Владата. Тој изјави дека нема причина да жали за неостварената средба, јави дописничката на МИА од Тирана. – Седумнаесети јануари беше многу несекојдневен ден за мене, исполнет со многу активности за да му оддадам почит на нашиот народен херој, Ѓерѓ Кастриот Скендербег. Немам причина да жалам што не го сретнав господинот Ердоган. Тој беше гостин на Владата и се надевам дека минал најдобро во Албанија. Ако сакаше средба, ќе се потрудев да се сретнам со него, бидејќи имав навистина напорна агенда, но тој не побара средба. Господинот Ердоган не беше поканет од моја страна. Искажувам голема благодарност до турскиот народ за дарежливата помош што му ја дава на албанскиот народ, изјави Мета за ТВ Сири. Ердоган беше пречекан и придружуван од премиерот Еди Рама, при што го предаде во употреба станбениот блок во Курбин со 524 станови изграден од турската Влада, а притоа беше прогласен за почесен граѓанин на овој град. По официјалната средба со Рама и прес-конференција, се обрати пред Парламентот, а посетата ја заврши со инаугурација на Етхем Бег џамијата реставрирана со средства на „ТИКА“. Инаку, вчера се одбележаа 544 години од смртта на Скендербег, поради што дел од медиумите го отворија прашањето зошто токму на овој ден Ердоган престојувал во Албанија. МИА...

Германија не може да ја исклучи можноста гасоводот Северен тек 2 да се искористи како средство за политички притисок врз Кремљ во случај на руска агресија врз Украина, изјави денеска претседателот на германскиот Комитет за надворешни работи, Михаел Рот. – Очекуваме дипломатско-политичко решение, а дипломатските алатки вклучуваат и санкции. Ако навистина дојдеме до санкции, а јас сепак се надевам дека ќе успееме да го избегнеме тоа, тогаш не можеме однапред да ги исклучиме работите што можеби ги бараат нашите партнери во Европската унија, истакна Рот за германската телевизија АРД Гасоводот Северен тек 2, кој е веќе завршен, но се уште не добил дозвола за работа, има за цел да ја зголеми испораката на руски гас во Западна Европа, но противниците на проектот, вклучително Украина и САД, велат дека тоа ќе ја направи Европа премногу зависна од Русија. МИА...

Норвешкиот суд оваа недела ќе го сослуша масовниот убиец Андерс Брејвик за да објасни зошто верува дека треба да биде ослободен од затвор откако поминал повеќе од една деценија зад решетки. Брејвик, екстремно десничарски екстремист, уби 77 луѓе во најголемото злосторство во Норвешка во јули 2011 година. Тој уби осум лица со автомобил-бомба во Осло, а потоа 69 лица, главно тинејџери во младински камп на Лабуристичката партија. Брејвик, кој сега има 42 години, отслужува максимална казна од 21 година во Норвешка, која може да биде продолжена на неодредено време доколку се смета за континуирана закана за општеството. Судот „Телемарк“ во Скиен, југозападно од главниот град, каде Брејвик ја отслужува својата казна, ќе започне сослушување во вторник, откако државното обвинителство во Осло минатата година го одби барањето на Брејвик за предвремено ослободување. Европскиот суд за човекови права ја отфрли подоцнежната жалба. МИА...

„Продолжуваме со навремена и неселективна исплата на субвенциите, тогаш кога им се најпотребни на земјоделците.Во периодот 2017-2019 исплативме 305 милиони евра за заостанати и редовни субвенции, и финансиската поддршка продолжува.Воведовме нови мерки:-Мерка за зелена нафта-Нов модел за повисоки субвенции за тутун по класи-Грантови од 20.000 евра за млади земјоделци-Грантови од 3.000 евра за жени земјоделки-20% повисоки субвенции за развојните мерки-Започнаа крупни капитални инвестиции во водостопанството-Северна Македонија стана лидер во искористеност на ИПАРД-Земјата се врати кај вистинските земјоделциУспесите што ги постигнавме продолжуваат, ова го потврдивме и со директорот на Агенцијата за финансиска поддршка на земјоделството и руралниот развој, Никица Бачовски.“ Фејсбук-статус на министерот за земјоделство, шумарство и водостопанство, Љупчо Николовски....

До четврток попладне времето ќе се задржи стабилно и суво, со пониски утрински температури. Влажен и студен бран со врнежи од снег ќе се прошири од запад во четврток во вечерните часови и во текот на ноќта. Заради ниските температури ќе има појава на голомразица. Во петок преку денот врнежите ќе завршуваат. Пообилни врнежи ќе има во западните делови, каде насекаде ќе се формира снежна покривка, а на планините таа ќе се зголеми. Помала снежна покривка ќе се формира и во останатите делови, освен во долниот дел на Повардарието. Од сабота следува период на многу студено време, соопшти УХМР. МИА...

Проследете ја во живо перс-конференцијата на на премиерот на Република Северна Македонија, Димитар Ковачевски и премиерот на Република Бугарија, Кирил Петков....

Од полициски службеници од Полициската станица за Граничен премин Табановце при Регионалниот центар за гранични работи Север, синоќа во 22:50 часот биле откриени две лица, Т.Х.(23) и Т.Х.(20), двајцата од Скопје, кои при гранична контрола на излез од државата приложиле фалсификувани ПЦР тестови, за кои во службен разговор признале дека ги направиле сами, соопштија од Министерството за внатрешни работи. Kако што посочуваат од МВР, од страна на полициски службеници ПЦР тестовите биле одземени, а на пријавените не им бил дозволен излез од државата. По целосно документирање на случајот против нив ќе бидат поднесени кривични пријави согласно член 378 и член 206 од Кривичниот законик. МИА...

Завршени се сите подготовки во Охрид во врска со прославувањето на големиот православен празник Богојавление – Водици. Централното градско подрачје е свечено украсено, а спроведени се сите предвидени активности за безбедно одвивање на церемонијата на осветувањето на езерските води и положувањето на Чесниот крст во езерото. Екипи на ЈП „Охридски Комуналец“ веќе го исчистија просторот каде ќе се споведува верската манифестација што секоја година ја следат голем број православни верници од градот, околните населени места и гости од странство. Во тек е дислокација на пловните објекти од внатрешниот дел на пристаништето, за да се овозможи пристап и безбедност на капачите и посетителите. Изминатите денови, како што беше договорено на координативниот состанок свикан од градските власти, охридските нуркачи го исчистија дното на езерото на потегот на самото пристаниште каде верниците ќе влегуваат во вода. Самото осветување на водите на Охридското Езеро оваа година ќе се одвива со скратена програма и со строго почитување на мерките за заштита од Ковид-19. Традиционално утре точно во 10 часот од светилникот на Градското пристаништето, Светиот крст во езерото ќе го положи митрополитот Дебарско-кичевски г. Тимотеј. Богослужбите во охридските парохиски цркви ќе почнат во 7 часот наутро, а литиите од трите цркви „Св. Никола- Геракомија“, „Успение на Пресвета Богородица – Каменско“ и „Св. Георги од Горна Влашка Мала ќе се сретнат на плоштадот Св. Климент Охридски нешто пред 10 часот од каде ќе се упатат на пристаништето. И оваа година е предвидено точно напладне кај месноста „Сараиште“ да се спроведе групно крштевање верници. За посвечено одбележување на празникот и забава на верниците на Градскиот плоштад каде се монтира бината концерт ќе одржи групата „Љубојна“, а во периодот од 9 до 15 часот во близина на Капетанијата ќе се спроведува и традиционалната крводарителска акција. За безбедноста на верниците што ќе влезат во осветените езерски води ќе се погрижат охридските нуркачи, додека екипи на Црвениот крст неспоредно пред осветувањето на водите ќе вршат систематски прегледи на верниците што ќе скокаат по крстот. Од медицинските служби упатуват предупредување до верниците да избегнуваат консумирање поголеми количества алкохол доколку планираат да влегуваат во вода, додека на останатите со себе да носат топла сува облека. Поради актулената ситуација наметната од ковид-епидемијата, оваа година нема да се одржи никакво одбележување на Денот на рибарите на 20 јануари на празникот Свети Јован Крстител, настан што во подобрите времиња привлекуваше голем број гости во градот, а години наназад се приготвуваше и рибна чорба во казан од неколку тони. Инаку, празнично утре низ Охрид ќе биде бесплатно паркирањето моторни возила на сите паркиралишта со кои стопанисува градот односно ЈП „Билјанини извори“. МИА...

Легендата на Реал Мадрид, Франциско Генто, почина на 89-годишна возраст. Шпанецот играше за мадридскиот клуб од 1953 до 1971 година. Вкупно за тимот одигра 600 натпревари и постигна 182 гола. Генто е единствениот играч во светот кој шест пати го освоил трофејот европски шампион. Тој, исто така, го освои шпанското првенство 12 пати со Реал Мадрид, двапати го освои Купот на Шпанија и го освои Интерконтиненталниот куп во 1960 година. Вкупно, Генто со Мадрид освои 23 трофеи, што е клупски рекорд. Марсело се израмни со него оваа недела по бројот на титули. МИА...

Роберта Мецола е избрана за наследничка на починатиот претседател на Европскиот Парламент, Давид Сасоли, а изборот се случи токму на нејзиниот роденден, пренесува Зидојче цајтунг, наведувајќи дека „историскиот избор е важен сигнал“. Членовите на Европскиот парламент ја избраа 43-годишната Мецола за нов претседател, при што Парламентот конечно доби жена по 2002 година, а таа е најмладиот претседател во историјата. Пратеничката од Малта, која ја вршеше должноста претседателка на Европарламентот по смртта на Сасоли, е член на Европската народна партија (парламентарна група на христијанско-демократските и конзервативните политички движења). Мецола важеше за водечки кандидат, но пречка за нејзината кандидатура беше различниот став на Малта во однос на абортусот во споредба со другите земји од ЕУ каде што е забранет. Таа се смета за типичен европски политичар, за што сведочи нејзината политичка кариера, тесно поврзана со институциите на ЕУ. Отежнувачка околност е тоа што е од мала понова земја-членка со само шест европратеници, што го ограничува нејзиното влијание врз нејзините конкуренти. МИА...

Европската интеграција на Западниот Балкан претставува национален интерес, како на земјите кандидати за членство, така и на членките на Европската Унија, се согласија на денешната средба министерот за надворешни работи Бујар Османи и неговата бугарска колешка Теодора Генчовска, која е дел од високата владина делегација на Република Бугарија, предводена од премиерот Кирил Петков, што денеска престојува во официјална посета на земјава. Како што соопшти МНР, двајцата министри нагласија дека остануваат посветени кон процесот на приближување на регионот кон Европската унија и притоа ја акцентираа важноста на добрососедството и регионалната соработка, како влог во заедничката европска иднина. – На средбата беше поздравен обновениот дијалог меѓу двете Влади, како и значењето на продолжување на интензивната комуникација на високо ниво, при што беше изразено уверување дека со новата динамика во контактите ќе дојде до преку потребното надградување на билатералните односи, се наведува во соопштението Министерството за надворешни работи. Во фокус на разговорите беше претстојната заедничка седница на владите на двете земји, што ќе се одржи во Софија на 25 јануари, како и внесувањето нова динамика во соработката преку примена на концептот на работни групи, при што се разгледани конкретни области во кои постои потенцијал за напредок. Со тоа, како што се посочува во соопштението, двете земји ќе испратат јасен сигнал дека постои силна волја за исчекор и взаемно разбирање, во духот на добрососедството и европските вредности. – Посетата се случува на самата 30-годишнина од првото признавање на независноста на нашата држава, кое дојде токму од Република Бугарија, но ова е и прва посета на премиерот Петков на регионот на Западен Балкан воопшто, што испраќа многу важна и вредна порака за нашите односи, но не помалку важно и за нашиот динамичен и верувам поинаков пристап во надминување на предизвиците со кои се соочуваме, изјави министерот Османи по средбата, додавајќи дека е „важно да се идентификуваат конкретни чекори за соработка, преку иницијативи, активности и проекти во многу скоро време, за што двете Министерства за надворешни работи и другите ресори ќе дадат свој конкретен придонес“. Во однос на економската соработка, министрите го поздравија растот на трговската размена меѓу двете земји од 30 отсто во текот на 2021 година и ги изразија своите очекувања дека во текот на 2022-та ќе се задржи позитивната стапка на раст на двете економии и трговската размена меѓу нив, како и позитивниот тренд во нови инвестиции, кои треба да бидат и поддржани од двете држави. МИА...

Речиси 100-годишната Лили Еберт, која го преживеала Холокаустот, а минала четири месеци во Аушвиц, неодамна стана прабаба по 35-ти пат. – За секоја жена што ќе стане прабаба, тоа е нешто посебно. Но, во мојот случај, тоа значи уште повеќе. Тоа е навистина исклучителна работа!, изјави Еврејката која пораснала во Унгарија. Таа била ослободена од американските војници во април 1945 година, кога имала 20 години. А, денес, 77 години подоцна, таа вели дека новородените бебиња се „најдобрата одмазда кон нацистите“. Нејзиниот најмал внук стана татко на почетоков на јануари, а со тоа Еберт стана прабаба 35-ти пат. – Никогаш не мислев дека ќе доживеам вакво нешто. Прво се борев за мојот живот, морав да преживеам, а потоа – оваа година… Нацистите сакаа да нѐ убијат и истребат, а ние им покажавме дека не можат, вели таа. По нејзиното ослободување, Еберт минала една година во Швајцарија, а потоа, во 1946 година се преселила во Израел. И нејзиниот 18-годишен правнук Дов Форман ја пофали својата прабаба на Твитер. – Мојата 98-годишна прабаба Лили Еберт, која го преживеа Аушвиц, штотуку стана прабаба по 35-ти пат, напиша тој. Момчето напишало и книга со својата прабаба, со наслов „Ветувањето на Лили“, која го опишува нејзиниот живот. – Ние се стремиме да ја пренесеме нејзината приказна на што е можно повеќе луѓе, и на социјалните мрежи и преку нашата книга. Можам цел ден да ви раскажувам колку многу научив од неа… Таа е вистинска кралица на семејството. А, ние сме едно многу силно и хармонично семејство на чело со Лили. Таа едноставно нѐ инспирира секој ден!“, пишува правнукот Форман. МИА...

Австралија денеска се соочи со најсмртоносниот ден од избувнувањето на пандемијата на коронавирус, бидејќи ширењето на сојот Омикрон продолжи да ги зголемува стапките на хоспитализација на рекордно ниво, и покрај падот на дневниот број нови инфекции. Во Австралија денеска се регистрирани вкупно 77 смртни случаи, што го надминува претходниот национален максимум од 57 смртни случаи регистрирани минатиот четврток, покажаа официјалните податоци. „Денеска е многу тежок ден за нашата земја“, рече премиерот на Нов Јужен Велс, Доминик Перот на прес-конференција откако австралиската држава објави 36 смртни случаи, што е ново високо ниво од почетокот на пандемијата. Само четворица од починатите од Ковид во таа држава примиле бустер доза од вакцината против коронавирус, поради што здравствените власти апелираат до граѓаните што поскоро да добијат дополнителна доза. Од оние кои починале во Нов Јужен Велс, 33 примиле две дози од вакцината. Во услови на зголемен број хоспитализации, државата Викторија денеска прогласи „кафеав код“ во болниците, што ќе им даде овластување да ги откажат здравствените услуги кои не се итни. Државата Квинсленд објави дека ниту еден од денешните 16 смртни случаи во таа држава не добил дополнителна доза од вакцината. Во Австралија денеска беа пријавени околу 73.000 нови инфекции, што е помалку од 150.000 минатиот четврток. Австралија досега има пријавено околу 1,6 милиони инфекции со коронавирус од почетокот на пандемијата, од кои околу 1,3 милиони се регистрирани во последните две недели. Вкупниот број на починати достигна 2.776. МИА...

САД силно го поддржуваат пристапувањето на Северна Македонија и Албанија во Европската Унија и веруваат дека тоа ќе биде од корист за сите земји во регионот. Ова се наведува во соопштението на портпаролот на Стејт департментот Нед Прајс, дистрибуирано од Амбасадата на САД во Бугарија. Како што јави дописникот на МИА од Софија, администрацијата на американскиот претседател Џо Бајден не размислува за санкции против бугарската Влада и е убедена дека владите на Северна Македонија и Бугарија започнале конструктивен дијалог кој ќе помогне навремено да се решат нивните разлики. – Го цениме силниот интерес на американскиот Конгрес за ова прашање и ќе продолжиме да одржуваме тесна координација со Конгресот за ова прашање, се вели во соопштението на Прајс објавено од американската мисија во Бугарија. МИА...

Премиерите на Северна Македонија Димитар Ковачевски и на Бугарија Кирил Петков претпладнево имаат тет-а-тет средба во Владата, согласно агендата за еднодневната официјална посета на бугарската делегација во државава. Одделни средби имаат и вицепремиерот за евроинтеграции Бојан Маричиќ со потпретседателот на бугарското Народно Собрание, Кристиан Вигенин, министрите за надворешни работи на двете држави, Бујар Османи и Теодора Генчовска, како и министрите за транспорт и врски Благој Бочварски и Николај Сабев. Програмата за посетата предвидува пленарен состанок на двете делегации со кој ќе претседаваат премиерите Ковачевски и Петков по што ќе следува и нивна заедничка прес-конференција во 11.45 часот. Предвидена е и промоција на проектот за помош во развојот „Електронски дневник за лица со дијабетес“, кој премиерот Петков ќе му го врачи на премиерот Ковачевски како донација на Република Бугарија. Во преостанатиот дел од агендата за посетата на делегацијата на Бугарија, премиерот Петков ќе има одделни средби со претседателот Стево Пендаровски и со претседателот на Собранието Талат Џафери, како и со лидерот на ДУИ Али Ахмети. На аеродромот во Скопје изутрината владината делегација на Бугарија ја пречека министерот за надворешни работи Бујар Османи по што официјалниот дел на посетата стартуваше со церемонијален пречек со високи државни и воени почести пред Владата. Официјалната посета е предвидено да заврши во вечерните часови после што владината делегација на Република Бугарија ќе замине за меѓународниот аеродром Скопје на лет за Софија. МИА...

Министерот за внатрешни работи Оливер Спасовски упати апел до граѓаните да ги проверат своите патни исправи и доколку имаат потреба да ги менуваат тоа да го сторат сега, за да се избегнат летните турканици. – Во 2021 година се изработени 321.216 лични карти и 346.773 пасоши. За периодот 01.01.2021-31.12.2021 имаме зголемен број на барања за пасош, односно досегашниот просек по месец изнесува 18.000-24.000 барања. МВР во континуитет изработуваше лични документи во периодот 05.07.2021 до 31.12.2021: 203.442 пасоши и 167.558 лични карти. Бројките покажуваат дека капацитетите се користени до максимум, со двосменско работење и за време на викенди, напиша Спасовски на Фејсбук. МИА...

Почетокот на второто полугодие во основните и средните училишта се одложува за 1 февруари годинава, одлучи Владата на Република Северна Македонија сношти на владина седница по препорака на Главниот координативен кризен штаб и согласно епидемиолошките информации дека земјата се наоѓа во пик на заразата. Согласно одлуката, како што соопшти Министерството за образование и наука (МОН), наставата со физичко присуство во училиштата продолжува на првиот ден од месец февруари. – Оваа одлука нема да влијае на крајот на учебната година и таа ќе заврши на 10 јуни како што е предвидено во календарот за наставната програма за основно и средно образование, со соодветна адаптација на наставните планови, посочуваат од МОН. Оттаму апелираат до родителите, наставниците и учениците и за време на продолжениот распуст максимално да се придржуваат до мерките и препораките за заштита од Ковид-19, во домашни услови и на отворено. МИА...

Со церемонијален пречек пред Владата и со високи државни и воени почести започна официјалната посета на државава на бугарската делегација предводена од премиерот Кирил Петков. Бугарската делегација ја пречекаа премиерот Димитар Ковачевски, придружуван од потпретседателот на Собранието Горан Мисовски, вицепремиерот за европски прашања Бојан Маричиќ, министрите за надворешни работи и за транспорт и врски, Бујар Османи и Благој Бочварски, како и од членови на Канцеларијата на претседателот на Владата и на Министерството за надворешни работи. Петков е придружуван од Кристиан Вигенин, заменик-претседател на Народното Собрание на Република Бугарија и бугарските министри за надворешни работи и за транспорт и врски, Теодора Генчовска и Николај Сабев. На аеродромот во Скопје владината делегација на Република Бугарија беше пречекана од министерот за надворешни работи Бујар Османи. МИА...

Разводот, разделбата и живеењето сам честопати се причина за влошување на здравјето кај мажите и доведуваат до зголемена смртност. Ова го откриле научниците во ново истражување. И претходни истражувања покажаа поврзаност меѓу социјалната изолација (осаменоста) и повисоките стапки на болести. Западните општества имаат највисок раст на луѓе кои живеат сами. Ова ги натера научниците да побараат поврзаност меѓу осаменоста и заболувањата. Неодамнешен труд од Данска го открива токму тоа – разделбата, разводот, смрт на сопружникот, а потоа и осаменоста доведуваат до здравствени проблеми. Написот е објавен во лондонскиот „Журнал за епидемиологија и јавно здравје“ (Journal of Epidemiology & Community Health). Проф. Рике Лунд од Универзитетот Копенхаген во Данска ги проучува средовечните луѓе кои живееле најмалку 26 години во некаква партнерска заедница. Ова е прв труд којшто ги испитува влијанијата и последиците од осаменоста во покус или подолг временски период и доживување на еден или повеќе разводи или разделби по долга љубовни врска. Во истражувањето учествувале 4.835 луѓе на возраст од 48 – 62 години. Кај луѓето кои живеат сами повеќе од седум години, има зголемување на ризикот од болести за 12 отсто. Истражувањата не откриле таков ефект кај жените. МИА...

Градоначалничката Данела Арсовска секојдневно ја докажува негрижата за граѓаните и за Градот Скопје. Прекинувањето на проектот за Бас рапид транзит, за кој беа обезбедени средства преку заем од Европската банка за обнова и развој е нејзината прва штетна одлука. Годинава Арсовска ќе потроши 670.000 евра за вдомување на 109 кадри на ВМРО-ДПМНЕ во градската администрација. Во само 10 дена Данела Арсовска смени двајца директори на ЈП Градски паркинг и постави бивш разузнавач кој не е компетентен за функцијата. Арсовска одби финансиски да го помогне субвенционирањето на парното греење и во криза ги игнорира проблемите на граѓаните на Скопје. Наместо бесплатен јавен превоз ЈСП воведе билет од 120 денари, а потоа бара пари од Владата за покривање на трошоците за гориво. Наместо проекти, решавање на проблеми, единственото нешто што го прави Арсовска е прекинување проекти, партизација на Градот и оправдувања за нејзиното неработење....

На сите државјани на Република Северна Македонија од 20 јануари им е дозволен влез во Бугарија со приложување на валиден сертификат за вакцинација против КОВИД 19 или сертификат за прележана болест, заедно со негативен ПЦР тест не постар од 72 часа. За влез на малолетни лица од 12 до 18 години, исто така е задолжителен негативен ПЦР тест, информира Министерството за надворешни работи. Од МНР нагласуваат дека по интензивната комуникација меѓу министерствата за надворешни работи на двете земји, надлежните институции на Република Бугарија, донесоа нова одлука за влез во Бугарија на нашите државјани. Поради влошената епидемиолошка ситуација, Северна Македонија продолжува да биде во т.н. Црвена зона, но со најновата одлука се укинуваат ограничувањата за влез за неесенцијални потреби. Најновата одлука на бугарските власти, ќе стапи на сила од 20 јануари (четврток). МИА...

Напаѓачот на Манчестер јунајтед, по добивањето на специјалната награда од ФИФА „The Best“, објави дек апланира да игра уште 4-5 години. – Горд сум што сум најдобар стрелец на сите времиња на меѓународно ниво. Сè уште имам страст да играм и да постигнувам голови. Кога излегувам на теренот, дури и на тренинзите, мотивацијата ми е таму. Имам околу 37 години, но се чувствувам одлично. Планирам да играм уште четири или пет години, изјави Роналдо. Светската фудбалска асоцијација му оддаде почит на 36-годишниот кој постави нов светски рекорд за меѓународни голови во 2021 година. Сега тој има 115 постигнати голови. Роналдо со 109 гола го надмина поранешниот ирански напаѓач Али Даеи. Во гласањето за Златната топка – 2021 година, португалскиот напаѓач го зазеде шестото место. Роналдо оваа сезона настапи на 22 настапи за Манчестер јунајтед, постигнато 14 гола и три асистенции. МИА...

Во периодот од 10 до 16 јануари годинава во земјава се регистрирани вкупно 11.123 нови позитивни случаи на Ковид-19, што е зголемување од 33,9% во однос на претходната седмица. Тестирани се вкупно 45.401 материјали, за 14,7% помалку од претходните седум дена, а процентот на позитивност се движел од 21,4% до 30,2%, просечно 24,4%, покажува неделниот извештај на Институтот за јавно здравје. Најголем дел од регистрираните случаи се од Скопје (5.630; 50,6%), а највисока неделна инциденца е регистрирана во Крушево (1.152,4/100.000) и во Битола (1.035,5/100.000) Регистрирани се заболени лица во сите возрасни групи. Најзастапена е возрасната група од 30 до 39 години, а најмал број има кај децата до девет години. Се забележува зголемување на бројот на заболени кај скоро сите возрасни групи, особено кај лицата над 60 години со раст од 99,6% и оние од 50 до 59 со зголемување од 90,3% во однос на претходната недела. Минимално намалување на бројот на заболени има кај возрасните групи од 20-29 години (-4,3%) и од 10-19 години (-2,5%). Во однос на дистрибуцијата по пол, пријавени се 6.029 (54,2%) лица од женски и 5.094 (45,8%) од машки пол. Со статус „оздравени“ се стекнале 5.403 лица кои биле хоспитализирани или на домашно лекување. Во текот на минатата недела вкупно се пријавени 1.247 реинфекции, со зголемување од 31,8%во однос на претходната недела. Од почетокот на епидемијата, регистрирани се 3.380 реинфекции, што е 1,4% од вкупниот брои на инфицирани. Пријавени се 55 смртни случаи во 15 градови, за 34,1% повеќе од минатата недела. Најголем дел од нив се од Скопје (22) и од возрасната група над 60 години. Во лабораторијата за вирусологија и молекуларна дијагностика при ИЈЗ, во периодот од 10-15.01.2022, изведен е ПЦР тестот базиран на Single Nucleotide polymorphism -Vir SNiP SARS CoV2 Spike S371L S373P на вкупно 96 позитивни примероци на SARS-CoV-2, а кај 57 од нив (59,4%) едетектирана Омикрон варијантата (B1.1.529). Омикрон варијантата е откриена во седум градови итоа во: Скопје, Кавадарци, Тетово, Охрид, Кочани, Велес и Гевгелија. Според извештаите од болниците, моментално се хоспитализирани 439 лица (25,1% повеќе воспоредба со претходна недела), а од нив 251 се на кислородна поддршка и 26 на инвазивна/неинвазивна механичка вентилација. Во однос на симптоми пријавени кај заболените, најчесто се регистрирани температура (59,3%), кашлица (44,8%) и малаксаност (43,5%). Регистрирани се 62.107 (27,9%) асимптоматски случаи. Заклучно со 16 јануари годинава, пријавени се вкупно 245.398 случаи на Ковид-19. Регистрирани се 8.115 смртни случаи. Активни во моментов се 16.397 лица, а 220.886 се водат како оздравени. МИА...

На првиот ден од изборот на новата Влада, во министерствата беше извршено примопредавање, а новиот премиер Димитар Ковачевски најави дека секоја минута ќе ја посветат на клучните прашања од интерес на граѓаните. Првиот предизвик на новата Влада е надминувањето на енергетската криза и обезбедувањето подобри услови за живот на граѓаните. Тоа го најави и Ковачевски по средбата со претседателот на државата Стево Пендаровски. – Од денеска секоја минута од нашето време им ја посветуваме на клучните прашања од интерес на нашите граѓани. Токму затоа инсистирам во неколку наврати дека нашиот фокус е ставен на економскиот развој на земјата и подобрување на животниот стандард. Како прв човек на новата Влада за моја задача и одговорност ја поставив конструктивната комуникација и соработка со сите чинители во нашето општество како што се граѓанските здруженија и претставниците на опозицијата. Новата Влада ќе биде високопродуктивна во работењето посветена на поставените високи цели за кои сум сигурен дека со многу работа и труд можеме да ги реализираме, рече Ковачевски по вчерашната средба со претседателот Пендаровски. Од новите министри, Ковачевски очекува да работат чесно, одговорно и ефикасно. Дел од нив веќе ги презедоа функциите од досегашните министри. Новата министерка за одбрана Славјанка Петровска најави дека започнатите процеси во одбраната ќе продолжат со уште поинтензивна динамика, а еден од најважните приоритети во текот на нејзиниот мандат ќе биде одржувањето на стабилно финансирање на одбраната и достигнувањето на два процента од БДП за одбранбениот буџет до 2024 година. Приоритети за Петровска ќе бидат и донесувањето на законот за службеници во одбраната, модернизацијата и опремувањето на Армијата, како и реновирањето на воените објекти. Примопредавање имаше и во ресорот за борба против корупцијата и криминалот. Во овој ресор, според досегашниот вицепремиер за борба против корупцијата и криминалот Љупчо Николовски, поставени се темелите во борбата против криминалот и корупцијата – донесен е План со 18 системски мерки, нов Етички кодекс, Национален регистар на вистински сопственици, подигнато е нивото на транспарентност и отчетност кај министерствата, државните органи и општините, а започнат е и процес на дигитализација на институциите со кој ќе се елиминира човечкиот фактор. Министерот за внатрешни работи, кој и досега ја извршуваше оваа функција, Оливер Спасовски најави зголемување на платата за пет проценти на сите вработени во МВР во 2022 година, средства за бонус плата за оствaрени над 150 часа прекувремена работа во 2021 година, како и реконструкции на повеќе објекти кои се во надлежност на Министерството. Приоритет на МВР за 2022 година ќе биде и набавката на возила исклучиво за оперативно работење на полицијата. Смена беше направена и во министерствата за правда, здравство, образование, труд и социјала, култура и земјоделство. Досегашниот министер за правда, кој во новата Влада ќе го води ресорот евроинтеграции Бојан Маричиќ верува дека во Министерството за правда ќе продолжи темпото на спроведување на реформите бидејќи, според него, од суштинско значење за напредокот на државата и за евроинтеграцискиот процес се оценките кои доаѓаат од правосудството. И досегашниот министер за здравство Венко Филипче, кој му ја предаде функцијата на новиот министер Беки Сали, верува дека тој ќе одговори на предизвиците што ги наметна ковид пандемијата и дека во негов фокус ќе бидат грижата за пациентите, здравствените работници и транспарентноста кон медиумите. Новиот министер, пак, вети создавање на силен здравствен систем бидејќи тоа според него е сеопфатно дефинирање на проблемите и навремен пристап кон решенијата. Приоритет за новата министерка за труд и социјална политика Јованка Тренчевска, која доаѓа од Државниот инспекторат за труд, ќе бидат унапредувањето на правата од социјална заштита, обезбедувањето на редовни и сигурни пензии, заштитата и почитувањето на работничките права и грижа за најмладите. Родовата еднаквост, како што вети, останува и понатаму високо на агендата на Министерството за труд и социјална политика. Посветена работа во секторот земјоделство најави и новиот министер за земјоделство Љупчо Николовски. Вети реформи и повеќе пари за земјоделството, подобар пласман на земјоделските производи и пониски трошоци за производство…. Подготвеност да се соочи со предизвиците, но и со убавините и прогресот што го носи културата изрази и новата министерка за култура Бисера Костадиновска – Стојчевска, која ја презеде функцијата од досегашната министерка Ирена Стефоска. Новоизбраниот состав на Владата по примопредавањето на функциите вчера одржа конститутивна седница. Беа донесени првите одлуки, при што беа определени вицепремиерите и нивните должности, како и претседателите и членовите на основните и на посебните владини комисии. Успех на новата Влада и реализација на зацртаните цели вчера посака и досегашниот премиер Зоран Заев. – На новиот премиер Димитар Ковачевски и на министрите им посакувам успех во работата и исполнување на програмата и приоритетите на новата Влада за наредниот период, работејќи исклучиво за интересите на граѓаните и на државата, напиша Заев на својот фејсбук профил. Опозициската ВМРО-ДПМНЕ, пак, оцени дека мнозинството и владата повторно се на стаклени нозе, затоа што, како што изјави пратеникот Драган Ковачки, СДСМ и ДУИ изгласаа влада со само 62 пратеници, а недели наназад зборувале како имаат стабилно мнозинство. Повторија дека Владата нема легитимитет и повторно повикаа да се одржат избори. -Старо-новата Влада нема народен легитимитет и таа е производ на тешкиот пораз на СДСМ на локалните избори. Таа е континуитет на криминалот, корупцијата и неспособноста. Со оваа Влада без легитимитет, капацитет и авторитет, Македонија ќе продолжи да тоне.Токму затоа, на Македонија и се потребни избори кои ќе ја рефлектираат волјата на народот, а Владата ќе биде легитимна и одлучна во борбата со криминалот и корупцијата и ќе донесе нова иднина за сите граѓани на државата, оценија од пратеничката група на ВМРО-ДПМНЕ.Влада предводена од Ковачевски беше избрана во неделата со 62 гласа „за“, 46 „против“ и без воздржани.Во експозето пред пратениците, Ковачевски рече дека не се потребни нови избори, најавувајќи зголемување на пензиите и раст на минималната и просечната плата, реформи во образованието…. Владата на Ковачевски брои 21 член – 11 од СДСМ, шест од ДУИ, тројца од Алтернатива и еден министер од ЛДП. Новиот владин кабинет има еден член повеќе од досегашниот и тоа министер без ресор, место што по формирањето на новото парламентарно мнозинство и припадна на Алтернатива. Новата влада беше формирана откако премиерот Зоран Заев по поразот на локалните избори даде оставка од премиерската функција и од челното место во СДСМ. По ова следуваше период на преговори за да се обезбеди стабилно парламентарно мнозинство и избор на нов лидер на СДСМ и нов мандатар. МИА...

Турските власти одлучија да го ребрендираат имиџот на земјата во светот, објави турската телевизија ТРТ. Претходно овој месец турскиот претседател Реџеп Таип Ердоган објави соопштение во кое се наведува дека меѓународно признатото име на земјата се менува од „Турција“ во „Туркије“ („Turkey“ u „Turkiye), појасни телевизијата. „Зборот ‘Туркије’ на најдобар начин ги претставува и изразува културата, цивилизацијата и вредностите на турската нација“, се вели во соопштението. На турски земјата се нарекува Туркије. Земјата го прифати името по стекнувањето независност од западните сили во 1923 година, кои привремено ја окупираа. Низ историјата, Европејците ја знаеле како османлиска држава, а потоа ја познавале под многу варијации на зборот „Турција“. Името што остана најмногу беше на латински „Turquia“, а најприсутно беше „Turkey“. Според речникот на Кембриџ, зборот „Турција“ се дефинира како „нешто што лошо паѓа“, или „глупава“ или „смешна личност“. Огромното мнозинство луѓе во Турција веруваат дека именување на земја според нејзината локална варијација има смисла и е во согласност со целите на земјата да одреди како другите треба да ја идентификуваат. Во согласност со тоа, неодамнешното соопштение јасно стави до знаење дека во контекст на зајакнување на брендот „Turkiye“, во сите видови активности и кореспонденции, особено во официјалните односи со други земји и меѓународни институции и организации, ќе се користи терминот „Türkiye“ наместо изрази како што се „‘Turkey’, ‘Turkei“, ‘Turquie’ и така натаму“. МИА...

Оптимизам за нов почеток во обидите за надминување на спорот меѓу Северна Македонија и Бугарија и одблокирање на почетокот на преговорите на земјава со Европската Унија пристигнува деновиве и од Скопје и од Софија. Новите влади на двете земји најавуваат нов почеток во преговорите за надминување на спорот, попрагматичен пристап и фокус најпрво на она што е моментално остварливо, зајакнување на соработката и со тоа создавање позитивна клима и отворање на патот за надминување на разликите. Денеска во посета на Скопје пристигнува новиот премиер на Бугарија, Кирил Петков, кој ќе се сретне со исто така новиот македонски премиер Димитар Ковачевски, кој откако во неделата доби поддршка за неговиот владин состав во Собранието, вчера и официјално стапи на премиерската функција. Поглед кон иднината, поголема практичност, ослободување од досегашните декларативни заложби, насоченост кон она што можеме и што е важно за секојдневието на граѓаните најавуваат двајцата премиери пред денешната средба. Тие меѓу другото ќе разговараат за формирањето на петте работни групи – за економија, инфраструктура, култура, евроинтеграции и историја, кои, како што најави Петков во интервју за МИА, би се состанувале секоја од нив еднаш месечно и би придонеле за практично решавање на прашањата кои се важни за двата народа. Ќе стане збор и за одржување на заедничка седница на двете влади, која би можела да се реализира во текот на овој месец. Ковачевски вчера по средбата на новиот владин кабинет со претседателот Стево Пендаровски истакна дека со Петков ќе разговара за теми од областа на економијата, инфраструктурата, образованието, образовната соработка, иновациите, како и за поддршката во евроинтеграцискиот процес на земјава. Петков во интервјуто за МИА, пак, нагласи дека доаѓа со конструктивен тон и подготвеност за нов почеток и без анекс или каков било документ на Договорот за пријателство, добрососедство и соработка. – Не, не. Доаѓам со конструктивен тон и подготвеност да почнеме да работиме заедно. Немам подготвен документ или нешто, бидејќи сите тие документи немаат поента, ако не им дадеме вистинска мотивација дека мора да ја завршиме работата. Јас предлагам документите да ги оставиме како втор чекор, а прво да почнеме, за да има нешто за што ќе пишуваме во следниот документ. Инаку, опасноста е дека ние ќе напишеме документ и после што од тоа, вели Петков на прашањето на МИА дали со себе ќе донесе некаков анекс на Договорот, нешто за што во земјава се шпекулираше изминатиот период. И Ковачевски вчера изјави дека со Петков нема да потпишуваат договори, туку низ работа ќе ја вратат прво довербата меѓу граѓаните и оти тоа нема во сите области да го прават политичарите. – Кога зборуваме за соработка во областа на економијата и во областа на трговијата тогаш тука сметам на соработка помеѓу бизнис секторот, што значи дека ќе ги повикаме и стопанските комори на двете држави да соработуваат помеѓу себе. Во областа на образованието ќе ги повикаме и универзитетите да соработуваат меѓу себе. Во однос на иновациите, оние кои се занимаваат со нови бизниси, со иновации да соработуваат меѓу себе, додаде Ковачевски. Тој нагласи дека ваквиот принцип ќе се користи и при образовна и културна размена, како и дека ќе се работи на тоа младите да воспостават подобра комуникација меѓу себе. За роковите повеќе не се говори, иако самиот Петков заговараше шест месеци за да се реши спорот, а по заседанието на бугарскиот Консултативен совет за национална безбедност, претседател на Бугарија, Румен Радев изјави дека рокови не се потребни, туку потребни се реални резултати. Сега и самиот Петков вели дека можеме да постигнеме напредок во рокот во кој ќе си ја завршиме работата и едната и другата страна. Осврнувајќи се на деструктивните сили кои влијаат врз процесите и обидите да се реши спорот меѓу Северна Македонија и Бугарија, Петков во интервјуто за МИА нагласи дека тие одделни групи во двете земји, кои од различни причини сметаат дека добрососедството не е добро за нив, ако се вклучат во целиот контекст ќе бидат само еден мал глас во целосната слика. – Има една мала група на луѓе, кои преку корупцијата заработуваат на сметка на сите останати. Јас мислам дека тие се дел од деструктивните елементи, кои се поврзани и кои го поставуваат прашањето дали е добро или не е добро добрососедството меѓу двете земји. Многу од тие исти групи се поврзани и со внатрешната корупција во земјите, порача во интервјуто за МИА бугарскиот премиер Кирил Петков. Лесни и тешки прашања Да се поврземе и да ја зајакнеме соработката онаму каде моментално нема препреки, да поттикнеме бизнис соработка, да се воведе директна авионска линија, да се работи на инфраструктурно поврзување е појдовната точка од која двајцата премиери ќе се обидат да го придвижат процесот и да го отворат патот за потешките прашања, секако тука спаѓаат јазикот, нацијата, историјата. Петков смета дека првата работа што може да се направи уште следниот месец е воведување на авиолинија Софија-Скопје, а за тоа како ќе се решаваат потешките прашања вели дека со конструктивен дијалог сите прашања се решливи. Ковачевски вчера порача дека нашите позиции се кристално јасни, односно дека ние сме Република Северна Македонија, во која граѓаните зборуваат македонски јазик и имаме свој засебен идентитет. – Во однос на историските прашања секогаш сум кажувал дека треба да бидат дел од дебата на историчарите, а дека довербата меѓу граѓаните треба да се гради на позиции коишто значат подобар стандард за нив и како да дојдеме до тоа. Во однос на малцинските права ние ги почитуваме сите повелби и сите организации во кои се регулираат на меѓународно ниво, вклучително и ОН и малцинските права. Ние, исто така, сме држава која што кажала во однос на сите свои соседи дека нема да се меша во нивните внатрешни прашања, потенцира Ковачевски. Бугарскиот премиер во интервјуто за МИА нагласува дека има лесни работи, но и потешки и почувствителни, кои треба да се адресираат. – Има некои работи на кои треба да обрнеме малку повеќе внимание, кои се почувствителни, во врска со тоа што примарно и Консултативниот совет за безбедност го изнесе за правата на Бугарите. Тоа се теми кои се со малку поголема тежина. Ние треба да ги адресираме. Јас сметам дека еден пријателски, конструктивен пристап треба да може да ги решава и лесните и потешките теми. Но, затоа најважно е да имаме доверба и таа доверба се надевам дека ќе ја изградиме и тоа со оние работи кои ги правиме заедно, нагласи Петков. Бугарскиот премиер пред доаѓањето во Скопје во интервју за БТВ рече дека ниту тој, ниту други претставници на Владата не разговарале со претставници на Амбасадата на САД во Бугарија за признавање на македонско малцинство во земјата. – Нема такво малцинство и за такво малцинство не може да се зборува, рече Петков. Тој порача дека постои усогласен став на бугарската политика, потврден од Консултативниот совет за национална безбедност пред една недела, дека позицијата на Бугарија кон Северна Македонија не е променета, туку е само надградена со работни групи. Петков, пак, синоќа во интервју за Сител порача дека на ниту еден начин не ги доведуваат во прашање идентитетот и јазикот на Република Северна Македонија. Во одговор на прашање кој е неговиот став за македонскиот јазик и народ истакна дека Бугарија е првата држава која ја признала Северна Македонија како самостојна држава и оти се гордее со тоа. -Кога си самостојна држава ние на ниту еден начин не го доведуваме во прашање идентитетот, јазикот во Република Северна Македонија. Тоа е ваше идентитетско право. Никој тоа не го оспорува, истакна Петков. Вицепремиерот за европски прашања Бојан Маричиќ, кој вчера посетата на Петков ја оцени како добар знак и добар сигнал за отворање нов процес, истакна дека изјаснувањето и дефинирањето на тоа каква етничка заедница егзистира во која било од државите во регионот не би било продуктивно во овој момент. – Ние се водиме од европски принципи и практики и тоа ќе остане така, тоа е наша уставна обврска. И досега имавме пракса на немешање во внатрешните прашања на која било наша соседна држава. Тоа ни е обврска од Уставот, така што не е на Северна Македонија каде и какво малцинство има во регионот, тоа е внатрешно прашање на сите држави во регионот, вклучувајќи ја и Бугарија, а секоја група на луѓе, етничка заедница или пак политичка партија или здружение имаат право да ги бараат своите права преку Советот на Европа, Европскиот суд за човекови права или Европската конвенција за заштита на човековите права, рече Маричиќ. Европскиот суд за човекови слободи и права од Стразбур има изречено 16 пресуди за кршење на правото на слободно здружување на Македонците во Бугарија. Комитетот на министрите на Советот на Европа, во јуни минатата година изрази загриженост и побара од бугарските власти да обезбедат информации за овие случаи до 1 декември 2021 година, како и да се продолжи со разгледување на спроведувањето на пресудите од оваа група на предмети за време на состанокот во март оваа година. А едно од тешките прашања минатата година беше работата на Заедничката македонско-бугарска комисија за историски и образовни прашања, чии членови на последните состаноци не успеаја да ги приближат позициите и по завршувањето излегуваа во ставови дека нема напредок, дека остануваа разликите во пристапот. Мешовитата македонско-бугарска комисија беше формирана согласно Договорот за пријателство, добрососедство и соработка потпишан меѓу двете земји во 2017 година, а последниот 16-ти состанок се одржа во декември минатата година. Петков сега предлага и оваа комисија, како и останатите работи групи кои се планирани, да се состанува еднаш месечно, да биде подинамична, а за тоа каде е проблемот дали во самата форма на комисијата или во нејзините членови, тој не дава конкретен одговор, но за разлика од него вчера шефот на македонската дипломатија Бујар Османи изјави дека е подготвен да предложи промени во работата на Заедничката историска комисија. – Подготвен сум да предложам да влеземе во разговор за евентуална промена на начинот на работа, а зошто не и структурата и составот на Заедничката историска комисија, рече вчера Османи и нагласи дека евентуална промена во структурата и пристапот на работата на комисијата нема да биде врзана за конкретни рокови за резултати. На посетата на Петков и ставовите изнесени од него непосредно пред доаѓањето во Скопје вчера се осврна и лидерот на опозициската ВМРО-ДПМНЕ, Христијан Мицкоски, кој во гостување на ТВ 24 истакна дека од ЕУ не треба да се откажеме, но не со преговори по цена на идентитетот. -Се додека имаме меѓународна политика каква што имаме, се додека на отворена сцена се газат преговарачките позиции како што тоа денеска го правеше Маричиќ, што претходно го правеше Бучковски, како Заев, во еден период Димитров, а Бујар Османи континуирано, ние и континуирано ќе губиме и од ништо ќе ни се случуваат вакви проблеми, вели Мицкоски. Во врска со изјавата на Петков рече дека е „чудно истовремено да велите дека не го спорите определувањето на македонскиот народ, а од друга страна да не знаете дека постои македонско малцинство во Бугарија за кое има пресуди во Европскиот суд за човекови права“. – Добро би било еве оваа влада ,,проевропска и прогресивна” влада која ја предводи Петков да имплементира барем една од тие пресуди на Европскиот суд за човекови права и да им дозволи на луѓето од ОМО ,,Илинден – Пирин” барем да се регистрираат како политичка партија и тогаш јас ќе верувам дека навистина тие не го спорат нашиот идентитет, никој не го спори постоењето на македонскиот јазик итн, рече Мицкоски, кој најави дека денеска ќе има средба со новиот бугарски премиер. Билатералните прашања, билатерално да се решаваат, порака од Германија Пред денешната посета на Петков, новиот премиер на Северна Македонија Ковачевски, вчера на првиот ден на стапувањето на премиерската функција оствари средби со германската министерка за Европа, Ана Лирман и американската амбасадорка во земјава Кејт Брнз. Лирман, која вчера престојуваше во посета на Скопје изрази поддршка за почеток на преговорите на Северна Македонија и Албанија со ЕУ, но и решавање на билатералните прашања на билатерално ниво. -Германија е сериозна со ЕУ-перспективата за сите држави од регионот. ЕУ во однос на Северна Македонија стои на својот збор. Сите предуслови за почеток на пристапните преговори се исполнети. Преговорите на Северна Македонија и Албанија со ЕУ треба да почнат, Германија и понатаму активно ќе се залага за тоа, рече Лирман на заедничка прес-конференција со Маричиќ. Лирман потенцира дека билатералните прашања мора да бидат билатерално решени, независно од пристапниот процес со ЕУ, додавајќи и дека нашата земја и Бугарија активно работат на решение на блокадата. – Северна Македонија консеквентно продолжува да чекори по патот на реформите и владеењето на правото што е исто така сигнал во правец на ЕУ. Би сакала да Ве охрабрам да останете на тој пат, истакна министерката, дополнувајќи дека без борба против корупцијата ниту една земја не може да се развива. Со порака пред денешната посета на Петков излезе и американската амбасадорка во земјава Кејт Брнз на средбата со новиот премиер Димитар Ковачевски. Брнз потенцираше дека за САД односите меѓу двете земји како најблиски соседи и сојузници во НАТО се од исклучителна важност и дека од посебно значење е брзото решавање на клучните прашања кои ќе го овозможат континуитетот на процесот за членство на Северна Македонија во ЕУ. Ковачевски на средбата, пак, истакнал дека официјална посета на премиерот Бугарија Петков и на членовите на неговата Влада е добра порака која најавува сериозен исчекор за отворените прашања меѓу двете земји и за изнаоѓање решенија прифатливи за двете страни. МИА...

Бугарскиот премиер Кирил Петков денеска ќе престојува во еднодневна официјалната посета на Република Северна Македонија земја заедно со Кристиан Вигенин, заменик-претседател на Народното Собрание на Република Бугарија, и со бугарските министри за надворешни работи и за транспорт и врски, Теодора Генчовска и Николај Сабев. На аеродромот во Скопје владината делегација на Република Бугарија ќе ја пречека министерот за надворешни работи Бујар Османи по што се очекува да започне официјалниот дел на посетата со церемонијалниот пречек со високи државни и воени почести пред Владата на Република Северна Македонија. Бугарската делегација ќе ја пречека премиерот Димитар Ковачевски, придружуван од потпретседателот на Собранието Горан Мисовски, вицепремиерот за европски прашања Бојан Маричиќ, министрите за надворешни работи и за транспорт и врски, Бујар Османи и Благој Бочварски, како и од членови на Канцеларијата на претседателот на Владата и на Министерството за надворешни работи. Според агендата за посетата, премиерите Ковачевски и Петков ќе имаат тет-а-тет средба, а одделни средби ќе имаат и вицепремиерот Бојан Маричиќ со потпретседателот на бугарското Народно Собрание, Кристиан Вигенин, министрите за надворешни работи на двете држави, Бујар Османи и Теодора Генчовска, како и министрите за транспорт и врски Благој Бочварски и Николај Сабев. Програмата за посетата потоа предвидува пленарен состанок на двете делегации со кој ќе претседаваат премиерите Ковачевски и Петков после што ќе следува и нивна заедничка прес-конференција. Премиерите Ковачевски и Петков, потоа, во Клубот на пратениците, официјално ќе го промовираат проектот за помош во развојот „Електронски дневник за лица со дијабетес“, кој премиерот Петков ќе му го врачи на премиерот Ковачевски како донација на Република Бугарија. Во преостанатиот дел од агендата за посетата на делегацијата на Република Бугарија, премиерот Петков ќе има одделни средби со претседателот Стево Пендаровски и со претседателот на Собранието Талат Џафери. Официјалната посета е предвидено да заврши во вечерните часови после што владината делегација на Република Бугарија ќе замине за меѓународниот аеродром Скопје на лет за Софија. МИА...